116 – 22, Topi që hesht një komb

116 pikë të Serbisë ranë si plumba mbi parketin kuqezi. Me vetëm 22 pikë të shënuara, Kombëtarja U-20 e basketbollit u përball me një turp historik. Ish-lojtarja Elektra Zykaj zbulon plagët e sportit shqiptar, fajtorët e heshtur dhe pse ky rezultat është një kambanë alarmi.

Topi kërcente mbi parketin e ftohtë, por duket se ritmi i dikurshëm kishte humbur. Tingulli ishte i rëndë, i zbrazët, si një rrahje zemre që po shuhej drejt udhës pa kthim. Në tribunë, disa duar përplaseshin lehtë, më shumë për inkurajim se sa për festë. Shifrat në tabelën elektronike rriteshin pa mëshirë. Serbia po “sakatonte” Shqipërinë, në një ndeshje të 20-vjeçarëve që nuk luhej vetëm për pikë, por edhe për prestigj. Fundi i përballjes numëroi shifra të frikshme. Serbia 116, Shqipëria vetëm 22 pikë. Çdo pikë e serbëve u duk si një goditje e re, jo vetëm për vajzat në fushë, por për të gjithë ata që shpresonin dhe besonin se lojërat me dorë do të kthehen në kohët e arta.