"YLLI" që erdhi nga sokakët e Beratit

Myrto Uzuni gjen një orë kohë pas këtyre ditëve të ndeshjeve të Kombëtares për të folur për Newsbomb.al. Telefoni e ndërpret herë pas here, megjithatë mes emocioneve dhe dëshirës për të folur me një "frymë", tregon krejt pa skrupuj jetën e tij, ku peripecitë kanë qenë më të mëdha krahas sukseseve. Përvoja e ka mësuar se gjithçka shpërblehet herët a vonë. Nëse në fushë e shohim duke vrapuar pa pushim, të njëjtën gjë ka bërë edhe në jetë, edhe pse është vetëm 27-vjeç. S'është ndalur kurrë, edhe në pikën më kritike, s'është dorëzuar asnjëherë. I vetëm mes një industrie të madhe siç është futbolli, Myrto që mban emrin e gjyshit të tij të ndjerë, ia doli. Sot është pikë kyçe e kombëtares shqiptare dhe luan në liga prestigjoze siç është ajo e Spanjës. 16 VITE MË PARË, EMIGRIMI NË GREQI Ashtu i buzëqeshur nis të tregojë historinë e jetës së tij, emocionet na mbërthejnë të dyve. Herë pas herë ndërpritet nga telefoni pasi është shumë i kërkuar, veçanërisht nga gazetarët. Kohën e ka të limituar prej angazhimeve profesionale. Më në fund zgjedh ta lërë atë pa zë dhe nis të tregojë historinë e tij. Në Berat jeta kishte qenë shumë e vështirë për të dhe familjen e tij. Babai Artani donte të emigronte, por bashkë me Myrton. Ai asokohe ishte vetëm 10-vjeç dhe i rrethuar nga dëshira për t'u bërë futbollist, luante me moshat e Tomorit të Beratit. Greqia do të ishte destinacioni i tyre. Megjithatë ishte e vështirë. Në vitin e largët 2006, kufiri i shtetit helen mund të kalohej vetëm në këmbë. 3 ditë e 3 netë për familjen ishin të papërballueshme, veçanërisht për mamanë dhe vëllain e vogël të Uzunit. Disa të afërm arritën t'i siguronin 8 mijë euro babait, Artanit, i cili mori rrugën familjarisht drejt shtetit fqinj. Padyshim një moment i ngulitur thellë në kujtimet e Myrtos, të cilit i mbushen sytë me lot kur tregon: " Historia e jetës sime ka qenë jo shumë e lehtë. Si gjithë shqiptarët në atë kohë, na u desh të emigronim në Greqi për një jetë më të mirë, për një të ardhme më të mirë. Aty u hasëm menjëherë në vështirësi, pasi grekët e kuptuan se ishim shqiptarë. Na u donte punë dyfish për të çarë përpara. Babai im punoi me rrugët, ndërsa nëna ime lante enët në një restorant. Unë gjithashtu duhej të punoja, duke ndihmuar mamanë. Punoja 12 orë dhe luaja futboll, edhe pse më duhej të ngrihesha në 6:00 të mëngjesit". KARRIERA NË SHTETIN HELEN, FUTBOLLI NË DYSHIM Sot e duan të gjithë. Edhe një autograf do t'i mjaftonte. Angazhimet s'i lënë shumë kohë t'ua plotësojë dëshirën tifozëve. Të paktë janë ata që e dinë historinë e beratasit, kur në Greqi u vu në dyshim e ardhmja e tij si lojtar. Familja nuk mund të paguante që Myrto të aktivizohej në ligat amatore. Është vetë babai i tij, Artani, që tregon: " Vitet më të vështira të jetës kanë qenë në Greqi, veçanërisht në aspektin profesional të Myrtos. Ai rrinte gjithë kohën me top në këmbë, sigurisht pas punës. Kosiste barin ose ndihmonte të ëmën si pjatalarës. Megjithatë me ndihmën e një trajneri, Andrea Guskas, ai e mori përsipër për 6 vjet me investimet e tij, gjërat shkuan mirë ". Por, në Greqi s'të mbanin pa shlyer detyrimet mujore. Ndaj iu kërkua që babait të tij të paguante në muaj 25 euro. Edhe këtë shifër, familja s'mund t'ia garantonte çdo muaj Uzunit. Aq duheshin që Myrto të rrinte tek akademia që kishte filluar stërvitjen në ishullin Zakinthos, por vetëm aq mundej i ati për të paguar një muaj. “ Unë nuk kisha mundësi, herë punonim herë jo, ato lekë që merrnim, do hanim apo do t’i paguanim që të bëhej Myrto futbollist?! I thashë nuk paguaj më, nuk kam më. Nëse Myrto vlen ai duhet ta mbajë pa lekë, nëse nuk vlen le ta lërë s’kam përse e ndjek ", thotë i përlotur babai i tij. Nëse kishte një moment për të ndalur rrugën drejt futbollit profesionist, nuk ndodhi asnjëherë për Myrton. Përkundrazi, vështirësitë e motivonin më shumë. Një dorë i dha edhe trajneri grek, i cili mbuloi shpenzimet e sulmuesit për 6 vite, ndërsa ai ia shpërblente me çdo punë fizike që i kërkohej. PROVA TE OLYMPIACOS, LETRAT E DETYRUAN TË BRAKTISTE GREQINË Talenti i Myrto Uzunit ra në sy në Greqi. Shpejtësia në fushë dhe marrëdhënia e mirë me topin bënë që trajneri grek të investonte shumë te ai. Në vitin e dytë të qëndrimit në shtetin helen, për Myrton vjen mundësia e artë. Do të provohej te Olympiacos. Të gjithë ishin optimistë. Edhe pse 16-vjeç, aftësitë e tij mendohej të bindnin scoutet e ekipit të madh grek. Dhe në fakt kështu ndodhi. Ai u provua për një javë te skuadra greke dhe u pëlqye shumë. " Unë kurrë nuk e ndalova ëndrrën time. Ecja përpara falë idhullit tim, Cristiano Ronaldos. U përpoqa të bëja një provë te Olympiacos. Qëndrova për 7 ditë te ata. Më pëlqyen dhe nisën negociatat me trajnerin tim grek dhe babain. Kërkuan 2-mijë euro. U gjet një marrëveshje mes babait dhe trajnerit grek, teksa ky i fundit do të ishte menaxheri im dhe do të përfitonte përqindje nga kartoni. Por, problemet me letrat shuan shpresat dhe dëshirën për të nisur një faqe të re në jetën time. Ky ishte momenti kur babai tha se ishte më mirë të kthehesha në Shqipëri që të mund të luaja për një skuadër futbolli. Ata sakrifikuan për mua duke u rikthyer në vendin tonë ". RIKTHIMI NË SHQIPËRI, 4 MILIONË LEKË NGA APOLONIA Në Greqi kishin folur me superlativa për talentin e beratasit, Uzuni. Babain e kishte gjithmonë në krah. Për pasionin e djaloshit, asokohe 16-vjeçar, lanë shtetin helen për t'u vendosur edhe një herë në Berat. Myrto rinisi aventurën me skuadrën e Tomorit. Beratasit luanin në Kategorinë e Parë. Edhe pse në moshë fare të re, arriti të binte në sy duke shënuar edhe 3 gola. Menjëherë skuadrat e kampionatit shqiptar hodhën "kthetrat" në Berat. Ishte Koço Kokëdhima që nuk nguroi të shpenzonte për sulmuesin e të ardhmes. Këtë moment e kujton mirë dhe babai Artani që tregon: " Çuni po bënte mirë me Tomorin. Arriti të shënonte edhe gola. Apollonia e pikasi dhe e mori menjëherë. Paguan 4 milionë lekë dhe e morën në ekip ". Sakrifica u duk se ia vlejti për familjen e thjeshtë beratase. Myrto paguhej te Apolonia me 80 mijë lekë në muaj, ku i sigurohej fjetja dhe ushqimi. Një shumë e konsiderueshme kjo për vitet që flasim, por edhe për gjendjen ekonomike në të cilën gjendej familja e Uzunit. Ky ishte vetëm fillimi i një vazhdimi të suksesshëm. Performancat me Apoloninë ishin të jashtëzakonshme. Në moshën 19-vjeçare, arrin të realizojë plot 17 gola me fierakët. Kaq mjaftoi dhe skuadrat e Superligës u "turrën" drejt tij. 20 MIJË DOLLARËT E PASHK LASKËS DHE FILLIMI I NJË VAZHDIMI TË MADH I pari që vrapoi drejt beratasit ishte Pashk Laska. Njohës i mirë i talentëve, presidenti i Laçit nuk hezitoi për ta pasur në skuadrën e Laçit 20-vjeçarin. Koço Kokëdhima nga ana tjetër ia kishte "kopsitur" mirë letrat beratasit dhe nuk e lëshonte pa para. Apolonia ishte në Kategori të Parë, ndërsa Laçi luante në elitën e futbollit shqiptar. Garonte sistematikisht në Kupat e Europës, aty ku mundësia për Uzunin do të ishte e madhe për t'u katupultuar në një kampionat më të fortë. Presidenti i Laçit e hapi thesin dhe pagoi 20 mijë dollarë për kartonin e futbollistit. Ishte i bindur që do të përfitonte nga ai lojtar. Do të kontribuonte te bardhezinjtë në kampionatin shqiptar, por edhe do të mbushte arkat pasi me cilësitë që zotëronte do të shitej. Babai i Myrtos i është mirënjohës, Laskës: " Më pas erdhi Pashku, presidenti i Laçit që e falenderoj, pasi bëri të mundur blerjen e kartonit nga Fieri dhe Myrto hapi sytë në Superligë. Unë nuk isha këtu, por Myrto më mori në telefon dhe më tha se Laçi ka blerë kartonin nga Fieri për 20 mijë dollarë. Padyshim ishte gëzim i madh për familjen tonë ". Një moment që mbahet mend edhe nga Myrto që e përshkruan: " Mora vesh që Laçi më kishte blerë kartonin. Më njoftuan nga klubi i Apolonisë. Aty m'u duk se kalova në një kampionat të huaj. Isha i bindur që do të luaja fort dhe do të bija në sytë e të huajve. Kjo ishte ëndrra ime. Superliga ishte ëndrra e çdo lojtari të ri që nis futbollin në Shqipëri ", thotë ai. Paga mujore te kurbinasit kapte shifrat e 100 mijë lekëve në muaj. Fitoi menjëherë vendin e titullarit. Askush nuk guxonte ta ulte në stol. Ishte fjalëpak dhe mjaft punëtor. Në sezonin 2017-2018-të realizoi 10 gola duke u aktivizuar në 35 ndeshje, e gjitha si titullar. Me performancën e bërë "firmosi" të ardhmen jashtë vendit. Ofertat në drejtim të tij nuk mungonin, por presidenti Laska nuk ngutej. I studionte me hollësi dhe qetësi. Në fund do të zgjidhte më të volitshmen. "BOOM" I MADH, MYRTO UZUNI NË KROACI DHE 350 MIJË EURO PËR LAÇIN Ishte shtatori i vitit 2018-të. Superliga kishte ngritur "siparin", po ashtu edhe Laçi që garonte sërish për titull, por edhe për të luajtur në Europë. Edhe pse ofertat kishin qenë të shumta për Uzunin, presidenti Laska e kishte vendosur ta mbante sërish. Beratasi ishte bërë si vera. Sa më shumë qëndronte, aq më i kërkuar bëhej. U aktivizua 270 minuta në 3 ndeshjet e para të Superligës, duke arritur të shënonte dhe gol. Por, në fillim të shtatorit përfundoi dhe "qëndrimi" i Pashk Laskës. Më në fund presidenti i Laçit u tundua nga oferta e Lokomotivës së Zagrebit. Kroatët kishin ofruar plot 350 mijë euro për kartonin e futbollistit. Padyshim një shifër e majme për nivelin e kampionatit shqiptar. Negociatat u mbyllën me shtrëngim duarsh dhe tashmë përpara Uzunit ishte hapur një faqe e re, jo vetëm në jetën e tij, por edhe në karrierën futbollistike, duke marrë dhe ftesë nga Kombëtarja. "Ka qenë momenti më i bukur i jetës time kur u transferova te Lokomotiva. Për mua ishte diçka e madhe. Mbështetja më e madhe ka qenë padyshim familja dhe menaxheri im Franci. Ata i falënderoj se më kanë qëndruar afër gjithmonë. Shpresoj që dhe unë t'ua kem shpërblyer me këtë që kam bërë deri tani. Megjithatë ende s'jam i kënaqur. Dua të arrij më shumë. Po punoj fort që e ardhmja ime të jetë gjithmonë më e mirë", thotë Uzuni. NGA KROACIA NË HUNGARI E NË LA LIGA, KARRIERË E NDRITUR PËR UZUNIN Uzuni s'ndaloi kurrë së ëndërruari. Edhe në ditët kur kosiste barin apo lante pjatat në ditët e vështira të jetës në Greqi. Ai mendonte vetëm për futbollin, ëndërronte kur të ishte përballë idhullit të tij Cristiano Ronaldos. Ndoshta e kishte menduar t'i merrte ndonjë autograf dhe jo të shënonte apo t'i bënte kërshëri duke festuar si ylli portugez. Pas transferimit te Lokomotiva e Zagrebit, karriera e tij mori "ashensorin ngjitës". Makineri golash në Kroaci, ra menjëherë në sy të europianëve. Ferencvarosh u interesua për shërbimet e tij. Kampionët e Hungarisë s'u menduan dy herë, por e bënë pronë të tyre për shifrën e 1.8 milionë eurove. Shuma të çmendura këto për një beratas të thjeshtë që kishte vënë në dyshim nëse do të vijonte futbollin apo jo për vetëm 25 euro. Në këtë transferim të tij në Hungari përfitoi edhe Laçi pasi kishte mbajtur 20 përqind të kartonit. Edhe 360 mijë euro të tjera të arkëtuara në klubin kurbinas. Te hungarezët bëri realitet dhe ëndrrën e kahershme. Në nëntor të 2020-tës, Ferencvarosh përballej në Kupat e Europës me Juventus. Ai kishte përballë idhullin e tij, Cristiano Ronaldon. Fati deshi të shënonte dhe të festonte njësoj si portugezi. " Ishte moment i jashtëzakonshëm. Kisha kundër meje atë që më kishte motivuar gjithmonë se si duhet të luaja. Sigurisht që s'më njihte. Por, kur i shënova Juventusit dhe festova si ai, në fund të ndeshjes më përgëzoi. Ishte natë e paharrueshme. Emocione të jashtëzakonshme. Familjarët i kisha me COVID në Shqipëri, por edhe ata kishin qenë duke festuar si unë ashtu të izoluar". TRANSFERIMI TE GRANADA NË LA LIGA DHE E ARDHMJA Te Ferencvarosh arriti të zinte shumë shpejt vendin e titullarit. Menjëherë mori "stafetën" e protagonistit duke shënuar dhe në Hungari. 21 gola të shënuar në 31 ndeshje, ishin statistika që s'mund ta linin më në kampionatin hungarez. Kësisoj, nga La Liga vjen oferta e jetës. Granada e do në skuadër. Do të luante përballë yjeve të Barcelonës, Real Madrid apo dhe shumë ekipe të tjera që kanë bërë histori në futbollin botëror. Palët u dakordësuan dhe Uzuni kaloi në Spanjë për shifrën e 4 milionë eurove. Rroga s'do të ishte më 800 mijë lekë apo 1 milionë lekë të vjetër, por qindra mijëra euro në sezon. Firmosi një kontratë 4-vjeçare dhe tashmë është dhe për 3 sezone të tjera pjesë e ekipit spanjoll. Megjithatë të ardhmen e lë pezull teksa shprehet: " Unë kam kontratë edhe 3 sezone me Granadën. Tashmë do të luajmë në Ligë të parë. Do të ulem të flas me drejtuesit. Nëse duan të qëndroj, do ta bëj. Nëse kanë plane të tjera dhe unë do të diskutoj ", përfundon ai. MARRËDHËNIA ME ISH-SHOKËT E KAMPIONATIT SHQIPTAR Të shumtë janë ata që duan të ndjekin hapat e Myrtos, ka dhe të tjerë që e kanë zili për arritjet. Ka edhe nga ata që mendojnë se ai ka ndryshuar. Por, në fakt nuk është kështu. Myrto ka mbetur i thjeshtë. Është i njëjti që atëherë siç kosiste barin. Tregon shokët me të cilët ka kontakte të vazhdueshme në Shqipëri dhe padyshim mban konsideratë të veçanta. " Kam lënë shumë miq në Shqipëri. S'mund t'i harroj asnjëherë. Flasim shpesh. Kontaktet me ta i kam sistematike. Ata janë pjesë e jetës sime. Do të veçoja Regi Lushkjën, të cilin e kam mik të mirë. Është Januzaj që ka qenë te Kukësi, Fangaj, Sefgjini apo dhe Kev Bardhi. Lista është e gjatë. Më kanë ndihmuar shumë. Nëse do të kisha në dorë të ndryshoja të shkuarën, s'do të bëja asgjë. Jam shumë i lumtur. Gjithçka që më ka bërë të vuaj, thjeshtë më ka dhënë forcë vetëm të shikoj përpara. Jam rritur duke parë Ronaldon dhe Messin. Ka qenë ëndrra ime të luaj në La Liga dhe sot e kam bërë realitet ", shton më tej Uzuni. NIVELI I KAMPIONATIT SHQIPTAR DHE TIRANA NË CHAMPIONS Largimi nga Shqipëria ka bërë që ta humbë disi vëmendjen nga kampionati shqiptar, mirëpo në kohën e lirë gjithmonë nuk harron të ndjekë ish-shokët e tij. Në edicionin që lamë pas, veçon Tiranën kampione dhe Laçin për sezonin e bërë. Ndalet te bardheblutë të cilët do të luajnë në Champions League. Ferencvarosh kundërshtar i mundshëm, që Uzuni i njeh mirë. Beratasi është i bindur se bardheblutë kanë forcën ta kalojnë turin e parë. "Receta" e tij për Tiranën është: " Kam parë kampionatin shqiptar. Laçi ka bërë sezon të mirë. Edhe Tirana gjithashtu. Ata mund të luajnë kundër Ferencvarosh. Si mund t'i ndalin hungarezët? Kur hyn në fushë, janë të pranueshme të 3 rezultatet, si fitorja, si barazimi apo humbja. Mendoj se Tirana e ka forcën dhe kualitetin për ta kaluar turin e parë. Uroj të bëjë një paraqitje dinjitoze dhe uroj të ecë sa më larg !"

“YLLI” që erdhi nga sokakët e Beratit

Nga Retin Toka

Artikuj të ngjashëm Artikuj

Mission Complete! Shqiponjat shtegtojnë në Gjermani

Ermal Dredha/ Vlora pret Kombëtaren t’i dorëzojë Flamurin

“Uno kryqzimo”, kush është lushnjari që bëri “Gol” me banderolën

Aurora Dibra nxjerr nga “Kutia e Errët” historinë tragjike të jetës së saj

Myfarete Laze, rrëfim për një kohë të ndaluar

Dëshmorët nën dhe bërtasin: NDAL, TOKË E LYER ME GJAK

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

Aldor Nini, grabitqari i artit shqiptar dhe fjalës së lirë

Mario Ashiku, një dashuri, shanse të dyta dhe një jetë e jetuar bukur (si vetë ai)

Inva Mula: Unë sopranoja e parë shqiptare në skenat evropiane

“Uno kryqzimo”, kush është lushnjari që bëri “Gol” me banderolën

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?