Vishe siluetën tënde me ART

Maji ka hyrë dhe dalëngadalë po fillojmë të ndjejmë ardhjen e verës. Me pranverën ka lulëzuar gjithçka, lulet, bari, jeta, femrat… Tani le të fillojmë të lehtojmë pak veshjet dhe të nxjerrim në pah bukurinë femërore me fustanet, këmishat, pantallonat e lehta, funde, etj… Pranvera ndihet kudo dhe sigurisht na duhet një rifreskim i garderobës. Fillojmë me tentacionet e para, vitrinat  kudo na “thërrasin” me shumëllojshmëritë e koleksioneve të reja. Por sot dua t’ju flas për një firmë shqiptare, e ideuar dhe e punuar në SHQIPËRI, “HAND MADE BY LOVE”. E stiluar me mjeshtëri nga artistja JONI BRAHO, tashmë prej dy vjetësh me në fokus copat e pambukut dhe linot, të dekoruara me punime të bëra me dorë. Mos u mjaftoni me kaq, së shpejti do të kemi edhe disa produkte në xhins, por le t’ja lejmë kohës.

Fustane me rripa

Vera po afron dhe temperaturat e larta na bëjnë të “zhvishemi”. Por si është të “zhvishesh” me stil??? Në fotot e bashkangjitura me shkrimin, ju njohim me disa ide, për t’u veshur bukur dhe të ndiheni komfort në të njëjtën kohë. Një nga modelet e “HAND MADE BY LOVE”, janë fustanet me rripa, të këndshme, të freskëta dhe të disenjuara deri në detaj me qëndisje. Këto fustane janë të punuara me broden, me mënyrën artizanale, ku modeli vizatohet në copë dhe më pas qëndiset, duke u montuar copa në gjergjef. Të punuara me shumë kujdes dhe dashuri, për t’i dhënë unitetin që çdo vajzë me stil meriton të ketë, për tu ndjerë e veçantë dhe unike.