Të gjallët e Uzinës së Vdekjes

Uzina e Koksit në sytë e punëtorëve të saj. E ndërtuar në bashkëpunim me Kinezët në 1975 ishte vatra më e madhe vdekjeprurëse për punëtorët për shkak të nxjerrjes së gazrave të shumta toksike. Tre punonjës të Uzinës tregojnë vitet e tmerrit dhe problemet që kanë sot me shëndetin. Ata e konsiderojnë veten fatlumë që janë gjallë, sepse shumica e punëtorëve të kësaj uzine kanë mbyllur sytë përgjithmonë. Por tregojnë se për të punuar në këtë uzinë janë gjendur përballë presioneve dhe kërcënimeve: O në Koks, o në Spaç! Të gjithë zgjodhën fabrikën e Vdekjes, duke ecur në një rrugë që e dinin se ku do ti çonte…

Kur shohim filmin “Shokët”, prodhim i kinostudios “Shqipëria e Re” i vitit 1982, ka një pjesë në film kur inxhinier Genci, ecën në një platformë betoni dhe pas tij bien copa të mëdha metali të shkrirë në formë llave. Genci, që luhet mjeshtërisht në këtë film nga aktori i madh Vangjush Furrxhi që për të treguar hallin e sikletin e madh të sabotimit të linjës së re të prodhimit, heq e vendos në kokë kapelen e punës, tregon madhështinë e një fabrike që gjendet pas tij.