Tymi që nxiu Vlorën

Ish-fusha e Aviacionit në Vlorë deri në ’90 nxirrte pilotë; plot 1200 pilotë kanë kujtimet e tyre në atë vend që sot lëngon e nxin nga tymi i zi i plehrave të hedhura për 30 vite me radhë. Bashkia e Vlorës është e pafuqishme të menaxhojë e vetme situatën me plehrat në një qytet që shtohet si për nga banorët, e më shumë nga turistët. Pamjet apokaptike të shtëllungave toksike të djegies së plehrave që zgjatën 1 javë rresht, nxorrën në pah problematikat që përsëriten vit pas viti njëlloj, me të njëjtin angazhim nga pushteti vendor e qendror por pa asnjë zgjidhje konkrete. Kush e ka fajin për djegien e mbeturinave në Vlorë? A ishte një situatë e qëllimshme, apo papërgjegjshmëri e strukturave në menaxhimin e situatës?

Të enjten e 25 korrikut, kur gjithë qeveria, bashkia, qytetarët, zyrtarët, blogerët, gazetarët, intelektualët, kundërshtarët e yzmeqarët po publikonin foto nga Vlora e bukur, pikërisht nga Bypass i qytetit në një nga segmentet rrugore që të ofron një fushëpamje spektakolare si të lindjes së diellit ashtu edhe të Perëndimit të tij në Gjirin e Vlorës, duke kapur në aparatet e tyre të telefonit momentet magjike, –  një pamje agonike, thuajse apokalipstike u shpërfaq në dhjetëra kënde, nga afër e nga larg, për të prishur bukurinë.