Stres dhe festë, të gjithë duhet t’ia dalim!

Kemi hyrë në majin e aktivitetit më të madh sportiv që do të zhvillohet në Shqipëri. ‘Conference League’, një finale për kornizë që do të sjellë në Tiranë e në shkallët e stadiumit Air Albania me mijëra tifozë të huaj, të dy finalisteve, Romës dhe Fejnordit hollandez. Veç tyre, emra të njohur të futbollit botëror do të jenë në tribunë duke shijuar spektaklin. Në fushë, yjet e futbollit ndërkombëtar do të përballen në një ndeshje plot emocione.

Aty jemi edhe ne. Në sfidë me kohën për të sjellë një finale model. FSHF-ja gëlon përditë nga vullnetarët, ekspertët e policisë, të zjarrfikëseve, mjekëve, pastrimit, e deri tek shkresat poshtë e lartë me institucionet e shtetit.

Në kongresin e 46-të të UEFA që u mbajt në Vjenë në fillim të këtij muaji, të gjithë kthenin sytë nga tavolina shqiptare: A do kemi bileta? Kërkesa kalonte diku me humor e diku me batuta, ndërsa presidenti i FSHF-së, Armand Duka, takohej me të gjithë dhe garantote se gjithçka do të shkonte mirë. Më shumë sesa çështje biletash, të gjithë kishin merakun e atyre mijëra tifozëve, (dhe jo vetëm) që do të vijnë në Tiranë duke filluar nga 20 maji, a ndoshta kanë ardhur dhe më herët.