Spiunët e RTSH-së

Çfarë fshihet në dosjen me 500 faqe të ish-Sigurimit të Shtetit për RTSH-në, “fortesa” e propagandës komuniste. Rrëfimi i përkthyeses Janka Trifonov Selimi e përndjekur nga vetë kolegët e saj. Ish- kameramani i TVSH-së, Ilir Kasneci tregon se si “Komiteti i Partisë” kamuflonte togfjalëshin “Sigurimi i Shtetit” për çdo punë që bëhej në këtë institucion. Revista Newsbomb.al sjell pseudonimet e spiunëve dhe atmosferën e frikës brenda godinës që i ngjante “Pallatit të Ëndrrave”.

Ajo, një bullgare e bukur, një vajzë e re që kishte rënë në dashuri me një shqiptar kishte bërë një pakt me veten. Ishin vitet ’70 kur punonte në Radio Televizionin shqiptar, kalonte çdo ditë në të njëjtin koridor ku kolegët e saj mbanin jo vetëm emrin me të cilin i ishin prezantuar, por edhe pseudonimet: LEXUESI, KALTËRSIA, TIGRI, TAVOLINA E PUNËS, ARTISTI, BUTRINTI, I PENDUARI, QIELLI I KUQ, DANUBI, MORAVA, DAJTI, AJAKSI, GËRSHËRA, VULLNETI apo KRISTALI, si emrat që sot mund t’i quajmë zyrtarisht bashkëpunëtorë të Ish Sigurimit të Shtetit, apo edhe thjesht spiunat e kohës tiranike.