Shebenikë, në Parkun e Çuditshëm me “shi Yjesh” e Rrëqebull

Të gjithë në stinën e verës kanë më shumë interes që të zbresin në jug të vendit; ka të tjerë që marrin avionët për pushime luksoze jashtë vendit; shumë syresh në vapën e gushtit e mbajnë frymën drejt Korçës për festën e birrës apo lakrorit. Por pakkush kthen sytë nga një zonë e mrekullueshme, një pasuri natyrore e UNESCO, një vend të magjishëm ku mund të shohësh me mijëra yje që bien nga qielli e të duket se do të vijnë afër fytyrës. Eshtë parku kombëtar i Shebenikës, për të cilin, pak është folur, më pak është njohur, por që ka filluar në hapat e para të lulëzojë. Vetëm në tre muajt e parë të këtij viti, 10 mijë vetë e kanë vizituar. Shumë të tjerë po bëhen gati të shkojnë. Komuniteti lokal, bujtinat, po bëjnë punën e promovimin e tyre. Por më shumë, bashkia Librazhd, që nuk ndalon në asnjë moment të tregojë nëpërmjet guidave, punonjësve, e kujdestarëve se cilat janë gjërat e bukura dhe të veçanta që mund të shihen në një zonë ku ka edhe liqene akullnajore, edhe Ahe 300 vjeçarë, edhe specie në zhdukje si Rrëqebulli, por edhe shiun e yjeve Persoid. Ndaj, ejani ta zbulojmë nëpërmjet këtij reportazhi…

Imazhi i qiellit është një univers i madh, ku gjithsecili, ka mënyrën e vet të të parit të gjërave: orientohet atje për Yjet, për rrugët, fundja dhe për horoskopin. Sa herë na qëllon të themi me vete se “sot s’ka yje”. Madje, në qytetet e mëdha urbane, historia përsëritet shpesh.