Drama qytetarësh nën Durrësin e përmbytur

Prej 6 janarit 2026 kur durrësakët u zgjuan me shtëpitë e mbytura në ujë, kanë kaluar dy javë. Me qindra shtëpi “notuan” si asnjëherë më parë, qindra banorë u evakuuan. Përmbytjet e këtij viti shkaktuan edhe një viktimë. E prapë, qytetarët fajësojnë strukturat e shtetit të gjendura të papërgatitura për situatën e paralajmëruar. Emergjente është kthimi i qytetarëve në normalitet në familjet e tyre, më vonë, do të fillojë edhe nxjerrja e përgjegjësive. Por me dhjetëra gazetarë përjetuan të njëjtën fatkeqësi me qytetarët e përmbytur, duke qenë krah tyre, duke u futur në shtëpitë e përmbytura, dhe duke nxjerrë në pah dramën njerëzore të gjithsecilit; të njerëzve që me punë kishin ndërtuar ato shtëpi apo bizneset e tyre për të jetuar. Gazetari Isa Myzyraj sjell realitetin e zonës së Durrësit në ditën e përmbytjeve.

Shiu kishte nisur të binte prej orësh, i pandalshëm, si një vallëzim i egër mbi tjegullat e shtëpive dhe mbi asfaltin e lagjes 17 në Durrës. Dielli i 6 janarit ende nuk kishte lëshuar rrezet e para kur Shefqeti, një punëtor ndërtimi 55-vjeçar, u zgjua nga zhurma e ujit që lëkundej nëpër dhoma. Ai kërceu në dysheme, por këmbët iu futën në një ujë të ftohtë që i preu frymën.
“M’u duk sikur isha në det”, kujton sot, ndërsa ecën përmes dhomës së përmbytur. “Në një çerek ore m’u përmbyt i gjithë kati i parë”, përsërit ai me një zë të lodhur.