Sfidat dhe pritshmëritë 2025

Në fundviti të gjithë liderit politikë, por edhe qytetarët uruan njëri tjetrin për një vit të mbarë, të shëndetshëm dhe të suksesshëm. Urimet janë rutinë, por në fakt janë tre tregues për të cilët shoqëria ka dëshmpërimisht nevojë. Shanset për t’u realizuar janë utopike, ashtu si dikur slogani “E duam Shqipërinë si gjithë Europa”. Shqipëria nuk e ka mbyllur ende tranzicionin. 2025 pritet ta provojë këtë.

Më 11 maj 2025 do të ketë zgjedhje parlamentare. Janë zgjedhjet e para pas hapjes së bisedimeve për anëtarësim në BE dhe të 12-tat në 34 vjet, nga të cilat 7 janë fituar nga e majta (PS/PP) dhe 4 nga e djathta (PD). Fëmijët e lindur në mars 1991 sot janë 34 vjeç, megjithatë ndryshe nga sa ata kanë besuar dhe ndryshe nga shumica e vendeve europiane më 2025 do të duhet të zgjedhin përsëri midis dy politikanëve që janë në politikë prej viteve ’90, Edi Rama (tri mandate të plota si kryeministër) dhe Sali Berisha (dy mandate të plota si kryeministër, një si President). Për shkak të sistemit zgjedhor partitë e reja dhe të vogla nuk janë rivalizuese, ato luftojnë për mbijetesë. Prej 12 vitesh në pushtet PS është e konsumuar nga skandalet, lista e arrestimeve dhe atyre në pritje është e gjatë. Një mandat i katërt do të kishte vlerë vetëm për kryeministrin dhe raportin e tij personal me pushtetin. Thuajse e njëjta situatë edhe tek opozita. PD ka refuzuar reformimin dhe tiparet demokratike. Berisha pritet të dalë përpara togave të zeza, aleati i tij kryesor politik ndodhet tashmë në burgim, të dy me akuza për korrupsion.