Po na helmojnë, tonalata ushqimesh të skaduara shiten në supermarketet e Tiranës

Spinaq importi me pesticide, vezë me salmonelë, kofsha pule të mykura, mish viçi i pakontrolluar, djath i prishur apo i mykur; djath picash i skaduar; vaj vegjetal që shitet për gjalp; djath me vajë palme; brioshë nëpër pastiçeri që janë bërë me miell të mykur; bukë të tilla po ashtu; kripë e jodizuar jashtë çdo standarti, apo pasta të prishura; qumësht pa asnjë lloj kontrolli e mozarella të skaduara në vendet e tyre të origjinës; fara të zeza susam nga India që kanë përmbajtje helmuese e nuk duhet të tregtohen fare, çokollata të paketuara me data skadence të ndryshuara…

Djali i vogël nuk i ndalte lotët. Në qendër të Tiranës, në mes të supermarketit, aty ku dhjetëra njerëz shtynin karrocat ndërsa merrnin produktet e shportës së javës, vogëlushi i kërkonte të emës Kos. Ishte mesi i qershorit 2019 dhe nëna, e turpëruar përpara syve të të gjithëve që e shihnin, nuk ngurroi të plotësonte tekën e të voglit. Mori nga rafti një kos, e hapi, dhe me një lugë kauçuku tentoi t’ia jepte. Ç’të shihte. Ishte në një Qendër Tregtare në qendër të Tiranës dhe në një supermarket luksoz, por kosi, i mbyllur, kishte një shtresë myku.