Një histori diktature, Ernesti dhe Carla dashuria që shqetësoi regjimin

Dashuria idilike e Ernest Tushes dhe Carla Sferlazzo-s një nga ato lidhje rinore që partia e punës nuk i miratonte dot, madje i shkatërronte para se të rinjtë t’i jepnin ngjyrat që donin. Ajo, vajza e ambasadorit italian ishte “molla e ndaluar”. Burgu dhe ritakimi në liri.

Kisha dëgjuar shpesh për histori dashurie që jetonin kufijve që mbylleshin nga miqësitë e partive të punës kudo ku ishte përhapur komunizmi. Kisha dëgjuar për studentë shqiptarë që janë dashuruar në ish-Bashkimin Sovjetik dhe dashurinë e kanë lënë pas, ndonjëherë edhe ndonjë bebe që e gjenin të rritur pas dy dekadave. Por, kur dëgjova për historinë e dashurisë së Ernest Tushes me Carla Sferlazzo-n u mahnita nga pastërtia me të cilën dy të rinj asokohe i përjetuan ndjenjat pa shumë pengje, të guximshëm dhe akoma më ngjethëse ishte mirënjohja që kishin ata sot për njëri-tjetrin, që e vulosën në kujtesë si dashurinë e tyre idilike.

Kjo që do t’ju rrëfej sot është një histori si nëpër filma. Por, ajo që josh më shumë është pornografia me të cilën e trajtoi shteti i asaj kohe një kalendar dhuratë dhe se si sot në sytë e dy të rriturve që janë bërë gjyshër, kjo mbetet një histori e bukur që u burgos njëlloj si djali çapkën. Ata vazhdojnë të mendojnë se kjo është një histori e bukur! Aq të pastër e mendojnë dashurinë e asaj kohe, sa nuk ka vend as për një gricmë urrejtjeje kur kthejnë kokën pas.