Një ‘guximtar’ në qeverinë evropiane të futbollit

Asgjë nuk vjen rastësisht. Por mbështetja e madhe, 45 vota nga 55 shtete anëtare, i renditur i pari në listën e të votuarve, e vunë në qendër të vëmendjes së futbollit evropian presidentin e Federatës Shqiptare të Futbollit, Armand Duka. 4 vitet e kaluara, kishin pasur vështirësitë e tyre në vendimet e UEFA. Por Duka, kishte mbajtur profilin miqësor, të gjendshëm, një bashkëbisedues i jashtëzakonshëm e interlokutor në shumë raste. Edhe pse vinte nga një stinë e vështirë zhvillimesh brenda vendit dhe kishte pasur goxha mbështetje nga krerët e UEFA e FIFA, lobingjet, kanë efektet e tyre. Por ja që për Armand Dukën gjithçka vinte prej punës dhe personalitetit të tij “Hello my friend”, ishte shprehja më e zakonshme që dëgjohej në darkën Gala organizuar nga UEFA në Convento de Beato, në Lisbonë. Ishin përshëndetjet që i drejtoheshin presidentit të Federatës Shqiptare të Futbollit, Armand Duka. Aty nuk kishte luks të tepruar për një organizatë aq të madhe si UEFA. Të gjithë delegacionet transportoheshin me furgona e autobuzë nga hotel Corinthia, drejt vendit ku UEFA shtroi darkën zyrtare për delegacionet. Një vend i magjishëm që daton që në shekullin e 16-të, dhe madhështia, me salla gjigande e mure të larta fshihnin një lloj misticizmi. Në të kaluarën kishte shërbyer si një Konventë për murgjit, e në kohët e tanishme, vendi ishte kthyer totalisht për pritje zyrtare luksoze. I klasifikuar si “Godinë e mbrojtur për interes publik” që nga viti 1989, ka shërbyer si vendpritje për shumë delegacione ndërkombëtare. Që aty, (por jo vetëm) nisi një rrugëtim i sigurt. Thjesht, në mendjen e delegacionit shqiptar ishte marrja e më shumë votave sesa katër vite më parë. A do ta besonin Shqipërinë vendet anëtare të UEFA? Që në krye të herës, nën ritmet e muzikës portugeze përzgjedhur nga një bandë muzike të vendit, presidenti i federatës qipriote George Koumas, njëherësh anëtar i Këshillit të FIFA tregon sadisfaksionin e vet, merr nga krahët presidentin Duka dhe të dy, improvizojnë një kërcënim duke e kthyer skenën në një vend duartrokitjesh plot hilaritet nga të pranishmit. Dhe ashtu përqafuar e duke shtrënguar duart, hyjnë brenda. Pak më vonë aty Zbigniew Boniek ndalon dhe takohet me presidentin. Nuk vonon shumë dhe kreu i federatës italiane Gravina shkëmben përshëndetjet e radhës. Në sallën e madhe të mbrëmjes Gala, Armand Duka nuk ndaloi asnjë moment, me përshëndetjet për secilin nga vendet anëtare. Gianni Infantino i FIFA i jep një përqafim shumë dashamirës e mandaj Ceferin ndalon për të folur më gjatë. Aty në atë sallë nuk kishte ethe votimi. Ishin të gjithë aq miqësor me njëri tjetrin e salla gëlonte nga zëra që flisnin jo veç për futbollin. Në sfond, organizatorët ishin kujdesur të kënaqnin të ftuarit e rëndësishëm të futbollit me muzikën tradicionale, por edhe ushqimin tradicional. Suksesi për të nuk ishte përfundimtar. Edhe nëse dështonte e dinte se nuk ishte fatale. I rëndësishëm ishte guximi për të bërë përpara. Ecte me parimin se e dinte çfarë dëshironte. Të dëshirosh do të thotë të mbjellësh farën. E me eksperiencën prej vitesh, Armand Duka tashmë e kishte bërë këtë. Në Lisbonë të Portugalisë kishte një tjetër sfidë. UEFA u mblodh në Kongresin e 47-të për konfirmimin e presidentit të 4 viteve të ardhshme, por edhe anëtarët e Komisionit Ekzekutiv të këtij institucioni. Njësoj si titulli kampion, që nuk është i vështirë të fitohet, por të mbrohet, njëjtë ishte situata dhe për presidentin e Federatës Shqiptare të Futbollit. Ai do të luftonte për një mandat tjetër në këtë organ të rëndësishëm të qeverisë së futbollit europian. Në bindjen e tij jetonte besimi se do të ishte sërish pjesë. Në fakt të paktë ishin ata që mendonin ndryshe. Në 4 vite, Duka kishte bërë jashtëzakonisht mirë. Me presidentin e UEFA-s Aleksandër Ceferin dhe atë të FIFA-s Gianni Infantino, kreu i FSHF-së ka një kimi të pashpjegueshme që në krye të herës. Mbështetja e tyre ka qenë e pakufijshme. Dy njerëz të rëndësishëm të futbollit botëror kanë vlerësuar maksimalisht punën e bërë nga Armand Duka, një biznesmen i suksesshëm, i cili prej vitit 2002 vendos të kontribuojë dhe në futboll duke u zgjedhur në krye të Federatës Shqiptare të Futbollit. 5 prill 2023, dita e zgjedhjeve Të gjithë ishin bërë gati për tu nisur drejt Portugalisë. Presidenti Duka bashkë me sekretarin Shulku, kryetaren e futbollit për femra, Anila Bashën, përfaqësuesin juridik Aldi Topçiu dhe Erand Ibrahimin u nisën drejt Lisbonës. Misioni ishte i qartë: Shqipëria do të ishte pjesë e qeverisë europiane edhe për 4 vitet e ardhshme. Kreu i FSHF-së kishte lobuar mjaftueshëm. E dinte se puna e bërë për futbollin do të jepte frytet e veta. Megjithatë me atë nënqeshjen e tij të zakonshme nuk pohonte dhe as mohonte në asnjë moment se si do të përfundonte ajo Asamble e UEFA-s. Data shënonte 5 prill. Mëngjesi i asaj dite ishte i qetë, ndërsa në orën 10:00 ishte lajmëruar nisja e punimeve. Shqipëria kishte tryezën e vet me në krye, presidentin Duka. Optimizmi ishte ulur këmbëkryq me të gjithë delegacionin shqiptar. Megjithatë askush nuk e priste atë që do të ndodhte në përfundim të votimeve. Fillimisht fjalën e mori presidenti Aleksandër Ceferin që u konfirmua në krye të UEFA-s si kandidat i vetëm për këtë pozicion. Më tej nisën punimet për zgjedhjet, ku 55 shtete anëtare të këtij institucioni do të shkundnin votën e tyre për anëtarët e Komitetit Ekzekutiv. Ishin 11 kandidatë për 7 vende që do t'i bëheshin pjesë këtij organi të rëndësishëm të institutcionit të futbollit Europian. Komiteti Ekzekutiv, 11 kandidatë për qeverinë e futbollit europian Edhe nga rendi alfabetik, presidenti Armand Duka ishte ndër të parët në listë. Megjithatë rastësia donte që kreu i FSHF-së të ishte në vendin e tretë. Në krye të listës ishte Andri Pavelko nga Ukraina. Ndërsa më pas vinte Bjorn Vassallo nga Malta. Për të vijuar më tej me gjeorgjianin Levan Kobiashvili, Lise Klaveness nga Norvegjia dhe Luis Rubiales nga Spanja. Ndërkaq Jesper Moller Christensen (Danimarkë), Petr Fousek (Republika Çeke), Philippe Diallo (Francë), Hugo Quaderer (Lihteshtenj) dhe Rod Petrie nga Skocia. Të gjithë kandidatët besonin se kishin bërë mjaftueshëm për të zënë një vend në qeverinë e futbollit europian. Përfaqësuesi i Shqipërisë, Armand Duka ishte i qetë. Kishte vetëbesim të çmendur që do të merrte votat e mjaftueshme për t'i shërbyer UEFA-s, por edhe zhvillimit e promovimit të futbollit shqiptar. Dhe në fakt orët pasardhëse i dhanë të drejtë... Fundi i votimeve, fitore plebishitare e Armand Dukës Kutia ishte mbushur. Por, nuk ishte si ato Kupat që kur derdhet, "deti bëhet kos". Përkundrazi. Bashkë me numërimin e votave rridhte dhe entuziazmi në delegacionin shqiptar. Në fakt atë që po ndodhte nuk e kishte parashikuar askush. Madje as vetë presidenti Armand Duka nuk e kishte pritur. Në fund të numërimit, rezultoi se kreu i Federatës Shqiptare të Futbollit, jo vetëm që do të ishte pjesë e Komitetit Ekzekutiv të UEFA-s, por kishte marrë numrin më të madh të votave. 55 shtete anëtare, 45 prej të cilave kishin zgjedhur presidentin Duka. E jashtëzakonshme dhe e mrekullueshme njëkohësisht. Emocionet s'do t'i fshihte dhe kreu i FSHF-së: " Jam i kënaqur dhe i surprizuar, sepse nuk prisja që të isha më i votuari në kongres. Natyrisht marrëdhëniet tona me federatat e tjera, kanë qenë korrektë dhe ky vlerësim ka bërë që të ketë një mbështetje të tillë.Mbështetja është më e madhe se në mandatin e parë. Duke parë kontributin e katër viteve, ka qenë pozitiv, ashtu si edhe rezultatet. UEFA ka marrë vendime të duhura në kohën e duhur, në një periudhë të vështirë, siç ishte edhe periudha e Covid-it. Futbolli ishte sporti i vetëm që i mbylli të gjitha kampionatet gjatë kohës së pandemisë. Ishte një 4-vjeçar i rëndësishëm dhe i vështirë. Ishte Superliga, që është konsideruar si i dëmshëm për futbollin europian" . Presidenti Duka arriti të linte pas federata të rëndësishme si Spanja apo Franca. Rizgjedhja e tij si pjesë e Komitetit Ekzekutiv të UEFA-s tregon punën e mrekullueshme të bërë nga ai. Siç e cekëm më lart, "kimia" me presidentët Ceferin dhe Infantino nuk është rastësore. Njerëzit punëtorë dhe inovativë padyshim që vlerësohen, veçanërisht në arenën europiane. Gjithmonë i pranishëm në çdo punim apo kongres të UEFA-s. Zelli dhe dëshira për të çuar në dimensione të tjera zhvillimin e futbollit jo vetëm në Europë, por edhe në Shqipëri padyshim që kanë zënë sytë e të gjithë delegatëve të shteteve anëtare. Rezultati i zgjedhjeve për Komitetin Ekzekutiv Armand Duka fitoi garën në aspektin personal duke u renditur i pari në listën e anëtarëve të Komitetit të ri Ekzekutiv të UEFA-s. Dhe këtë e bëri me mandatin e dytë që iu dha mundësia. Pavarësisht problemeve në aspektin ekonomik-social në Shqipëri, UEFA si institucion demokratik tregoi edhe një herë se është kudo dhe kurdo në mbështetje të vazhdueshme të shteteve apo përfaqësuesve të tyre që duan të shkojnë përpara. Më poshtë iu njohim me rezultatin e votuesve për KE-në e UEFA-s. KANDIDATËT| NUMRI I VOTAVE Armand Duka (Shqipëri) 45 Jesper Møller Christensen (Danimarkë) 42 Petr Fousek (Republika Ҫeke) 40 Levan Kobiashvili (Gjeorgji) 40 Luis Rubiales (Spanjë) 40 Philippe Diallo (Francë) 37 Andrii Pavelko (Ukrainë) 31 ——————– Hugo Quaderer (Lihtenshtenj) 25 Bjorn Vassallo (Maltë) 25 Lise Klaveness (Norvegji) 18 Rod Petrie (Skoci) 15 Armand Duka, përfaqësuesi i futbollit për rajonin Armand Duka nuk ishte vetëm përfaqësues i Shqipërisë në atë kongres të UEFA-s, por i gjithë rajonit. Të gjithë mund të ngrejnë pyetje se si është e mundur që kreu i Federatës Shqiptare të Futbollit arriti të merrte më shumë vota se të gjithë. Në fakt këtë përgjigje s'e ka pasur as vetë presidenti Duka, teksa ka mbetur i surprizuar. Por, shtete si Kroacia, Turqia, Greqia, Kosova, Qipro, Italia, Mali i Zi, Maqedonia e Veriut dhe Serbia me siguri e kanë parë presidentin e FSHF-së si përfaqësues i denjë i tyre. Nuk ka ndonjë sekret apo kleçkë konkrete se si Duka ia doli të merrte më shumë vota se të gjithë. Asambleja e Përgjithshme e UEFA-s ishte një kongres i zakonshëm, ku si të zgjedhur të bënte vota. Presidenti Duka ka lobuar fort. Ka pasur gjithmonë mbështetjen e presidentit Ceferin, kjo për punën e mirë të bërë nga ai. Dhe rrjedhimisht kur besimi është i madh te kreu i UEFA-s, edhe tek ata që slloveni vlerëson. Natyrisht në vetëvete vota është një lobim i mirë dhe i suksesshëm, kjo e vërtetuar në gjithë botën. Edhe këtë herë presidenti Duka mbajti lart flamurin shqiptar në mes të Europës. Një triumf i merituar për punën që ka bërë veçanërisht në vendin tonë, duke ndryshuar fytyrën e infrastrukturës dhe promovimin në futbollin e moshave. Punë ka ende për të bërë jashtëzakonisht shumë, madje në gjithë rajonin. Finalja e Conference League, testi i vërtetë për Shqipërinë dhe Armand Dukën Finalja e Conference mes Romës dhe Feynoord duket se ka qenë provimi i vërtetë për FSHF-në dhe Armand Dukën. Presidenti pati bërë një punë të jashtëzakonshme derisa arriti ta sillte atë ndeshje madhështore në vendin tonë. Për shumë ishte e pabesueshme, por në fakt realiteti u ul këmbëkryq në jetët tona. Mbrëmja e 25 majit të vitit të shkuar ishte testi i vërtetë për Federatën Shqiptare të Futbollit dhe të gjithë institucionet qeveritare që u vunë në lëvizje për të organizuar në mënyrë europiane një finale të tillë. Ora 23:00, pra pas përfundimit të 90 minutave, Shqipëria ishte në çdo medie ndërkombëtare. Fjalët pozitive nuk munguan. Për herë të parë këtë e kishte mundësuar futbolli që në faqe të parë të ishte vendi ynë. Po, po kishim bërë të gjithë bashkë diçka të mrekullueshme. Një vend i vogël, me burime njerëzore të pakta dhe ekonomi shumë më të vogël se shtetet me potencial si Franca apo Spanja, kishte organizuar një finale të rëndësishme. Iniciuesi i gjithë gjësë kishte qenë Armand Duka. Kreu i Federatës Shqiptare të Futbollit mori notën maksimale nga të gjithë homologët e tij. Edhe fjalët pozitive të presidentit Aleksandër Ceferin nuk munguan. Përveç kënaqësisë që gjithçka shkoi mirë, ai ishte i lumtur që në krah kishte një njeri si presidenti Duka që dinte si të punonte dhe të finalizonte me sukses çdo detyrë që i jepej. Duka në KE, benefitet për Shqipërinë Zgjedhja e Armand Dukës në Komitetin Ekzekutiv (KE) të UEFA-s nuk është një lajm i mirë vetëm për futbollin dhe në veçanti për presidentin, por edhe për Shqipërinë. Vendi ynë i vogël me dëshirën e madhe për të pasur në tokën e vet turne të rëndësishëm ndërkombëtar, mund t'i bëjë realitet përgjatë këtij 4-vjeçari që Armand Duka është pjesë e qeverisë së futbollit evropian. Organizimi i turneve apo eventeve të rëndësishëm përkthehet ndryshe në të ardhura për Shqipërinë, futbollin që mund të përdoren për më thelbësoren, zhvillimin e infrastrukturës. Mjaftojmë të kujtojmë finalen e Conference League. Të gjithë u turrën për një biletë dhe të ardhurat që gjeneroi vendi ynë kapën shifrën e 140 milionë eurove. Votimi maksimal për Dukën, nuk është zgjedhje institucionale. Por, është një zgjedhje e një individi që përfaqëson një federatë. Presidenti është pjesë e rëndësishme të tryezës dhe si i tillë mund t'i sjellë gjëra pozitive vendit tonë siç ishte finalja e Conference League. Çdo lloj eventi ndërkombëtar i shërben veçanërisht futbollit, por edhe ekonomisë së Shqipërisë. Mandati 4-vjeçar, turnetë e synuara nga FSHF-ja Tashmë është bërë fakt juridik zgjedhja e presidentit Armand Duka si pjesë e Komitetit Ekzekutiv të UEFA-s. Kreu i FSHF-së kishte dëshirë për të qenë pjesë e tavolinës së këtij institucioni për të çuar deri në fund të gjitha objektivat në të mirë të futbollit në vend. Kësisoj, Shqipëria ka aplikuar për zhvillimin e Kampionatit Europian për moshat U-19. Ky kompeticion i rëndësishëm synohet nga presidenti Duka për t'u sjellë në Shqipëri. Por, nuk përjashtohet mundësia dhe për 17-vjeçarët. Megjithatë duhet theksuar fakti se konkurrenca është mjaft e fortë. Janë 15 vende që kanë bërë aplikimin. Ndërkohë Shqipëria po bën plotësimin e dokumenteve. Edhe këtë radhë, në FSHF janë optimistë se do të arrijnë të sjellin në vendin tonë organizimin e këtij turneu të rëndësishëm. Gjithashtu është aplikuar për të zhvilluar ndonjë kongres të UEFA-s në vendin tonë. Këtë e ka treguar ndër të tjera sekretari i përgjithshëm, Ilir Shulku që ka thënë: " Kemi aplikuar para disa muajsh për të gjitha kompeticionet që organizon UEFA duke filluar nga kongresi i UEFA-s. Shpresojmë që një nga kompeticionet e mëdha do ta marrim. Doja të theksoja më shumë se presidenti Duka, përpos votave, është një ndihmesë e madhe për Ballkanin. Është i vetmi kandidat nga Ballkani. Të gjithë miqtë tanë e kanë votuar bindshëm ". "Sekreti" i fitores së Armand Dukës Të gjithë dashamirësit e futbollit në vend mund të pyesin se si është e mundur që presidenti Armand Duka fitoi bindshëm në këtë kongres të UEFA-s. Aludimet janë nga më të ndryshmet. Por, shumë prej tyre harrojnë punën e jashtëzakonshme të bërë nga Federata Shqiptare të Futbollit. Shqipëria, falë FSHF-së tanimë ka një stadium modern si "Air Albania", një kompleks të mrekullueshëm pranë shtëpisë së futbollit. Qindra fusha të ndërtuara për zhvillimin dhe promovimin e lojës më të ndjekur në botë. Futbolli i fëmijëve, ai i vajzave, dy prioritetet kryesore të Federatës Shqiptare të Futbollit. Në fakt nuk ka një çelës për të zbuluar sekretin se si Duka fitoi në kongresin e UEFA-s. Është puna e tij që e ka bërë këtë. Përfaqësuesi i vetëm i Ballkanit ka marrë gjithë votat e miqve të tij. Përkushtimi prej më shumë se 20 vitesh në zhvillimin e futbollit në vend, zëri i fuqishëm në Komitetin Ekzekutiv, synimi për të çuar çdo detyrë në fund, janë karakteristika të një lideri. Dhe më shumë se kujtdo, mund t'i duhet një njeri i tillë? Padyshim që UEFA-s. Institucioni i futbollit europian ka shumë punë për të bërë. Politikat e UEFA-s gjithëpërfshirëse, e bëjnë të domosdoshëm pjesëmarrjen e Armand Dukës në këtë tryezë të qeverisë së futbollit. Madje në kanalin zyrtar e përshkruajnë: " Gjatë mandatit të tij si president, futbolli në Shqipëri ka dëshmuar disa suksese të rëndësishme, duke përfshirë ndryshime të mëdha në infrastrukturën e stadiumeve, ndërtimin e qendrave të reja stërvitore dhe selisë së re të shoqatës, si dhe kualifikimin e shkëlqyer të kombëtares shqiptare për në finalet e UEFA EURO 2016 ".

Një ‘guximtar’ në qeverinë evropiane të futbollit

Nga Retin Toka

Artikuj të ngjashëm Artikuj

Mission Complete! Shqiponjat shtegtojnë në Gjermani

Ermal Dredha/ Vlora pret Kombëtaren t’i dorëzojë Flamurin

“Uno kryqzimo”, kush është lushnjari që bëri “Gol” me banderolën

Aurora Dibra nxjerr nga “Kutia e Errët” historinë tragjike të jetës së saj

Myfarete Laze, rrëfim për një kohë të ndaluar

Dëshmorët nën dhe bërtasin: NDAL, TOKË E LYER ME GJAK

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

Inva Mula: Unë sopranoja e parë shqiptare në skenat evropiane

Nano, beteja e një jete

Mario Ashiku, një dashuri, shanse të dyta dhe një jetë e jetuar bukur (si vetë ai)

Arben Dervishaj: Ju rrëfej ditët e mia pa liri!

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Një ‘guximtar’ në qeverinë evropiane të futbollit

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?