Një fjalim jashtë që të kthen brenda

Kryeministrit  të Shqipërisë Edi Rama i ka mjaftuar një fjalim i mbajtur në Asamblenë e Këshillit të Europës, në Strasburg,  për të fituar një cikël reagimesh habitëse nga europarlamentarë dhe për t’u ringritur populisht në opinionin e brendshëm të mbarëshqiptarëve.  Protagonisti politik ia ka dalë të imponojë një axhendë të Shqipërisë zyrtare në Strasburg,  për një cështje e cila lidhet me rezolutën e dikurshme të këtij institucioni të lartë komunitar . Ai dokument u iniciua pas akuzave të ngritura në raportin e njohur të  “Dik Marty”, i cili akuzonte shqiptarët dhe vecanërisht krerët e lartë të ish-UCK-së për trafik organesh njerëzore dhe ekzistencën e një baze, për këtë qëllim, në Shqipërinë veriore e ashtuquajtur “Shtëpia e verdhë”. Ish prokuroria e Përgjithshme e Tribunalit të Hagës, zonja Carla Del Ponte e bëri edhe më të jehonshme këtë akuzë tronditëse ndaj shqiptarëve, përmes librit të saj “Gjuetia: Unë dhe kriminelët e luftës”.

Pas njëmbëdhjetë vitesh, kryeministri Edi Rama, me një kujdes dhe intuitë prej talenti politik, e riktheu në qendër të vëmendjes së Strasburgut zyrtar këtë cështje, por të strukturuar mprehtësisht si një brendi fjalimi, ashtu edhe si për një qëllim të parë dhe disa të tërthortë. Prej pak kohësh në Parlamentin e Shqipërisë është miratuar një rezolutë kundër raportit të dikurshëm të Asamblesë së KE. Më tej zyrtarisht nga ana e Shqipërisë si vend anëtar I Asamblesë kërkohet miratimi i një rezolute e cila zhbën atë të para një decade.