Nga torturat serbe te suksesi në fushë, historia e jashtëzakonshme e ekonomistit Granit Xhaka

E premte, data 2 dhjetor 2022. Ora shënonte 20:00. Emocionet ishin të mëdha. Kupa e Botës kishte nisur prej 2 javësh, por dukej se ajo mbrëmje ishte finalja e parakohshme për gjithë shqiptarët. Në fushë nuk rreshtoheshin kuqezinjtë, por dy futbollistë të mrekullueshëm. Granit Xhaka dhe Xherdan Shaqiri përballeshin me Serbinë. Me fanelën e Zvicrës veshur, ata kishin një ndeshje tjetër që do ta luanin me njëri - tjetrin. Vuajtjet nën lëkurë të familjes së tyre prej gjenocidit serb, padyshim që s'mund të harroheshin edhe në këtë sfidë sportive. Xhaka tregoi se është i pathyeshëm si Graniti dhe bashkë me Shaqirin ngritën flamurin dykrenar mes milionave të Katarit duke i treguar botës gjakun e shqiptarit. Natyrisht krenaria kishte pushtuar çdo familje në vendin tonë. Kudo dëgjohej të flitej për Granitin e veçanërisht për fanelën me mbiemrin Jashari që mbajti veshur pas ndeshjes. Kryefjalë në çdo mendje, sigurisht dhe në çdo medie. Të shumtë ishin ata që u dashuruan me gjestin e tij, vetëm mendjengushtët bënë ndryshe. Të arrije te Xhaka në këto ditë, ishte mjaft e vështirë. Ditët sensitive pasonin njëra-tjetrën, megjithatë dëshira për të mësuar jetën e tij ishte e madhe. Deklaratat dhe keqinterpretimi i tyre kishte bërë që disa ditë pushimi të relaksonin heroin e asaj nate bashkë me familjen në Dubai. Valmiri, miku-vëlla i Granitit në Katar Ndeshja Serbi - Zvicër u mbyll më së miri për dy lojtarët tanë shqiptarë. Shaqiri arriti të shënonte dhe bashkë me Xhakën bënë një festim spektakolar. FIFA u kishte ndaluar festën me shqiponjë, por ishte gjeniale ajo që shpalosën në fushë. Me trupat dhe duart e tyre, sikurse dy valltarë, "pikturuan" para botës atë që u ishte ndaluar. Valmir Mjaki ishte prezent në atë ndeshje dhe asesi s'mund të mungonte. S'mund të humbte momentin kur vëllai i tij, Graniti pati një "përshëndetje" speciale për pankinën serbe si dhe fanelën me mbiemrin Jashari, duke i kujtuar komandantin legjendar të UÇK-së. Fanela e Granitit ishte dhuratë për të. Kur u kontaktua nga revista Newsbomb, Valmiri çeli dyert e mikpritjes: " Më falni se kam qenë i n'zant. Emocionet ishin të mëdha. Granitin e kam mik të hershëm, si një vëlla në Zvicër. Unë isha personi që mora fanelën e ti" , tha fillimisht ai. I pyetur më pas të pasur disa rreshta të Xhakës, na tregoi se aktualisht ishte shumë i mërzitur për mënyrën se si ishin interpretuar veprimet e tij. Padyshim që në një moment të dytë do të mund të fliste. Mirëpo dëshira për të pasur një rrëfim të shkurtër, larg ndeshjes së Serbisë, pasi rrezikohej nga FIFA, sa vinte e rritej. Miq të afërm të tij, menaxherë të njohur të futbollit, u treguan të gatshëm duke bërë një urë lidhje të shkurtër me "shkëmbin" e Arsenalit, duke mbajtur larg në çdo moment ndeshjen me Serbinë. Vitet 85'- 90', vështirësitë e mëdha dhe burgosja e Ragip Xhakës Granit Xhaka u lind në 27 shtator të vitit 1992 në Basel të Zvicrës. Mesfushori shqiptar erdhi në jetë pak vite pas emigrimit të dy prindërve në shtetin në helvet. Vështirësitë kishin qenë të shumta. Graniti është i biri i Ragipit dhe Elmazes, dy njerëz që kanë bërë sakrifica të jashtëzakonshme për familjen e tyre. Janë njohur me njëri-tjetrin para 36 vitesh, atëherë kur jeta ishte më e vështirë se kurrë. 3 muaj pas lidhjes së tyre, në vitin 1986, Ragip Xhaka arrestohet nga ish qeveria Jugosllave pasi kishte marrë pjesë në një demonstratë në Beograd. Babai i Granitit dhe Taulantit nuk u dorëzua, përkundrazi pati mbështetjen e fortë të Elmazes që nuk e braktisi në ato momente të vështira. "E kam thënë dhe më parë. Kam shumë respekt për nënën time. Nuk kam dëgjuar kurrë që një grua të jetë me një burrë për 3 muaj dhe më pas ta presë atë për 3 vite e gjysmë. Është thjeshtë e mrekullueshme ", ka treguar Graniti. Ragipi u dënua me 3 vite e gjysmë burg, ku i lejohej të ajrosej vetëm 10 minuta në ditë. Me Elmazen kishin planifikuar prej kohësh arratisjen e tyre. Por, planin ia prishi pikërisht burgosja e Ragipit. Të dy s'u dorëzuan në asnjë moment, përkundrazi. E burri i shtëpisë, është ky idhulli nga i cili janë frymëzuar dy djemtë e shtëpisë. Këtë e thotë edhe Graniti: " Babai im ka qenë dhe është i jashtëzakonshëm. Ne e kemi idhull, që na mësoi të jemi të fortë për të ecur përpara në jetë. Kështu që ne u rritëm me këtë mentalitet ". Emigrimi drejt Suedisë, ndalimi dhe qëndrimi në Zvicër Ragipi e dinte se duhej të ishte shembullor në sjellje, në mënyrë që të lihej i lirë nga serbët. Dita-ditës sa vinte e bëhej më i fortë. Kishte një shtyllë të fortë ku të mbështetej, bashkëshorten e tij. Planet që kishin "thurur" para se të burgosej, nuk i kishte harruar. Përkundrazi. Edhe pse sistemakisht rrihej në burg si i dënuar politik, s'u dorëzua në asnjë moment. Pas 3 vitesh e gjysmë, serbët vendosën ta lironin duke mos e parë më si rrezik. Me të dalë nga burgu, ai takoi bashkëshorten e tij Elmazen. Ishte momenti për të bërë realitet ëndrrat dhe planet. Edhe pse ata kishin kaluar pjesën më të madhe të jetës së tyre së bashku në mjediset e zakonshme të kryeqytetit të vendit të tyre, Prishtinës, Ragip dhe Elmaze Xhaka nuk ishin aspak rehat. Ata kishin ëndërruar dhe për një familje, por siç dukej Kosova nuk do të mund t'ia ofronte atë dëshirë. Ndaj ishte momenti për t'u arratisur. Ashtu siç kishin bërë shumë nga bashkëatdhetarët e tyre, ata shkuan në kufi duke hipur në një autobus që do t'i çonte drejt veriut. Kishin dëshirë të mbërrinin në Suedi, teksa e shihnin si vendin e përshtatshëm për një jetë të re. " Për të përshkruar historinë e tyre, duhet të vlerësosh thellë atë. Ka momente që hesht dhe unë besoj se nuk na kanë treguar të gjithë të vërtetën. Kjo për të na kursyer disi mërzinë ", shprehet Graniti. Koha rendte pa ndjerë, bashkë me të edhe çifti Xhaka që panë disa vende të Europës derisa kur mbërritën në Zvicër. Aty ndaluan për të pushuar dhe takuan disa shqiptarë që i mikpritën. Do të ishte një ndalesë e shkurtër, por në fakt nuk rezultoi kështu. Pas këmbënguljes dhe ndihmës së bashkëatdhetarëve, Ragipi dhe Elmazja vendosën të nisnin jetën e re pikërisht në shtetin helvet. Ardhja në jetë e Taulantit dhe Granitit, jeta e re e familjes Xhaka Me t'u vendosur në Zvicër, Ragipi nisi menjëherë të punonte për t'u integruar sa më parë me pjesën tjetër të shoqërisë. U ndihmua shumë edhe nga shqiptarët që e bindën të qëndronte aty. Nuk zgjati shumë dhe pas një viti, erdhi në jetë fëmija e parë e familjes. Jo më kot thonë, që pas stuhisë, lind gjithmonë dielli. Ragipi dhe Elmazja zgjodhën ta quanin Taulant. Gëzimi ishte i ligjshëm, mirëpo familja kosovare donte të shtohej dhe me fëmijë të tjerë. Jeta në këtë mënyrë kishte nisur të merrte kuptim. Dhe në shtator të 1992-shit lindi dhe fëmija e dytë. Ky do të ishte i fortë sikurse babai, ndaj e quajtën Granit. " Taulanti ka treguar një forcë të madhe të të menduarit, jam rritur pikërisht me këtë veçori të tipit të tij ", tregon më tej Graniti për të vëllanë. Janë dy fizikisht, por veprojnë gjithmonë si një e vetme. Vëllezërit Xhaka, "binjakët" e futbollit zviceran Pasi ishin stabilizuar në Basel të Zvicrës, familja Xhaka kishte nisur dalëngadalë të hidhte tullë pas tulle për të siguruar të ardhmen. Me një forcë të jashtëzakonshme të Ragipit dhe mbështetjes së pakufijshme të Elmazes, ata ishin familja shqiptare model. Ndërkohë dy djemtë, Taulanti dhe Graniti u rritën. Veç edukimit që nuk mungoi në asnjë moment për ta, babai dhe nëna u kujdesen dhe për të ardhmen e tyre. 18 muaj ishte diferenca mes tyre. Ndaj kudo ishin të pandarë. Nëna Elmaze i vishte thuajse gjithmonë me të njëjtat rroba, saqë shpesh i konsideronin si binjakë. E kështu të pandarë, nisën dhe rrugën drejt futbollit. Taulanti ishte 6 vjeç, ndërsa Graniti 4 vjeç. Babai i regjistroi te skuadra e Concordia Basel, një klub amator në Zvicër që furnizonte me futbollistë gjigantin e Baselit. Veç mësimeve në sport, ata dhe po arsimoheshin. Në vitin 2002 ata u diplomuan në Akademinë e Baselit. Gëzimi ishte i madh për të dy prindërit, që në fillim kishin zgjedhur të fusnin djemtë në një skuadër futbolli, thjesht për t'i mbajtur larg rrugëve. Të dy shkëlqyen dhe ishin më të dalluarit në skuadrën e Baselit. Të gjithë ishin të bindur se nuk do të ishte e vështirë për ta që të penetronin në ekipin e parë të këtij klubi të madh në Zvicër. Rreziku i papritur i karrierës, ekonomisti Granit Xhaka E ndërsa luanin dhe shkolloheshin te Baseli, Granit Xhaka pati momentet më të frikshme të karrierës së tij. Në moshën 16-vjeçare, ai pësoi një dëmtim, ku fillimisht u mendua se fundi erdhi para kohe për të qenë pjesë e fushës së blertë. Madje dhe vetë Graniti po mendonte t'i futej seriozisht ekonomikut, për të cilin ka studiuar në Basel. Mosha dhe naiviteti prej fëmije, e kishte bërë të dorëzohej. " Në atë moment mendova të largohesha nga futbolli dhe të shikoja më shumë për punën që kisha studiuar, pra ekonomikun ", tregon ai. Megjithatë dëshira e familjes dhe këmbëngulja e trajnerëve bëri që i "pathyeshmi" të qëndronte sërish pranë sferës. Në fushë shkëlqeu, sikurse dhe në ekonomi ku filloi të punonte në moshën 18-vjeçare. Të gjithë miqtë e afërt e njohin si njeri të apasionuar pas shkencave ekzakte. Ka punuar në moshë të hershme në zyrë, pikërisht si ekonomist. E mrekullueshme! Talent në fushë, i jashtëzakonshëm në shifra. Ftesa e Botërorit U-17, Baseli ndryshoi jetën e mesfushorit Edhe pse me Taulantin ishin në një ekip, Graniti arriti të spikaste më shumë. Dëmtimi i tij erdhi pikërisht në periudhën kur Zvicra U-17 do të merrte pjesë në Botëror për këtë kategori. Përpjekjet e jashtëzakonshme bënë që të rikuperohej në kohë rekord dhe në moshën 16 vjeçare të ishte pjesë e përfaqësueses helvete. Fillimisht ishte në dyshim për të udhëtuar drejt Nigerisë. Por, dëmtimi i njërit prej shokëve të ekipit bëri që ai të grumbullohej. Në atë kompeticion, ai shkëlqeu dhe veç golave, dha disa asiste. Zvicra U-17 u shpall kampione bote. Graniti është i sinqertë dhe e thotë: " Në futboll të duhet shpesh dhe fat. Unë e kisha atë ". Në atë turne të niveleve të larta të futbollit botëror, ekipi i Baselit kishte qenë sy e veshë nga shqiptari. Asokohe, aktivizohej me skuadrën U-18. Ai Botëror ishte pikënisja e suksesit të madh të tij. Në sezonin 2010-2011 ekipi i parë i Baselit grumbulloi të dy vëllezërit. I pari që debutoi ishte Graniti. Dhe çfarë nisje... Zbriti në fushë kundër Debrecenit, në kuadër të kualifikuesve të Champions League. Në fitoren 2-0, ishte ai që vulosi rezultatin me golin e dytë. Performancat e tij njohën vetëm rritje. Vendi në formacion ishte i sigurtë, por jo për Taulantin që më vonë u huazua. Viti 2012-të nuk ishte i lehtë për të dy vëllezërit. Edhe Graniti donte një ndryshim rrënjësor në karrierë. Hapi i madh, transferimi në Gjermani Paraqitjet e mrekullueshme te Baseli kishin bërë që Graniti të ftohej nga Kombëtarja e parë e Zvicrës. Lëvizjet elegante në mesfushë nuk mund të fshiheshin më as për sytë e scouteve. Në ndeshjet e sezonit 2011-2012 ishin gjithmonë thuajse në tribunë për të ndjekur nga afër shqiptarin. Transferimi në një klub të madh ishte thjeshtë çështje kohe. Dhe nuk vonoi. Në vitin 2012 një ofertë tunduese nga Gjermania, lëkundi dhe dëshirën e Baselit që donte ta mbante. Në fund u dorëzua. Granit Xhaka u transferua te Borussia Monchengladbach. 8.5 milionë euro kishin paguar gjermanët për kartonin e tij duke firmosur një kontratë 5-vjeçare. Bundesliga ishte habitati i duhur. U maturua dhe u bë një lojtar i kalibrit europian. Padyshim një ndër më të mirët në Gjermani. Katër sezone në Bundesligë dhe u ndëshkua me 6 kartonë të kuq. Roli si shkatërrues shpesh herë zbehte elegancën në mesin e fushës. Udhëtimi i rrezikshëm i prindërve të tij duke marrë përsipër gjithë rreziqet e jetës, tashmë kishte rezultuar i suksesshëm. Djali i vogël i tyre ishte në zë të Evropës. Kishte lindur për të qenë lider dhe kështu bëri dhe në fushë. Një detaj interesant daton në sezonin 2014-2015, kur ai kishte luajtur disa javë me një brinjë të thyer. E mban mend dhe tregon se: "E harroja kur isha në fushë. E kisha mendjen vetëm të vrapoja për të marrë rezultate pozitiva. Doja të kualifikoheshim në Champions League". Dhe në verën e atij viti, ai u "gradua" si kapiten i skuadrës gjermane. Ishte vetëm 22-vjeç. Punonjësja e klubit gjerman, vajza që u bë bashkëshortja e tij E teksa vraponte pa pushim në fushë, Graniti ishte snajpër dhe jashtë saj. Duket se klubi gjerman kishte qëlluar si okazion për të. Pikërisht te Borussia Monchengladbach ai njohu Leonitën. Bukuroshja nga Kosova punonte në klubin gjerman. Qëndruan për 2 vite si të fejuar dhe në 2017-tën, zgjodhën të kurorëzonin dashurinë e tyre me martesë. Xhaka ishte serioz e pikërisht kjo ishte një nga veçoritë që e tërhoqi shumë Leonita Lekajn. Asokohe, ai s'do ta fshihte ndjenjën për bashkëshorten. Përkundrazi në rrjetet sociale do të bënte bujë me deklaratën e tij: " Topi i artë është një mrekulli, një grua e artë është një parajsë ". Graniti ishte edukuar se duhej të kishte një familje dhe këtë nuk ngurroi ta bënte një vit pas martesës duke sjellë në jetë vajzën Ayana. Në 2021-shin u bë sërish baba, pasi lindi vajza e dytë Lanyea. Gjermania ishte vendi që ndryshoi rrënjësisht jetën e Xhakës, jo vetëm nga ana profesionale, por dhe nga ajo sentimentale. Pas Bundesligës, Graniti do të provonte emocionin më të madh të sportit, duke u bërë pjesë e Premier League. Korrik 2016, lajm fantastik në familjen Xhaka Graniti dhe Taulanti i ndanë prej kohësh rrugët e tyre. Por, muaji qershor i 2016-tës do të ofronte një ndeshje të jashtëzakonshme për ta dhe familjen Xhaka. Zvicra do të luante me Shqipërinë në grupet e Europianit të Francës. Një emocion i mrekullueshëm. Graniti ishte pjesë e helvetëve, ndërsa Taulanti pjesë e kuqezinjve tanë. Babai Ragipi në atë kohë do të shprehej: "Taulanti me Shqipërinë dhe Graniti me Zvicrën, historia e vërtetë e familjes sonë", duke lënë të kuptohej kënaqësinë që djemtë e tij vlerësojnë origjinën dhe vendin që i dha mundësinë të rriteshin si qytetarë europianë. Pas një europiani të mrekullueshëm, për Granitin do të vinte lajmi i madh: Transferimi në Premier League. Arsenal e donte me çdo kusht shqiptarin duke paguar plot 46 milionë euro për shërbimet e tij. Prej atij viti e deri më sot, mesfushori zë një vend të rëndësishëm në ekipin anglez. Ai kishte shiritin e kapitenit, si dhe një nga lojtarët më të dashur për tifozët. Loja e fortë në mesfushë, bëri që Anglia të ishte terreni i përshtatshëm për të. Tashmë në moshën 30-vjeçare ka provuar shumë emocione të bukura me futbollin. E ndërsa babai i tij dikur luftonte për të pasur dhe krijuar këtë familje që ka sot, Graniti ka shkelur në gjurmët e tij. " E kam thënë pak historinë e prindërve. Ata filluan nga hiçi dhe pa to nuk do të isha këtu ku jam sot. Ata gjithmonë punonin shumë për t'u siguruar që unë të merrja atë që më nevojitej si këpucët, pajisjet sportive dhe gjërat e shkollës gjithashtu. Jam shumë krenar. Na edukuan me respekt dhe harmoni ", thotë shkurtimisht në rrëfimin e tij të shkurtër. Xhaka dhe shqiponja, Botërori "Katar 2022" I lindur për të qenë një kapiten, të tillë gjë e bëri edhe në këtë Botëror të organizuar në Katar. Një event i jashtëzakonshëm në një kohë të jashtëzakonshme. Fati i goglave e caktoi Zvicrën kundër Serbisë. Një sfidë mjaft emocionuese që për 90 minuta i bëri shqiptarët tifozë të helvetëve. E thënë më sipër, Graniti nuk ka pasur dëshirë të flasë më për këtë takim. E në respekt të dëshirës së tij, festa me Shaqirin dhe shëtija e fanelës së Jasharit në sytë e botës, ishin bukuria dhe korniza e asaj sfide të jashtëzakonshme, mbyllur me shifrat 3-2 për Zvicrën. Për fatin e keq, aventura e Xhakës dhe e helvetëve nuk zgjati shumë duke u eleminuar nga Portugalia. Por, Graniti e ka fituar Botërorin e vet. Bashkoi në Katar gjithë shqiptarët duke i treguar edhe një herë kujtdo kundërshtari forcën e shqiponjës dykrenare. FIFA s'e la të festonte, por ai gjeti mënyrën si ta bënte. As ligji, as maliqi, askush nuk kishte çfarë t'i bënte. E kjo ishte forca që ky djalosh shqiptar gjeti në mes asaj fushe me ngjyrë, që për të mund të jetë dukur pa ngjyra ndikuar nga kundërshtari serb. Nëse dikur vëllai i madh Taulanti rrihej me grushte mes Beogradit pa iu dridhur syri, i vogli "sakatoi" sportivisht dhe mendërisht "shkjaun" si për t'i treguar gabimet e pakthyeshme ndaj gjithë shqiptarëve. Kjo është historia e Granitit dhe familjes së tij. Ngjarje që mund të personifikojnë shumë shqiptarë që të ndikuar nga sistemi, përkrah vuajtjeve, gjetën forcën dhe dëshirën për të jetuar. Taulantët kurrë nuk do të zhduken, Granitët kurrë nuk do të thyhen!

Nga torturat serbe te suksesi në fushë, historia e jashtëzakonshme e ekonomistit Granit Xhaka

Nga Retin Toka

Artikuj të ngjashëm Artikuj

Mission Complete! Shqiponjat shtegtojnë në Gjermani

Ermal Dredha/ Vlora pret Kombëtaren t’i dorëzojë Flamurin

“Uno kryqzimo”, kush është lushnjari që bëri “Gol” me banderolën

Aurora Dibra nxjerr nga “Kutia e Errët” historinë tragjike të jetës së saj

Myfarete Laze, rrëfim për një kohë të ndaluar

Dëshmorët nën dhe bërtasin: NDAL, TOKË E LYER ME GJAK

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

Mario Ashiku, një dashuri, shanse të dyta dhe një jetë e jetuar bukur (si vetë ai)

Inva Mula: Unë sopranoja e parë shqiptare në skenat evropiane

Aldor Nini, grabitqari i artit shqiptar dhe fjalës së lirë

Nano, beteja e një jete

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Nga torturat serbe te suksesi në fushë, historia e jashtëzakonshme e ekonomistit Granit Xhaka

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?