Misioni i (pa) mundur, rrëfehet Edi REJA: Ju tregoj Shqipërinë time

“ Ciao mister ”, ishin fjalët e para të mia nga telefoni për Edi Rejën. Kishte pasur një ditë të lodhshme. Të shumtë ata që i kishin kërkuar intervista, të paktë fatlumët. Pasditja e zymtë e një shiu të pangopur e kishte zënë në Shqipëri, në Tiranën e zhurmshme. Edhe pse në krye të Kombëtares ishte zyrtarizuar trajneri i ri, Reja dukej se ishte dashuruar përjetësisht me vendin tonë. “ Jo, jo të lutem. Nuk mundem sot më për intervista. Një herë tjetër ”, ishte përgjigja lutëse e 77-vjeçarit që donte të pushonte. Por, dëshira ime ishte më e madhe. E doja patjetër intervistën me të. Kush e di sa e sa gazetarë mund të kishte kaluar në karrierën e tij. Jashtëzakonisht emocionuese. Shpejtësia e komunikimit më bëri disa herë të stepesha. Por, më në fund, edhe pse pa dëshirën e tij, ia dola. Ra në “grackë” duke nisur të përgjigjet, ndoshta pa vetëdije, por me lumturinë e madhe për të përshkruar momentet e bukura në vendin tonë për revistën Newsbomb.al. E gjeti ekipin tonë kombëtar pa kokë dhe ndoshta me këmbë disi të lodhura. Tashmë u largua duke lënë pas një skuadër simpatike, e denjë për t’u përballur me çdo kundërshtar. Ego-ja e tij do të kishte preferuar të çonte deri në fund misionin e një kualifikimi të mundshëm në arenën ndërkombëtare, por padurimi i sportdashësve arriti ta mposhte. Janar 2023, fundi i aventurës si trajner i kuqezinjve Gjithmonë kishte deklaruar se dëshiron të qëndrojë në krye të kuqezinjve. Shihte potencial në grupin e lojtarëve që kishte arritur të evidentonte. Mirëpo dëshira s’ecte paralelisht me rezultatet e kuqezinjve. Në fund të fundit, puna e një trajneri matet gjithmonë me to. Fundi i bashkëpunimit me ekipin tonë kombëtar përfundoi juridikisht në fund të vitit 2022, por u bë zyrtare nga FSHF-ja vetëm në fillim të 2023. Reja ka punuar fort, ashtu sikurse kishte mësuar në shkollën e vjetër të trajnerëve. Shqipëria ka zënë një vend të rëndësishëm jo vetëm në karrierë, por edhe në zemrën e tij. “ Nuk do ta harroj asnjëherë atë që kalova këtu. Përfundoi një cikël. Çdo fillim e ka një fund. Sigurisht që falënderoj të gjithë ata me të cilët bashkëpunova. Jeta dhe karriera më ofroi të njoh një vend që besoj se më dha shumë. S’mu kursye në asnjë moment dashuria dhe mbështetja nga ata. Do të jem gjithmonë i lidhur me këtë vend. Bëra më të mirën për ekipin përfaqësues ”, thotë ai që dukshëm emocionet e kanë tradhëtuar. Shqipëria, evidentimi i bukurive natyrore të vendit tonë Nuk kishte preferuar të qëndronte në Shqipëri, por e kishte vizituar shumë herë gjatë periudhës 3 vite e gjysmë që qëndroi në krye të Kombëtares. Shumë qytete i kishte parë e përpos bukurisë që i kishin ofruar, ishte surprizuar nga mikpritja e bërë. Nëse me një trajner mund të flasësh teknikisht, për Rejën kishin shumë rëndësi emocionet që vendi ynë i kishte ofruar. “ Kam vizituar shumë qytete në Shqipëri. Jam befasuar se si jam mirëpritur. Padyshim që ky komb është i mrekullueshëm. Unë nuk do ta harroj asnjëherë. Do të vij ta vizitoj shpesh. Unë do të jem gjithmonë i lidhur me këtë vend që edhe gjeografikisht është shumë i bukur. Shpresoj që edhe skuadra përfaqësuese të bëhet njëjtë me të ”, shprehet 77-vjeçari me urtësinë e moshës që ka dëshirë ta shohë ish ekipin e tij në nivele të larta. Ekipi kombëtar, ndryshimet brenda 3 viteve e gjysmë Shqipëria e Christian Panuçit ishte katastrofë në çdo drejtim. Elementët nuk mungonin, por italiani nuk u duk në nivelin që i duhej ekipit tonë kombëtar. Presidenti Armand Duka nuk ngurroi dhe menjëherë arriti marrëveshjen me një tjetër italian, pikërisht me Edy Rejën. Eksperienca e tij bindi kreun e FSHF-së për t’i besuar një mision të rëndësishëm. 77-vjeçari duket se ka pasur shumë punë me Shqipërinë. Nuk heziton, e thotë copë: “ Unë gjeta një skuadër me probleme. E kam thënë dhe më herët nuk kishte as krye dhe as fund. Punuam të gjithë si grup, bashkë me stafin teknik. Bëmë një punë të jashtëzakonshme. Arritëm të krijonim një skuadër me lojtarë shumë të mirë. Ndoshta disa gjëra do të mund të bëheshin ndryshe. Mund t’i kishim dhënë pak më tepër besim ndonjë elementi vendas. Megjithatë tani është vonë për mua ”, thotë ai duke kujtuar ndeshjet miqësore me Arabinë Saudite dhe Katarin. “ Mora përgjigje shumë të mira nga lotjarët që aktivizova. Tashmë kjo është e ikur. Silvinho (trajneri i ri) duhet t’i ketë në konsideratë ”, shton më tej. Armand Duka, marrëdhënia me presidentin e FSHF-së Ishte presidenti Armand Duka që kishte ekskluzivitetin e zgjedhjes së trajnerit të ri të Kombëtares pas largimit të Christian Panuçit. E padyshim emërimi i Rejës nuk ishte pa qëllim. Kishte shëtitur shumë skuadra europiane. Dhe në moshën 74-vjeçare mund të injektonte gjithë eksperiencën në ekipin tonë kombëtar. Besimi i dhënë nga kreu i FSHF-së ka krijuar një vend special në respektin e Edy Rejës. “ Më duhet ta falënderoj presidentin Armand Duka për besimin e dhënë. Mendoj se kam dhënë maksimumin me postin që m’u dha. Jam ulur me të pas ndeshjes me Islandën ku pësuam golin në fundin e takimit dhe kemi rënë dakord për të mbyllur gjithçka ”, shprehet ai për marrëdhënien me kreun e FSHF-së. Gjithashtu nuk lë pa përmendur edhe bashkëpunëtorët në stafin teknik: “ Më duhet t’i falënderoj ndihmësat e mi. Përmes tyre e kam pasur më të lehtë punën për drejtimin e Shqipërisë. E rithem që ndërtuam një skuadër të bukur ”. Lojtarët dhe pengu i Edi Rejës “ Kam kaluar shumë lojtarë te Shqipëria ”, kështu e nis analizën e tij për futbollistët e Kombëtares. Gjeti të “vjetër” dhe integroi të “rinj”. Por, kjo nuk i solli frytet që priteshin. Kthim pas nuk ka më. Ndaj për të duhet të shihet përpara: “ Ndërthurja e elementëve të rinj me ata që ishin më me eksperiencë në skuadër nuk pati shumë sukses. Ndoshta këtë do ta ndryshoja nëse do kthenim kohën pas, por kjo nuk ndodh më ”. A ka lojtarë të preferuar te Shqipëria? Jo, ai i vlerëson të gjithë për kontributin e dhënë. “ Çdo futbollist ka bërë mirë me skuadrën, sigurisht brenda potencialeve të tyre. Nuk dua dhe s’mund të veçoj asnjërin prej tyre. Ka pasur nga ata që më kanë ndihmuar për shkak të eksperiencës së tyre. Më lejoni të theksoj faktin se gjatë kësaj periudhe, nën drejtimin tim, kanë debutuar plot 40 lojtarë ”, shton më tej “mister” Reja. Gjatë kësaj aventure padyshim s’mund të mungonte edhe një peng për 77-vjeçarin. Çfarë do të donte të ishte ndryshe? “ Ndeshjet me Islandën i kam ende në mendje. Duhet t’i kishim fituar të dyja. Nuk ndodhi. Tani djemtë të shohin veç përpara ”. Sylvinho, trajneri i ri brazilian i Kombëtares Sylvinho u zyrtarizua si pasuesi i Edi Rejës në krye të Kombëtares. Braziliani nuk ka CV-në e italianit, por entuziazmi dhe mosha e tij e re e bëjnë ndoshta të duhurin për kuqezinjtë. Reja i jep gjithë mbështetjen e tij. Ai tregon se tekniku i ri ka gjithë potencialin e duhur për të bërë mirë. Megjithatë koha do ta tregojë. “ Kam folur pak me Sylvinhon. Mendoj se ka të gjithë potencialin që mund ta bëjë ekipin kombëtar ashtu siç të gjithë e duan. Mund edhe të fitojë, por nuk është kurrë e thjeshtë. Ai do të vijojë punën time. Do të jem i gatshëm t’i tregoj sa herë do të ketë nevojë ”, shprehet ai. Është i kujdesshëm kur flet për pasardhësin e tij, por dukshëm është pro lëvizjes së bërë nga Federata Shqiptare e Futbollit. A do të ketë sukses Sylvinho? Këtë përgjigje do ta japë vetëm fusha e blertë. Për Rejën duket zgjedhje pozitive. Shqipëria dhe EURO 2024 në “skanerin” e Rejës Shqipëria ka një nga skuadrat më të kompletuara në historinë e saj. Shumë lojtarë që luajnë në ligat më të mira europiane, me futbollistët plot cilësi. Me trajnerin e ri objektivi kryesor është kualifikimi në EURO 2024. Duket më se e mundur. Por për ta arritur, puna duhet të jetë sistematike. Edhe trajneri Edi Reja beson se kuqezinjtë kanë gjithë potencialin e duhur për të qenë pjesë e këtij kompeticioni të madh europian. “ Futbolli nuk është i thjeshtë. Shqipëria e ka potencialin për të fituar dhe për të qenë pjesë e EURO 2024. Megjithatë për këtë duhet shumë punë. Unë besoj se trajneri pasardhës e ka gjetur tryezën plot, me kuptimin që ka shumë elementë cilësorë. Gjithësesi e them sërish që nuk është e thjeshtë. Uroj që mungesat mos ta penalizojnë Shqipërinë. Ka një grup fantastik, më besoni !”, përfundon ai duke ngulur këmbë për mundësitë që ka ekipi ynë përfaqësues. Largimi nga Shqipëria, e ardhmja e italianit Të shumtë janë ata që besojnë se trajneri italian nuk e ka mbyllur me trajningun. Por, është vetë ai që i jep fund gjithë zërave të merkatos. Tregon se ka disa opsione. Por, jo më kot thonë se ëmbëlsira mbetet për në fund. E pikërisht Shqipëria i ka vënë “kapakun” karrierës së tij si trajner. Këtë e zbulon vetë për herë të parë, pavarësisht aludimeve në mediet italiane. “ Po, unë e kam mbyllur me trajnimin. Edhe pse kam mundësi të tjera që më janë ofruar, e kam mbyllur me Shqipërinë. Nuk mendoj të kthehem më në pankinë. Ndonjë rol tjetër edhe mund ta bëja, por të kthehem sërish në drejtimin e një skuadër nuk e besoj më ”, thotë Edi Reja duke treguar në këtë mënyrë se me Shqipërinë ka dalë në “pension” në aspektin profesional. Emri i tij ka dalë për disa ekipe në Spanjë dhe në Itali, por siç duket aventura me kuqezinjtë i ka dhënë fund edhe karrierës së italianit në krye të një skuadre futbolli. Prapaskenat me largimin Largimi i Edi Rejës nga drejtimi i kombëtares shqiptare fillimisht u bë si një telenovelë e vërtetë në vendin tonë. Nga Federata Shqiptare e Futbollit nuk kishte asnjë njoftim në lidhje me të ardhmen e trajnerit. Mediet raportonin se italiani ishte larguar, por një gjë e tillë nuk konfirmohej nga shtëpia e futbollit në vend. Megjithatë Edi Reja dhe Armand Duka e kishin vendosur prej muajsh. Si xhentilmenë të vërtetë, ata ishin ulur pas barazimit 1-1 kundër Islandës në Tiranë. Shqipëria po fitonte deri në minutën e 97-të, kur miqtë barazuan në “Air Albania”. Një gjë të tillë e tregon edhe trajneri i cili thotë: “ Pas ndeshjes me Islandën kam pasur një takim me presidentin Armand Duka. Jemi ulur dhe kemi vendosur që ta mbyllim ”, përfundon ai. Misioni i (pa)mundur i Edi Rejës Emërimi i Edi Rejës në krye të Kombëtares i ndau sportdashësit në dy kahe. Kishin nga ata që besonin te aftësitë e tij, ndërsa të tjerë ishin kundër. Drejtoi Shqipërinë për 3 vite e gjysmë, në një situatë edhe të jashtëzakonshme si qe Covidi. Pas përfundimit të ciklit të tij në krye të kuqezinjve, natyrshëm lind pyetja: A e kreu misionin ai? Përgjigja e tij në intervistë ishte e qartë: “ Gjeta një skuadër pa krye dhe pa fund ”, duke lënë të nënkuptohet se tanimë ka krijuar një skuadër plot identitet dhe të ardhme. “ Trajneri i ri e ka tryezën plot ”, shtonte më tej duke i mëshuar faktit se ka lënë gjithçka gati për të arritur te sukseset. Por, këtë do ta vlerësojë profesionalisht vetë braziliani Sylvinho. Personalisht mendoj se Edi Reja e kreu misionin e tij te Shqipëria. Arriti të krijojë një grup fantastik, shumë premtues për të ardhmen. Futbollistë që luajnë në nivele të larta europiane, gati për të dhënë kontributin e tyre në ekipin kombëtar. Riktheu identitetin e munguar në kohën e Christian Panuçit. Tanimë i mbetet Sylvinhos që të veprojë. “Kërcimtarët” janë, ai duhet t’i drejtojë në “sambën braziliane”.

Misioni i (pa) mundur, rrëfehet Edi REJA: Ju tregoj Shqipërinë time

Nga Retin Toka

Artikuj të ngjashëm Artikuj

ALTIN DUMANI, frika e të mbeturit vetëm

Gratë që tradhëtuan “Rilindjen”

Mario Ashiku, një dashuri, shanse të dyta dhe një jetë e jetuar bukur (si vetë ai)

Perëndesha Shqiptare e Spiunazhit botëror, historia e panjohur e Zejnep Vlorës

Qyteti Europian i Sportit, “pilula” dehëse e Tiranës elektorale

KRIZA e BABAGJYSHIT

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gratë që tradhëtuan “Rilindjen”

Perëndesha Shqiptare e Spiunazhit botëror, historia e panjohur e Zejnep Vlorës

PËR HERË TË PARË 95 vjet i “fshehur”, zbulohet fjalimi pro-komunist i FAN NOLIT

ALTIN DUMANI, frika e të mbeturit vetëm

Inva Mula: Unë sopranoja e parë shqiptare në skenat evropiane

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Misioni i (pa) mundur, rrëfehet Edi REJA: Ju tregoj Shqipërinë time

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?