Luna Djarmati, 12-vjeçarja e medaljeve të 'ujit'

Në sytë e saj shihej gëzim, por edhe emocion njëkohësisht kur u ftua për intervistë. Është lindur dhe rritur nga dy prindër të mrekullueshëm, ku arti qëndron këmbëkryq mes tyre. Mami Gerta, këngëtare dhe gazetare e njohur, babai Matko një ish-sportist që ka provuar majat në profesionin e tij. E dinin që suksesi do të ishte një trashëgimi e pashmangshme për ta, ku do të ecte paralelisht me jetën. Në fushat e tyre kanë tentuar gjithmonë të arrijnë piedestalin dhe ia kanë dalë. E për të vijuar traditën, në shtëpi po rritet një tjetër kampione. Luna Djarmati duket se ka marrë më të mirën e të dyve. Mosha 12-vjeçare e pengon për t’u zhveshur nga emocionet. Megjithatë ia del më së miri që në rrëfimin e saj për Newsbomb të tregojë përjetimet dhe ëndrrat prej një talenteje. Sikurse në pishinën e garave, tenton shpesh të parakalojë pyetjet përmes mendimeve prej një vajze të pjekur, për të qenë gjithmonë në krye. “Po punoj fort që një ditë t’ia dal edhe vetë financiarisht”, mes rreshtave Luna kuptohet qartë. Pasioni për notin shtyn përpara vizionin për të qenë në tapetin e artë të këtij sporti. Medaljet i ka rreshtuar në shtëpi, por për të është vetëm fillimi. Ka provuar shumë sporte, noti ishte dashuri me “prekje të parë”. “Si të thuash më ngjiti”, shprehet ajo duke treguar se prej gjashtë vitesh nuk e ka lënë më asnjëherë. Noti është terapi për të, është relaks, është vendi ku ajo gjen veten dhe kohën për të medituar. Askush dhe asgjë më mirë se uji s’mund t’i japë ndjesinë e një triumfatoreje. Në çdo garë futet me të vetmin synim: FITOREN! Ia ka dalë, ka arritur të befasojë trajnerë e sportistë duke thyer çdo parashikim. Ëndrrat i ka të mëdha, njësoj sikurse talentin. Punon ditë-natë për të qenë në formën optimale. Matko dhe Gerta kanë ndikimin e tyre në zhvillimin e saj. Në këtë rrëfim special, ajo tregon se si janë të dy prindërit për të. Madje zbulon se cili prej tyre është disi pak më i rreptë. Ka provuar edhe futbollin, por me vendosmërinë e ish mesfushorit luftarak babai e ka markuar duke e “nxjerrë” nga kjo lojë. Për të ngjarë edhe nga mami Gerta, ka tentuar skenën përmes këngës. Por, emocionet e kanë tradhëtuar. Dhe në fund ka zgjedhur t’i përkushtohet plotësisht notit, por jo vetëm... - Luna fillimisht më lejo të të falënderoj që u bëre pjesë e revistës sonë... Faleminderit ju! - Babai një ish sportist i njohur, ndërsa mami këngëtare dhe gazetare në Shqipëri. Pse zgjodhe pikërisht notin? Noti gjithmonë më është dukur si një nga sportet më të bukura. Unë të gjithë ato sporte që tentova, i lashë. Por, noti si të thuash më ngjiti. Në gjithë këto vite nuk e kam lënë asnjëherë. Edhe nëse kam probleme nga më të ndryshmet, uji dhe noti janë terapia ime për relaks dhe meditim. - Duket se ju jeni ndërthurja brilante e profesioneve të dy prindërve. A do të vijoni traditën e bukur familjare për të qenë në piedestalin e suksesit? Do të përpiqem në maksimum për të arritur sukses e t’i bëj prindërit krenarë. - A je gati të kalosh përtej karrierës fantastike që dikur babai Matko kishte si futbollist? Babai im ka pasur sukses në Kroaci e në Shqipëri, ku ka luajtur si profesionist. Unë dua të kaloj këto kufij e të provoj të kap Europën, pse jo edhe botën. -Më përshkruaj pak fillimet, përjetimet e mamasë dhe të babait... Në fillim unë shkova veç për të mësuar notin. Isha 6 vjeç. Mirëpo profesor Artion Laçi, i cili më ka mësuar të notoj, i tha prindërve që në 20 vite nuk kishte parë talent si unë. Ndaj na sugjeroi që ta ndiqnim. Dhe kështu, ata më mbështesin në çdo hap që hedh prej asaj kohe. - Në çdo vit fitoni medalje dhe garat e kampionatit Shqiptar. Cili është synimi yt? Në këto momente, unë dua të thyej një nga rekordet shqiptare në disiplinë time, garën me shpinë 100 metër. Objektivi tjetër janë garat rajonale dhe europiane. - Veç futbollit, sportet e tjera në Shqipëri duken se nuk e kanë vëmendjen e merituar. A i druheni këtij fakti për të ardhmen? Mendoj që jam me fat sepse kam mbështetjen e prindërve. Ata do të bëjnë gjithçka që financiarisht mos të më mungojë gjë e një ditë të stërvitem, pse jo, edhe jashtë vendit, ndoshta në Kroaci, apo diku tjetër. Jam shumë e vogël për të kapur një bursë, por synoj që një ditë të mos financohem vetëm nga prindërit e t’ia dal vetë. - Luna, gëzimi i parë i familjes. Dhe në fakt dukesh se je kopja identike e të dyve. Talent keni edhe në këngë, sikurse nëna juaj. A do vijosh paralelisht krahas notit edhe muzikën? Nuk besoj sepse jam pak e turpshme kur ngjitem në skenë. E kam provuar këngën, por nuk ndihem kaq e sigurtë sa në ujë. Kur jam në ujë, nuk e shoh publikun dhe kjo më pëlqen. - Po futbollin e keni provuar apo Matko është disi i rreptë kur vjen puna e profesionalizmit... Babi thotë që unë nuk kam shumë koordinim për futbollin. E kam qejf, por çunat e klasës më fusin portiere se jam e gjatë. - Tanimë është sezon vere dhe ku ka më mirë se të freskohesh në det. Na trego pak, si është kjo stinë për ty? Vijon stërvitjen apo preferon vetëm të relaksohesh duke notuar? Vijoj stërvitjen, por jo në det pasi nuk më pëlqen shumë stërvitja aty. Megjithëse bëmë ca pushime në plazh, në Qerret, unë kam shkuar për t’u stërvitur me pishinën Olimpike të Durrësit, 4 ditë të javës. Pra s’ka pushime sepse kemi kampionate përpara. - Në shkollë, si je me mësime? Noti ma ka vështirësuar pak shkollën, sidomos klasën e gjashtë ku u bëra me shumë mësues. Por, prapë gjej një mënyrë të studioj e të dal mirë me mësimë. Të gjitha notat deri tani, më kanë dalë 10-ta. - Përveçse një notare e shkëlqyer. Si i thua njerëzve: “Çfarë do të bëhesh kur të rritesh?” Mua më ka pëlqyer gjithmonë mjekësia, prandaj dua të bëhem një mjeke ose të paktën një studiuese e shkencës së mjekësisë. Jam shumë kurioze për dokumentarët për shëndetin. - Kush është më i rreptë për sportin, babai apo mami? Pyetje interesante. Të dy janë shumë të përkushtuar për notin tim. Babi përgjithësisht merret me stërvitjen time jashtë ujit, ndërsa mami është ajo që më çon në det. Mami është ajo që më motivon për të shkuar në not, ndërsa babi më lë të vendos vetë nëse dua ose jo të shkoj. Prandaj mund të zgjedh mamin si më të rreptë. - Cili ka qenë momenti më i vështirë dhe më i veçantë për ty në këtë sport? Ka pasur momente të shumta. Por, do të evidentoja kur kam fituar me vajza më të rritura në moshë, është një moment i bukur. Sidomos titulli, kampione e Shqipërisë për të rinj e të rritur që mora në prill. Kjo sepse unë jam vetëm 12 vjeç dhe mendoj që është arritje. Por, kam pasur edhe dy herë raste kur kam humbur ndaj një moshatareje dhe jam mërzitur shumë. Por, ky është sporti për të gjithë, me ulje dhe me ngritje. - Medaljet ke nisur t’i bësh stiv. Kur do të jesh gati për të na përfaqësuar në Lojërat Olimpike? Nuk jam shumë e sigurtë, por mendoj se mosha 17-18 vjeç do të ishte e posaçme pasi atëherë është koha kur notarët janë në kulmin e tyre. Unë e kam ëndërr të marr pjesë në gara Olimpike dhe shpresoj t’i arrij. - Kohët e fundit kishe nisur të praktikoje dhe futbollin, por Matko duket se nuk është i këtij mendimi. A je dakord me të? Po, e vërtetë. Por, e kam vënë re edhe vetë që nuk jam e fushës së futbollit. Unë kur luaj futboll, gjithmonë e humbas topin dhe kam një shënjestër të tmerrshme. - Cilat janë ëndrrat e tua? Siç e thashë më parë, unë dua që të shkoj në garat Olimpike. Është një ëndërr e vështirë për ta arritur, por me shumë punë mund t’ia dal. - Ju keni edhe një motër më të vogël. Do ta bëni edhe atë notare? Unë do të doja aq shumë që Matea të bëhej notare, por ajo është e interesuar në gjëra të tjera si atletika dhe muzika. - Për ta përmbyllur këtë intervistë të zakonshme me një notare të jashtëzakonshme? Dua që të them një mesazh që ma ka mësuar mami. “20 përqind është talent dhe 80 përqind punë. Talenti të çon deri diku, por pjesa tjetër është punë.

Luna Djarmati, 12-vjeçarja e medaljeve të ‘ujit’

Nga Retin Toka

Artikuj të ngjashëm Artikuj

Nano, beteja e një jete

Zonjat e “Prime Time”

Saga e dhimbjes e familjes MULLETI

LILI CINGU, KËMBËT QË VALLËZOJNË ENDE

Një “gjuetar goli” si Jasir Asani

Tigri nxjerr dhëmbët, drejton gishtin drejt Veliajt

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Tigri nxjerr dhëmbët, drejton gishtin drejt Veliajt

Gjiri i Kakomesë, “Bukuroshja” e braktisur bëhet gati për TURIZËM

MARK PALNIKAJ, INXHINIERI QË “ZHVARROS” ARKIVAT E VATIKANIT

Inva Mula: Unë sopranoja e parë shqiptare në skenat evropiane

Kombinimet e shtatorit dhe rikthimi në fëmijëri…

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?