LUIZA NË BOTËN E ÇUDIRAVE, MAGJIA E TRAJNERIT STËRMASI

Kur përmend Luiza Gegën, menjëherë pas saj vjen Taulant Stërmasi. Kampionja dhe trajneri i atletikës, nuk bëjnë profesionalisht pa njëri-tjetrin. Janë në simbiozë të vazhdueshme me orientimin e përbashkët, suksesin në nivele ndërkombëtare. Taulanti është kudo ku gjendet Luiza. Pikërisht ky është dhe çelësi i suksesit për vajzën nga Bulqiza që ka bërë për vete shqiptarët anë e mbanë botës. E pikasur që e vogël për talentin e saj në sportin e atletikës, Luiza zgjodhi të ndiqte rrugën e pasionit. Sot është kampione e Europës. Ka mposhtur këdo, veç katër afrikaneve për të cilat duket se ka ruajtur “armët” në garat pasardhëse. Njerëzit e suksesshëm nisin aty ku heqin dorë dështakët. E kjo është Luiza Gega, 33-vjeçarja që nuk u dorëzua asnjëherë. Përkundrazi, ndoqi dëshirat duke bërë realitet edhe ëndrrat më të pabesueshme. "Liza në botën e çudirave" ka bërë vërtetë mrekullinë. Ashtu si libri i mirënjohur i Luis Karol, ku personazhi në fjalë na fuste në një botë magjike duke treguar se asgjë nuk është e pamundur, edhe kampionja jonë bëri të njëjtën gjë. Vajza e thjeshtë nga Bulqiza sot është në "gojën" e Europës bashkë me flamurin shqiptar që valëvitet në majën e olimpit të suksesit kuqezi. 20 gusht 2022, dita e kampiones Ditë e martë. Në Shqipëri i kishin dhënë pak hapësirë, por ishte e mrekullueshme ajo që Luiza do të bënte në Gjermani. Gara ishte e vështirë. Ishte përgatitur prej kohësh dhe e dinte që kishte përballë rivale të fortë. Veç dëshirës për të arritur e para në finish, emocioni e kishte përshkruar të gjithën. Trajneri Taulant Stërmasi e kishte parandjerë suksesin e atletes së saj. Në një intervistë të veçantë enkas për revistën Neësbomb, ai tregon atë moment kur Luiza kaloi vijën e finishit e para. “ Në fakt nuk erdhi si surprizë për ne. Rezultatet kishin filluar që në fillim të vitit të ishin të mrekullueshme. Ne po shkonim drejt asaj që kemi pasur objektiv që në krye të herës. Ishte sportistja më e shpejtë dhe e Europës. Vetëm Afrika ishte para nesh. Gjitha këto na bënim të mendonim se do të dilnim duarplot nga gara e Gjermanisë. Dhe ashtu rezultoi. Emocionet ishin prezente, s’mund ta mohojmë. Kemi pritur gjatë për rezultatet e këtij niveli ”, tregon Stërmasi. Në të njëjtën linjë është dhe vetë “këmbëshpejta” që thotë: “ Jam shumë e lumtur. Arrita objektivin tim më të madh për këtë vit. Kisha shumë gara të suksesshme si kampione e dyfishtë Ballkani, kampione mesdheu, e 5-ta në botë dhe për ta mbyllur si kampione Euirope ku ishte dhe objektivi im më i madh. Jam shumë e lumtur dhe realizuar . E besoja se do të arrija këtu për faktet që t’i përmenda më sipër. Në botëror vendosa rekord kombëtar. Lashë pas vajzat nga Europa dhe vetëm 4 nga Afrika më kaluan. Kjo më dha më shumë besim dhe shpresë që me të njëjtin ritëm mund të dilja e para në kampionatin europian ”. Suksesi i Luizës, qeveria shqiptare në "këmbë" Kampionja shqiptare e atletikës kishte zënë kudo faqet e para të medieve në botë për arritjen e jashtëzakonshme. Në vendin tonë krenaria lindi vetiu me të marrë vesh suksesin e Gegës. Ishte njësoj si “Liza në botën e çudirave” e cila arrinte çdo gjë falë përkushtimit në çdo objektiv që vendoste. Një kampione duhet vlerësuar gjithmonë dhe në këtë rast qeveria shqiptare u kujdes që të trajtohej si e tillë. U prit me nderime që në aeroportin e Rinasit. Gëzimi është i ligjshëm për Luizën që thotë: “ Më erdhi mirë dhe u ndjeva e vlerësuar për pritjen që m’u bë. Kudo në botë sportistët vlerësohen me pritje të tilla nga drejtuesit më të lartë vendit. Më pëlqeu ajo që shijova për këtë vlerësim dhe doja të shijoja fitoren time pa e mbushur veten me mllef apo mërzitje pse nuk e bënë edhe dikur këtë gjë ”. Veç futbollit, sportet e tjera në vend nuk kanë aspak vëmendjen e duhur nga organet përkatëse. Megjithatë Luiza kërkon ta lërë pas këtë fakt: “ Gjithmonë kam pritur të bëhem një sportiste më e mirë që dhe shteti të kuptonte që ka edhe njerëz që e duan këtë vend. Kanë dëshirë të bëjnë diçka të mirë për vendin e tyre, sado e madhe apo e vogël qoftë ajo ”. Edhe në këtë rast, trajnerit Stërmasi i duhej të kujdeses për të. Luiza po shijonte suksesin, mirëpo regjimin ajo s’duhet ta linte pas dore. Kënaqësinë e pritjes nga qeveria s’e fsheh as Taulanti: “ Do të më vinte keq nëse s’do ta prisnin kështu siç ndodhi. Kam folur me Lizën dhe më ka thënë në orën 8 të mëngjesit që nuk kishte bërë as 2 orë gjumë. Ka marrë rezultate që nuk janë parë ndonjëherë në Shqipëri. Vendi i pestë në botë ”. Suksesi i Luizës në garën e Mynihut u vlerësua edhe në aspektin financiar nga qeveria shqiptare ku u akorduan 10 milionë lekë si shpërblim për të. Fëmijëria, çapkënja e familjes bulqizake Luiza vjen nga një familje relativisht e madhe. Ajo është fëmija e dytë teksa ka 4 motra dhe një vëlla. E lindur në Bulqizë, shumë shpejt familja e saj zhvendoset në Durrës. Luiza ishte një vajzë çapkëne dhe mjaft energjike. Kujtimet i ka të freskëta. Madje emocionohet kur kthehet pas në kohë për t’i sjellë të gjalla njësoj si atëherë. “ Eh ç’më bëre. Unë nuk di të ndalem kur nis të tregoj për fëmijërinë time ”, flet duke qeshur. “ Kam qenë fëmijë super aktiv, por tani që rikthehem pas në kohë kuptoj që kam qenë vërtet me ambicie. Mbaj mend që kisha shumë pasione. Bëja çdo gjë që të merrja maksimumin. I dedikohesha në maksimum ”, tregon më tej ajo. Të jesh sportiste në të tillë nivel, kërkon përkushtim dhe veçanërisht shumë energji. E këtë e konfirmon dhe ajo vetë: “ Lojërat te fusha e lagjes kanë qenë gjëja që bëja më shumë. Luaja me peta, topa djegësi, futboll, gara me biçikletë, që më ka bërë copë nga gjunjët. (Qesh) Kisha shumë imagjinatë. Ju bëja vello me copa e tyle që mamit nuk i duheshin ”. Jo vetëm sportiste, por duket se do të kishte të ardhme edhe për stiliste nëse nuk do t’i ishte përkushtuar atletikës. “ I bëja vërtetë bukur. Mamit i pëlqenin aq shumë sa i vendoste te tavolina e televizorit për zbukurim. Më pëlqente të bëja dhe poezi. Mbaj mend një bllok të vogël të kuq. E mbusha plot. Dhe këto i bëja gjithmonë në taracën e shtëpisë. Kishim shtëpi private dhe kjo më jepte luksin të gjeja rehatinë time. Më bëre nostalgjike. Ka pasur edhe nga ato momente kur zihesha për flokësh me motrat. S’di nëse duhet të qesh apo të qaj. Po të vijoj të flas për bëmat e fëmijërisë, nuk kanë fund ”, përfundon kampionja e Europës mes emocioneve. Atletika, fillimet e Luiza Gegës Kur ishte e vogël nuk kishte menduar asnjëherë se do të ishte sportiste profesioniste. Binte në sy për energjinë e madhe, nuk qëndronte kurrë në një vend. Nuk kishte menduar të zgjidhte një profesion, por jo më kot thonë që rastësia është mbret i botës. “ Nuk e zgjodha atletikën. Rastësisht e provova dhe ishte sporti që siç duket qëllova në shenjë ”, tregon Luiza. Por, kush ishte njeriu që pikasi aftësitë e saj? Një i afërm i saj ishte trajner te Mjeshtëria Sportive në Durrës. Karakteristikat e Luizës kishte arritur t’i shquante mirë. “ Kur isha në klasë të tetë, burri i tezes Azbi Dauti më tha ta provoja sepse shikonte natyrën time shumë aktive. Në shkollë dilja gjithmonë e para. Pranova menjëherë sepse me pëlqente të harxhoja energji. Por, edhe familja ime pranoi duke parë natyrën time energjike ”. Trajneri i parë ka gjithmonë merita. Në këtë rast një pjesë e suksesit i faturohet edhe njeriut të saj të afërm që po gëzon njësoj si familja e Luizës. “ Ai ndihet shumë i lumtur. Jeton jashtë vendit dhe më merr gjithmonë në telefon. Ishte pikërisht ai njeriu që më referoi te Taulant Stërmasi. Shkoi dhe bisedoi me të që të më pranonte te skuadra e tij ”, shprehet ajo. Rruga drejt profesionalizmit, takimi i parë me trajnerin Stërmasin Kudo që garonte në nivele amatore, Luiza ishte e para. Por, kishte ardhur momenti që t’i futej rrugës së profesionalizmit. Nuk e kishte menduar asnjëherë që do të arrinte të vraponte në nivele të tilla. Por, kjo do të ndodhte vetëm pasi të stërvitej nga një profesionist. Takimin e parë me trajnerin Taulant Stërmasin, Luiza e kujton saktësisht sepse lidhet me ditën e saj të lindjes. “ Kur fillova shkollën e lartë, vendosa të stërvitesha me profesorin. Kemi 15 vite që punojmë së bashku. Kam ardhur 19 vjeçe tek ai. Ka qenë data 5 nëntor. E mbaj mend sepse atë ditë kisha ditëlindjen. Mbushja 19-vjeçe. Kjo është arsyeja pse nuk e harroj kurrë ”, thotë fillimisht ajo. Asokohe Stërmasi stërviste sportiste elitare si Klodiana Shala, Admir Bregu e të tjerë. Fillimet e veta kanë qenë të vështira për Luizën. I duhej të fitonte vëmendjen trajnerit për të marrë pak kohë prej sportisteve të tjera. “ Pavarësisht se më pranoi në skuadrën e tij, nuk më kushtonte rëndësi sepse s’kisha rezultate aq të mira në atë kohë ”. Kjo nuk e zbehi dëshirën e Luizës për të parë përpara. E pikërisht kur vendosi të jepte maksimumin, Taulanti dalloi te ajo talentin dhe grintën për të ecur larg. “ Në fillim nuk e njihja fare se kush ishte Liza. E kisha parë në stadium, por ta shikoja si një super sportiste për t’u përzgjedhur. Në fillim isha në dilemë sepse duhet të investoja në një disiplinë tjetër që ishte 800 metra. Trajneri ka përgjegjësinë ta stërvisë në maksimum për të marrë më të mirën. Nuk ka qenë e lehtë për të. Erdhi si studente, në shtëpi me qera, ushqimi e të gjitha. Kishte një veçanti. Çdo ditë kishte progres. Nuk qëndronte asnjëherë në “pit-stop”. E rëndësishme është të kuptosh se çfarë do. Liza këtë e kuptoi ”, shprehet trajneri Stërmasi. Stërvitja intensive, kalimi i jashtëzakonshëm në sportiste profesioniste Fillimet e Luizës ishin si të çdo sportisteje tjetër në nivele amatore. Pista më e gjatë që kishte provuar ishte ajo e shkollës ku vihej përballë shokëve e shoqeve të klasës. Edhe pse ishte më e shpejta, gjithmonë preferonte të qëndronte në vend të dytë. Nuk e kishte menduar asesi se një ditë do të ishte në pedalonin e Europës. " Në shkollë garonim dhe unë isha gjithmonë më e shpejta. Por, preferoja ta mbyllja në vend të dytë për t'i lënë vend edhe të tjerëve ", thotë ndër rreshta Luiza. Edhe trajneri Stërmasi mban mend hapat e parë të Gegës: " Të shihnit Lizën e fillimeve të veta me këtë që është tani do të thoni si ka mundësi? Ka bërë një progres të jashtëzakonshëm. Është totalisht e tjetërsuar dhe kjo vetëm falë punës së palodhur nga ana e saj. Luiza është një punëtore e madhe, mban regjim të frikshëm gjatë gjithë kohës, pra fle me regjim, ushqehet me regjim, gjithë kohës bën terapi për t’u rikuperuar dhe qetësuar, që të nesërmen të jetë më e freskët. Nuk ka asnjë ditë pushim dhe të gjitha këto e bëjnë të arrijë këto rezultate gjatë të gjithë vitit, konstante, nga medalja në medalje dhe nga rekordi në rekord. Ajo sapo mbaron garën, bën “refresh” dhe kthehet përsëri në stadium për të vazhduar përgatitjet për garën tjetër ", tregon trajneri i saj. Peripecitë kanë qenë të mëdha dhe këtë kampionja aktuale nuk e fsheh. I është dashur të garojë "me bukë apo pa bukë" si studente që ishte. Një meritë të madhe ka Taulant Stërmasi që s'e la kurrë të hiqte dorë, përkundrazi e mbështeti. Ajo nuk harron të përmendë edhe familjen për suportin e madh nga fillimet e deri tani. " Familja më ka mbështetur gjithmonë. Nuk ka ndaluar në asnjë moment duke më dhënë kurajo. Por, sigurisht edhe trajneri im që vazhdon dhe sot. Ai besoi në talentin tim dhe më ndihmoi shumë, sidomos në vitet e para ku dhe grumbullimet i kisha të pamundura t'i përballoja. Isha njëkohësisht edhe studente. Jetoja në shtëpi me qera. Stërvitja kërkonte shumë shpenzime dhe ai ka qenë mbështetja më e madhe për mua ". Shpërblimet, motivimi i dyfishtë i Luiza Gegës Të jesh sportist në vendin tonë është sakrificë e madhe. Edhe pse në parim duhet mbështetur maksimalisht, shpesh duhet të futesh para nga xhepi sado profesionist të jesh. Megjithatë vitet e fundit politikat e qeverive në vend kanë nisur të ndryshojnë. Shpërblimet pas çdo suksesi janë pjesë e buxhetit të shtetit dhe fondet ndahen që në krye të herës. Pikërisht këto ndryshime duket si kanë dhënë tjetër marsh Luizës për të bërë maksimumin e vet. " Vitet e fundit kam qenë akoma më shumë e motivuar. Fillimisht ishin vendet e nderit që u vendosën nga Ministria e Arsimit dhe Sportit. Shpërblimi për kampione Europe nuk ka ndryshuar. Megjithatë ka pasur ndryshime të rëndësishme si për shembull shpërblimi për kampione Mesdheu është rritur, si dhe është vendosur një fond i veçantë për kampione Ballkani. E pranoj publikisht se janë dhe shpërblimet që më kanë tunduar për të bërë të gjitha këto gara. Kisha shumë vite që nuk garoja në kampionatin ballkanik sepse s'kishte asnjë lloj interesi. Nuk vlerësoheshe nga vendi yt për asnjë medalje që mund të merrje ", thotë krejt shkoqur dhe pa teklif Luiza Gega. Vështirësitë e kanë përndjekur për gjatë gjithë rrugëtimit të saj. Stërvitje sa në mal, sa në fushë, të gjithë këto me kosto financiare. Është detyruar të përgatitet dhe në kushte jo fort të favorshme për një kampione të niveleve të tilla. Mirëpo asnjëherë nuk hoqi dorë. Si ia ka dalë? E tregon vetë në këtë rrëfim krejt pa doreza. " Çdo vit rritesha më shumë në rezultate. Medaljet më jepnin shumë emocion dhe kënaqësi. Të heqësh dorë nga diçka është gjëja më e lehtë, por si natyrë nuk më pëlqejnë të "lehtat". Nuk dorëzohem kur e dua diçka shumë. Fillova gjithmonë e më shumë ta doja atë që bëja dhe e besoja se një ditë, pavarësisht çdo gjëje, mund t'ia dilja. Shikoja larg, e dija që për të qenë aty nuk ka kurrë zonë komforti". Luiza - Taulanti, marrëdhënia mes kampiones dhe trajnerit Janë njohur para 15 vitesh. Janë kudo së bashku sepse pa njëri-tjetrin, nuk do të ishin këto rezultate. Luiza stërvitet në mal, në fushë, në vende të nxehta, në zona të ftohta. Taulanti është aty pas saj. Por, si është marrëdhënia e tyre me njëri-tjetrin? Të bashkëjetosh profesionalisht s'është e lehtë. Ka momente që mund të mërzitesh, në ditë të caktuara mund të thuash: "Boll më se do të jetoj edhe unë". Por, kur mendon objektivin final, padyshim që tërhiqesh. Luiza është sinqertë në ato që thotë. Tregon se ka çaste që zihet me trajnerin Stërmasi, por në fund të ditës i jep gjithmonë të drejtë për këshillat e tij. " Taulanti ka një meritë të madhe në sukseset e mia. Megjithatë shpesh edhe debatojmë. Jo se kemi objektiva që nuk përputhen sepse për fat të mirë qëllimet janë të njëjta dhe për këtë jemi të qartë të dy. Por, duke qenë në këto nivele, vëmendja e trajnerit te detajet është e madhe. Këto e bëjnë diferencën për të arritur te medaljet ", shprehet fillimisht ajo. Të merresh me sport do përkushtim dhe sakrificë të madhe aq sa në shumë raste nuk ke kohë për asgjë. Edhe për Luizën ndodh kështu: "Atletika është sport individual dhe shpesh të duket sikur nuk merr dot frymë. Edhe në ato raste që dal rrallë me ndonjë shok apo shoqe, përsëri do të bjerë në telefon trajneri. Aty pastaj nis e dëgjo: " Mundohu mos të rrish shumë rrugëve. Nesër të pret një stërvitje e lodhshme. Duhet të ushqesh muskujt. Mundohu të hash mirë. Mos fli vonë, mos dil nga fokusi. Mos harro detajet sepse ato do të të bëjnë të arrish aty ku duam". Dhe shpeshherë irritohem. Ka shumë e shumë gjëra që debatojmë, por e theksoj jo nga mungesa e objektivit të përbashkët ". 15 vite pranë njëri-tjetrit, marrëdhënie profesionale apo dhe sentimentale?! Të qëndrosh kaq shumë me një person, nuk do të ishte çudi që në mes të lindnin ndjenja. Edhe sportistët apo edhe kampionët janë qenie të gjalla dhe mund të dashurojnë. A janë bashkë Luiza dhe Taulanti? Profesionalisht, po! Më se të lidhur. Por, sentimentalisht në rrëfimin për revistën Neësbomb nuk kanë një përgjigje absolute. Luiza është e prerë. Madje zemërohet kur pyetet drejtpërdrejtë për një marrëdhënie romantike me trajnerin e vet. Kishim përfunduar vetëm gjysmën e intervistës dhe kur e mora sërish në telefon, pyetja për Taulantin e kishte stresuar dhe mërzitur. " Dëgjo, unë kam vendosur mos të flas më. Më duket sikur po tentohem të trajtohem për vajzë shoë-bizi dhe jo për kampione ", ishte fjalia që dëgjova nga ana tjetër e telefonit. Instikti i gazetarit më shpejtoi ta zgjidhja menjëherë me të. Ishte e udhës që përgjigjen për çështje të tilla sensitive ta merrja vetë nga ajo për të mos aluduar siç është bërë në media të ndryshme. Megjithatë përgjigjen që kërkova prapë s'e mora. Ndryshe situata me trajnerin Stërmasi. Ai foli hapur pa u mërzitur për p. " Njerëzit aludojnë sepse nuk e kuptojnë sportin siç është, siç duhet, siç është. Gazetarët sportivë kanë fokus futbollin dhe i kanë harruar këto sportet e tjera. Po të vish me mua në grumbullim mund të kuptosh se çfarë ndodh në sport. Çdo sportist që shkon në grumbullim, ikën me trajner. Sporti nuk bëhet ndryshe. Për shembull kur shkojmë në grumbullim në Kenia, gjen 200 sportiste me të paktën 70 trajnerë. Aty rrijnë të gjithë së bashku. Unë kur shkoj në grumbullim marr 3-4 sportiste për të provuar elementë të rinj. Ne jemi kaq të lidhur, saqë nëse do të kishte diçka, do e tregonim. Por, kur nuk ka asgjë. Ç'a ka këtu në këtë histori? Më vjen keq që përflitet sepse unë jam burrë dhe nuk kam kështu problemesh. Më vjen keq që përflitet sepse përflitet Liza. Ndërkohë ajo mund të ketë një jetë të veten. Dhe nuk ka pse të dyjëzohet kjo histori mes trajner sportist apo një marrëdhënie tjetër ". E ardhmja, objektivat e kampionës së Europës Luiza Gega nuk do të ndalet këtu. Medalja e artë si kampione e Europës duket se do të jetë vetëm fillimi i një suksesi pa kufij. Një ditë pretendon që të mposhtë dhe sportistet nga Afrika, që gjenetikisht duken të lindura për atletikë. Megjithatë kur e synon mund t'ia arrish. Si Luiza dhe Stërmasi objektivin e kanë të njëjtë. Çdo ditë shohin vetëm përpara. Punë, punë dhe vetëm punë. " Kemi dy vite shumë të rëndësishme, në 2023-shin kemi Botërorin që bëhet në gusht në Hungari, ndërsa kulmi do të jetë Olimpiada në vitin 2024, ky synojmë surprizën e madhe, bashkë me Europianin, ku do të shkojmë për të ruajtur fronin e kampionit ", tregon trajneri Stërmasi.

LUIZA NË BOTËN E ÇUDIRAVE, MAGJIA E TRAJNERIT STËRMASI

Nga Retin Toka

Artikuj të ngjashëm Artikuj

Beteja e Tiranës, kush do sfidojë Veliajn dhe pushtetin?

Jozefina Topalli rikthehet: Lul Basha, të flasin ata që e njohin para 2005!

Ergys Verdho: Asnjë panik, KESH do garantojë DRITA 24 orë

VIS MARTINAJ në kërkim të “MBRETIT” TË KUMARIT

“Mbreti” Ilir, gjeniu me stofin prej Kampioni

Dosje dhe intriga/ A po luhet për shefin e Opozitës

Artikujt më të lexuar

VIS MARTINAJ në kërkim të “MBRETIT” TË KUMARIT

Fotot dëshmi/ Nën rrënojat e shtëpisë së Nexhmije Hoxhës: Nga moda sovjetike, tek ftesat e dasmës

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Si u vra një nënë që kërkonte në polici vrasësit e djalit

Beteja e Tiranës, kush do sfidojë Veliajn dhe pushtetin?

Jozefina Topalli rikthehet: Lul Basha, të flasin ata që e njohin para 2005!

Po vjen stuhia e dhimbshme ekonomike, si dalim nga kriza?

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

LUIZA NË BOTËN E ÇUDIRAVE, MAGJIA E TRAJNERIT STËRMASI

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?