Luftë dhe spiunazh, një histori e pabesueshme në Gjirokastër

“Darka e gabuar” e Ismail Kadaresë zhvendos ngjarjet në qytetin e gurtë të Gjirokastrës kur për një moment, regjimi komunist pretendonte se mjeku shqiptar Dr. Gurameto mund të zbulonte çelësin e komplotit të vrasjes së Stalinit. Por përtej të pabesueshmes të historisë së këtij romani, në kohën e luftës, në qytetin e gurtë, pretendohet një histori spiunazhi që përfshin disa personazhe interesante dhe të panjohur për publikun, por me lidhje të shumëfishta.

Spiridon Grima ishte një 58 vjeçar nga Malta por me shtetësi britanike i cili kaloi 5 vitet e luftës në Gjirokastër dhe drejtonte aty një fabrikë të prodhimit të duhanit. Mirëpo, për komunistët e sapo ardhur në pushtet në 1944, ai ishte një agjent i Gestapos gjermane. Ngjarja merr nota misteri për shkak të një hetimi që i bëhet shtetasit të pazakontë që jetonte në Gjirokastër, por edhe ndërhyrjes së britanikëve që në një kohë rekord e marrin Spiro Grimën dhe e evakuojnë në Itali brenda një 1 muaj pas çlirimit të vendit.