Listë hallesh për 11 Maj, Quo Vadis PD?!

Kur mesnata e 12 marsit afron, prozhektorët drejtohen tek selia blu për të parë se cilët emra janë në ato dosje që nisen drejt KQZ. Reagimet e para pas publikimit, folën për zhgënjim. Në zonat e sigurta janë “të vjetrit”, më të konsumuarit, në pjesën e hapur ku do luftohet për çdo votë e ku shumë pak do ja dalin, janë “të rinjtë”, më premtuesit e portretet më frymëzuese. Ku shkon PD me këtë përmbysje, dhe cilat janë llogaritë që ka bërë Sali Berisha. Një raport i detajuar nga revista Newsbomb.al. Fjala deja-vu, përdoret dendur për të përshkruar disa fenomene, ngjashmëritë e ngjarjeve që ndodhin sot me ato të shkuarat. Zor se gjendet një situatë më ideale për ta vënë në jetë këtë cilësim, sesa me listën e kandidatëve të Partisë Demokratike për deputetë. Jo vetëm nga përmbajtja, por sidomos nga mënyra se si shkohet aty. Eshtë një jurist tjetër ai që mban disa dosje kuti në duar kësaj radhe. Franc Nuri, të cilin kamerat e shumë televizioneve të pranishme e kapin teksa po afron mesnata e 12 marsit, afati i fundit për regjistrimin në KQZ. Më parë, në të njëjtin vend, në të njëjtin koridor, në të njëjtën kohë ka qënë Ivi Kaso. Edhe pse opinioni pak a shumë ishte përgaditur për këtë listë të PD, sërish publikimi i saj u prit me një lloj padurimi, dhe debatet, kritikat, kontestimet, mallkimet, lëshohen menjëherë. PD mesa duket nuk mundet të bëjë një listë me emra për deputetë që të jetë e kënaqshme. Mbërthim radhësh Po ta shohësh me kujdes, lista e PD ka dy kritere. Lufta dhe qëndrimet e ashpra ndaj qeverisë, dhe luajaliteti me Sali Berishën. Sidomos në Tiranë dallohet dhe futja në vagon e valixheve të aleatëve, një detyrim i pashmnagshëm mesa duket për Sali Berishën. Duke pasur shumë kufizime, lideri demokrat me gjasë ka zgjedhur të bëjë deputetë të sigurtë ata që do të qëndrojnë aty ku janë, pa surpriza, edhe pas 12 majit. Ata që e mbrojnë listën, thonë se kemi të bëjmë me një përfaqësim politik ku guida janë statuti dhe aleatët. Ata që e kritikojnë e kanë më të lehtë, pasi në atë dymbëdhjetëshe është stofi i vjetër i PD, dhe nuk ka asgjë të re, nuk ka mister, nuk ka diçka ndjellëse për elektoratin. Duket sikur PD e ka humbur mekanizmin e vetëkorigjimit, pas shumë disfatash, ku në një farë mënyrë populli i thotë vazhdimisht që duhet të ndryshojë. Gjë që demokratët në kupolë, nuk po e bëjnë. I vetmi ngushëllim ngelet, nëse vërtetë kjo është një lloj strategjie. Sali Berisha ka vendosur që ata të cilëve u detyrohet, më besnikëve, më luftëtarëve, t’i arkivojë aty te zona e sigurtë, dhe në fushatë, në publik, në media të shfaqet me emrat e fytyrat e listës së hapur. Nëse ndodh kjo, më të sigurtët në një farë mënyrë bëhen “kurbanë”, të heshtur, të padukshëm, ndërkohë që kuajt e fushatës, dhe motorri i 11 Majit 2025, bëhen emra e njerëz që janë në listën e hapur, ku ka me të vërtetë personalitete të spikatura dhe të rinj, ata që aq shumë kërkohen sot në politikë. Po të jetë se kjo është strategji, ndoshta mund të japë efekt, dhe skeptikët do të kutojnë se doktori paska pas një formulë të mirë. Zbehja e primareve Pavarësisht sesi shkoi, si u formulua, njëzëri pranohet se primaret u zbehen. E trumbetuar si risi, si një standart i ri që PD vendosi në politikën shqiptare, ky moment pati një kulm me procesin e votimin masiv që ndodhi me 1 mars. Pas këtij procesi, ndriçimi sa vinte e zbehej. Qe i pari Berisha që lajmëroi këtë zvetënim, kur tha se rezultati i primareve është vetëm një nga kriteret që do të merrej në konsideratë për caktimin e emrave. Dhe nuk vonuan bombat e para. Më i votuari në Qarkun e Tiranës, Hysen Kadiu, dhe më i votuari në Qarkun e Elbasanit, Dash Sula, nuk u futen në listat e sigurta. Kadiu, kreu i degës në Kavajë, dhe shumë i afërt e bashkëfitues le ta quajmë me kryebashkiakun Fisnik Qosja, nuk e pranoi këtë zgjedhje, këtë vendim të Berishës, e u tërhoq nga gara. Me gjasë dhe nga fushata. Ndërsa Dash Sula, një faktor në një zonë si Peqini, pak para skadimit të afatit, kaloi në ekipin e Adriatik Lapajt, dhe kandidon për ta në Elbasan. Ka edhe disa raste kur primaret janë konsideruar, si në Durrës, apo dhe në rastin e prurjes së re në Elbasan, Klodiana Çapja, e cila u caktua në vend të deputetes me kontribute, mjekes Zheni Gjergji, një zonjë që gëzon shumë vlerësim e simpati në qytetin e Normales. Në përgjithësi mund të thuhet se primaret patën efekt penalizues. Pra kush nuk pati sukses aty, nuk ja doli të konsiderohej. Mjafton këtu të përmendim rastin e Floriana Garos, një prej bashkëpunëtoreve më të afërta të Doktorit. Ky status nuk e ndihmoi të ishte në listë, pasi në primare ajo u ndëshkua. Pra, primaret ishin penalizuese, por nuk ja dolën dot të ishin promovouese e garantuese të ecjes së sigurtë drejt legjislaturës së ardhshme të Kuvendit. “Dobësimi” i Gazment Bardhit Në këto lista vihet re se ka një dobësim të Gazment Bardhit. Nga fundi i vitit të shkuar, kur ai vendosi të bashkohej me Sali Berishën, pati pak a shumë 17 mbështetës, deputetë që ishin pasues të tij. Me këtë ndikim, ai arriti të bëhej shumë faktor në atë kohë, dhe t’i imponohej kryetarit të PD. Në fillim, ja doli të ishte vetë, dhe të merrte dhe 3 drejtues të tjerë politikë, nga 12 që ka PD në qarqe. Më tej, pesha dhe roli nisi të zbehej, pasi rrezatimi i Berishës dhe pushteti i tij e bën këtë efekt. Po të shohësh listën, sot Gazment Bardhi mezi ja ka dalë të “ketë” 2 deputetë të tijët në zonën e sigurtë. Saimir Koreshin në Lushnje dhe Bledion Nallbatin në Korçë. Përpjekjet e tij mesa duket nuk patën rezultat për Jorida Tabakun, apo Zheni Gjergjin. Ose Dhurata Çupin. Politika është makineri shtypëse dhe është e vështirë të ruash një fluks ose një pushtet paralel, kur në krye është dikush si Doktori. Bardhi dhe të tijtë e patën rastin e artë të merrnin maksimumin në fund të vitit të shkuar, kur Berisha kishte nevojë jetike për ta. Më tej, çdo gjë kthehet në kronikë e rutinë. Aleatët Detyrimet ndaj aleatëve janë një tjetër faktor që ka ndikuar në listën e PD për zgjedhjet e 11 Majit. Nga 46 vende të sigurta, demokratët u kanë lënë atyre 8 karrike në Kuvend. 4 për Partinë e Lirisë së Ilir Metës, ku ky i fundit ka vendosur të kandidojë në listë të hapur edhe pse gjendet prej muajsh në masën e sigurisë arrest me burg. Dhe po ashtu, nga një vend të sigurtë për Fatmir Mediun, Vangjel Dulen, Agron Dukën dhe Shpëtim Idrizin. Ndarja e zonave, apo e posteve me aleatët ka qënë gjithnjë një nga momentet më të vështira para zgjedhjeve për PD. Me militantët në bazë që gjithnjë duan sa më pak praninë e tyre, por me kryetarët aleatë që janë kërkues e të zhurmshëm, është gjetur gjithnjë një ekuilibër. Nuk janë vendime të lehta. Shpesh prodhojnë momente që ngjajnë si padrejtësi, pasi ka demokratë me shumë kontribute dhe që kanë spikatur në opozitë të cilët sakrifikohen për partnerët. Berisha mbron koalicionin për “Shqipërinë Madhështore” si më të madhin e ndërtuar ndonjë herë. Po kjo nuk i ka shpëtuar kritikave apo ironive, pasi pjesë e kësaj amalgame me mbi 20 forca poilitike, janë edhe njerëz që kanë shërbyer shpesh si burim humori në ambjentet politike dhe mediatike. Teksa vendosi në anë të tavolinës së madhe subjekte si Jenisheri apo Gjuzi, PD dhe Berisha nuk ja dolën të bënin një ujdi me forca politike të reja, të djathta e me potencial si ajo e Agron Shehajt apo e Enkeleid Alibeajt. Apo edhe me Lulzim Bashën. Bashkimi i tyre në një front duke lënë mënjanë historinë e keqe dhe shëmtitë e 3 viteve të fundit, do të kishte qënë një sukses. Deputetët; kush iku, kush mbijetoi, kush doli në listë të hapur 11 deputë aktualë nuk do të kandidojnë më, nuk janë pjesë e listave. Ata janë; Helidon Bushati, Kasem Mahmutaj, Eralda Bano, Emilja Koliqi, Ferdinand Xhaferraj, Lefter Gështenja, Zheni Gjergji, Orjela Nebilaj, Ilda Dhori, Dashnor Sula dhe Sorina Koti. Ndërkohë, 19 të tjerë u vendosën në listën e mbyllur të kandidatëve, duke nisur me vetë kryedemokratin Sali Berisha, Sekretarin e Përgjithshëm Flamur Noka, duke vijuar me Edi Palokën, Albana Vokshin, Tomorr Alizotin, Greta Bardelin, Ramadan Likajn, Agron Gjekmarkajn, Elda Hotin, Bujar Leskajn, Ina Zhupën, Xhelal Mziun, Tritan Shehun, Gazment Bardhin, Luan Baçin, Saimir Korreshin, Bledion Nallbatin, Oerd Bylykbashi dhe Flamur Hoxhën. Ndërsa 13 të tjerë janë në listat e hapura dhe do t’i nënshtrohen votimit parapëlqyes: Jorida Tabaku, Dhurata Çupi, Andia Ulliri, Petrit Doda, Edmond Spaho, Andrea Mano, Ludovik Hasani, Kastriot Piroli, Lindita Metaliaj, Kreshnik Çollaku, Isuf Çela, Asllan Dogjani dhe Qani Xhafa.

Listë hallesh për 11 Maj, Quo Vadis PD?!

Nga Newsbomb.al

Artikuj të ngjashëm Artikuj

Zonjat pas Liderit/ Linda dhe Liria: Eleganca e një pushteti të pazëshëm

Basti i Ramës me brezin e ri

MUNDESIA e Erald Kaprit

Muzeu i Luftës: Nga MIG-ët te NATO, si ka evoluar ushtria shqiptare!

TRE DITËT E PARA MES DEMOKRACISË DHE TMERRIT

Prangat e Veliajt, skenari i zgjedhjeve

Artikujt më të lexuar

Zonjat pas Liderit/ Linda dhe Liria: Eleganca e një pushteti të pazëshëm

“Zoja e randë” azil, jeta e re e “yllit” që nuk është vetëm i Shkodrës

Todi e Fatos LUBONJA,13 vitet e burgut pa asnjë takim

Si e (vetë) vranë Vladimir Shehun, ku është letra e fundit???

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Basti i Ramës me brezin e ri

Neritan Liçaj, artisti që refuzon të jetë një qytetar që hesht!

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Listë hallesh për 11 Maj, Quo Vadis PD?!

Nga Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?