LIDA SHOSHA, Nga bisturia e tumoreve, tek Telajo e “Ngjyrave të Jetës”

Një doktoreshë me një profil të veçantë. Kirurgia Lida Shosha vjen në këtë profil të revistës Newsbomb.al, jo thjesht për detyrën fisnike dhe humane të mjekut, por për pasionin e saj që e zbuloi para 7 vitesh: pikturën. Në fund të gushtit ndryshoi pavion, nga salla e operacioneve, tek galeria FAB për të prezantuar punët e saj plot ngjyra. 52 vjeçarja nga Berati, ka shumë për të thënë për punën, pasionin, të rinjtë… Lindita Shosha nuk është rastësisht personazhi i veçantë i rubrikës profil në revistën Newsbomb.al. Nëse hap rrjetet sociale, doktoreshë Lidën, e vëren sa në foto me bisturi në dorë, sa me komentet e saj për aktualitetin e shoqërisë, sa në konferenca ndërkombëtare, po aq në festa kolektive... gjithmonë, me atë buzëqeshjen e madhe në buzë që i shkon për shtat një doktoreshe potente si ajo. Le pastaj po të hysh e të shohësh më tej se ç’thonë për të. “Zonja Lindita, respektin më të madh për ju. Djali im është operuar prej jush. Jeni shumë e edukuar. Specialiste e rrallë që me personalitetin tuaj i shtoni vlerë spitalit. Me respekt, familja Koçiu”. E mandej: “Unë jetoj falë jush doktoreshë Lindita. Nuk mund t’i shpreh me fjalë gjithë mirënjohjen dhe respektin që kam për ju. Vazhdoni misionin tuaj. Jeta e çdo njeriu është e sigurt vetëm në duart tuaja. Të uroj gjithë të mirat e kësaj bote. Jerina”. Janë me qindra, qindra mesazhe në faqen e saj në rrjetet sociale që të kuriozojnë se kush është kirurgia duarartë që gjithë ditën e kalon me bisturi në dorë, mes pacientësh që e shohin në sy me një shpresë të madhe për jetën, e me buzëqeshjen e saj që edhe atëherë kur mendon se ka ardhur fundi di t’u japë pak nga optimizmi i saj. Ky nuk është një tipar i panjohur për ata që e rrethojnë. Si një vajzë çapkëne lindur në sokakët e Beratit, është rritur me dashurinë për jetën, një magji që ta fal qyteti i një mbi një dritareve. Dëgjonte përditë gurgëllimën e Osumit, dhe në vegjëli vraponte gurëve të sokaqeve, me një vështrim më lart, drejt Kështjellës. Qyteti ku lindi, i kishte të gjitha. Ndaj, brenda personalitetit të saj, vetvetiu i kishte lindur pasioni dhe dashuria për të bukurën. Që ajo nuk e dinte. Por e mbante aty, të fshehur në një kuti “me çelës” derisa një ditë të bukur, kur ishte goxha e rritur dhe e arritur profesionalisht, nuk mund të qëndronte më, por shpërtheu. 7 vite më parë nga sot, Lindita Shosha, e gjeti veten me penel në dorë. Deri atëherë, kishte mbajtur bisturinë. Sa e sa pacientë kishin shpëtuar (dhe vazhdon akoma) nga duart e saj të arta. Sa e sa të tjerë kishin marrë këshillat e saj të vyera. Me qindra, kishin numrin e saj të telefonit dhe e merrnin prej saj këshilla për sëmundje nga më të ndryshmet. I gjithë ky vrull pune dhe pasioni, nuk i kishte lënë kohë të mendonte se çfarë realisht fshihte brenda vetes. Tani, e ndjen veten të plotësuar. Unë e takoj mes shumë miqsh, dashamirësish, e kuriozësh në ekspozitën e saj personale dhe të parë “Ngjyrat e jetës”, në Galerinë FAB. Ka 7 vite që pikturon. Në kohën që e nisi këtë pasion ishte Doktoreshë në Spitalin Amerikan në Tiranë. Por ideja për të hapur një ekspozitë, i lindi fiks para tre vitesh siç tregon dhe vetë. Pra, vetëm 4 vite që kishte marrë penelin në dorë, vendosi me mendjen e saj të shkojë më larg, te “Ngjyrat e Jetës”. “Ishte kuratori Ardian Kapo që më bëri të realizoj ëndrrën time, një ëndërr që qëndronte në sirtar prej disa vitesh dhe më në fund u jetësua” tregon Lida. 52 vjeçarja doktoreshë, nga ajo që shihet edhe nga pikturat e ekspozuara mureve të Galerisë, duket se ka një dashuri të madhe për ngjyrat, për kombinacionet e tyre, një aftësi deri në çudi për t’i miksuar ato, por edhe dukshëm një eksplorim brenda botës së pafundme dhe të larmishme të ngjyrave. “Është dashuria që kam për jetën dhe mendoj që vetë jeta është kolor. Jeta ka kaq shumë dimensione për të përshkruar, është kaq e bukur… kjo më detyron, dhe kjo më bën të marr penelin dhe të derdh emocionet e mia në telajo”, thotë Lida piktore. Por Lida Piktore në ekspozitë, nuk mund të ndahet nga Doktoresha me bisturi në spital. Se “ngjyrat e jetës” i vijnë dhe prej pacientëve të saj, atyre që trajton ditë pas dite me dashuri, kurajo dhe vetëmohim. “Përballja me dhimbjet e tyre që janë një sfidë tjetër e ditës për mua”, tregon doktoresha tanimë. Por ka shumë muza frymëzimi. Dhe siç më rrëfen edhe vetë, një prej tyre është edhe udhëtimi. “Ty të tërheq vëmendjen bukuria e vendit tënd dhe t’i përpiqesh që pjesëza të vogla të kësaj bukurie t’i bësh pjesë të ekspozitës tënde. Mund të jenë gjëra që në impakt të parë, jo lehtësisht të dukshme, por që në shpirtin tim godasin, ndaj ulem në telajo për ta përkthyer këtë emocion në një mesazh” tregon Lida për Newsbomb.al. Pacientët ia duan pikturat Magjinë që e shpreh nëpërmjet ngjyrave dhe telhajos, e ka përhapur gjithandej tashmë, jo vetëm në studion ku pikturon, një ambient brenda shtëpisë së saj. Në Spitalin Amerikan, pikërisht aty ku punon, nëse ktheni kokën nëpër mure, nuk do të shihni trishtimin që jep vetë qenia në një spital, por do të shihni “Ngjyrat e jetës”, shumë piktura, që ajo vetë ia ka dhuruar spitalit. Si doktoreshë që është, thotë se Piktura dhe Arti në tërësi, janë medikament për shpirtin. Duke treguar këtë, më rrëfen një episod me një prej pacienteve të saj në spital. “Pacientja po shkonte në sallën e operacionit. Gjatë rrugës në pavion, i zuri syri një nga pikturat e mia. Aty kishte pyetur: “Kush e ka bërë këtë pikturën?” Infermieria i thotë: “Dr. Lida”, “Më ktheni edhe një herë, se dua ta shoh edhe një herë pikturën”. Infermierja i kishte thënë: “ Të çojmë një herë në sallë, sapo të mbarojë operacioni, kur të kthehemi, shikojeni përsëri”. A ka gjë më të bukur se kjo?! Arsyja përse i kam dhuruar disa nga pikturat e mia në pavionin e kirurgjisë është që ato të jenë si një medikament për shpirtin. Për shpirtin e atyre që vuajnë në varësi të sëmundjes për të cilën janë shtruar në spital” thotë doktoreshë Lida që shton më pas se jo të gjitha ditët janë të mbushura me ngjyrat e jetës. “Në ditët e grinjta, unë mar më të bukurën e asaj dite” tregon 52 vjeçarja që nuk do të bjerë kurrë në pesimizëm. “ Penelin dhe bisturinë në dorën time e kam parë si dedikim për një jetë të shëndetshme në aspektin fizioligjik dhe psikologjik”. Një doktoreshë që dashuron fëmijët Duke ecur qosheve të pavionit me pikturat e doktoreshë Lidës, patjetër, një prej telhajove që të bie në sy menjëherë është një vajzë e vogël me një qen dalmat. Doktoresha mund ta ketë fiksuar diku si fotografi në mendjen e saj këtë skenë dhe e ka hedhur në telhajo. E ndërsa qëndrojmë duke e parë, doktoresha ndërhyn. “Vajza e vogël me qenin dalmat, për mua është një ndër më të dashurat. Mesazhi që kam dashur të trasmetoj është që fëmijët me aftësi të kufizuar, ndonjëherë shoqëria i paragjykon, i lë mënjëanë dhe nuk i përqafon në gjirin e saj. Po ta vësh re në pikturë, qeni dalmat i buzëqesh vajzës, i buzëqesh me dashamirësi sepse ai nuk e paragjykon dhe e do po aq sa dhe ajo. Pa pargjykime, pa kushte, ndaj e kam titulluar “Dashuria e vërtetë”. Theksoj këtu se kemi detyrim ndaj kësaj kategorie njerëzish. Në Itali kam parë në një pavion fizioterapie, kishte fizioterapist të verbër. Shoqëria Italiane kishte gjetur mënyra sesi t’i integrojë në shoqëri këtë kategori që mund të ketë lindur me një problematikë, ose gjatë rrugës mund të pësojë problematika të shëndetit”, thotë Lida, duke nxjerrë në pah një tjetër aspekt të karakterit të saj, humanizmin. Për mjekët, kjo nuk është një karakteristikë e panjohur. Por veçantia e doktoreshë Lidës, qëndron në faktin se ajo, e shpreh në mënyra të ndryshme. E meqë nuk e takon dot gjithë këtë kategori njerëzish, e tregon kaq bukur me pikturën e saj të varur në muret e galerisë. Koha për të pikturuar Po si është e mundur, që një doktoreshë si ajo, gjen kohë të pastrojë shtëpinë, të kujdeset për bashkëshortin, të marrë telefonin e të pyes vajzën që studion jashtë vendit sesi po ecën me mësimet, apo të interesohet për djalin që është me të këtu në Tiranë? E pastaj të gatuajë, lajë, shpëlajë, të takoj miq e shokë, të shkojë në spital, të qëndrojë për orë të tëra me pacientë që i tregojnë çdo hall të jetës së tyre derisa të mbërrijnë tek halli që i ka zënë me shëndetin? Ku e gjen pra kohën kjo doktoreshë që harxhon orë të tëra në sallën e operacionit duke u marrë me detaje të trupit të njeriut, të merret dhe me detajet e ngjyrave të jetës për të pikturuar? Kur e pyes pafundësisht për këtë, doktoreshë Lida, nuk e ndan buzëqeshjen nga fytyra. “Në orët e vona kur nuk ka urgjenca sigurisht ka telajo (qesh) ka pikturë, është një nevojë e brendshme, e imja e cila vlon brenda qënies time dhe do se s’bën të shpërthejë. Në orët e vona të natës ndonjëherë ngrihem në një qetësi apsolute ku nuk pipëtin as zogu dhe Tirana fle, unë nuk fle. Marr penelin dhe filloj të pikturoj dhe mendoj që aty janë orët e mia më produktive. Mendoj që gjatë natës kam hedhur në telajo pikturat e mia më të arrira”. Ekspozita e parë, por jo e vetmja Tani që ia mori dorën kësaj pune, nuk e ka të vështirë të planifikojë se çdo të bëjë në të ardhmen. Në galerinë FAB ka ekspozuar 30 piktura, por doktoresha thotë se ka shumë të tjera që nuk i ka nxjerrë për publikun. Janë piktura që po i projekton për t’ia treguar publikut në një kohë të dytë, në një ekspozitë tjetër. “Pas ekspozitës së parë dua të mar kohën time dhe të shikoj se çfarë do të sjelli e dyta. E cila përsëri do të jetë në Tiranë. Dua të udhëtoj brenda komunitetit të Tiranës me ekspozitën time, dhe në vijim synoj jashtë saj në galeri të ndryshme, në rrethe dhe jashtë Shqipërisë. Pa diskutim ky është objektivi i së ardhmes” thotë Lida. Përfundimisht, tani i ka kaluar ajo drojtja e parë që kishte, kur mendonte pa fund (ndërsa priste të dilnin punët e saj) sesi do të pritej kjo ekspozitë, si do t’i dukej penelata atyre që do e shihnin. Dhe të mendosh, që Lida Shosha, nuk ka marrë asnjë leksion nga “mjeshtrat” e pikturës për të hedhur në telhajo atë që mendon apo që sheh, apo që percepton mendja e saj. Veç pasionit, e ka mësuar gjithçka në mënyrë autodidakte. “Jam një amatore në pikturë, një autodidakte që është e magjepsur pas ngjyrave. Dhe të hapje një ekspozitë në Tiranë, ishte si të futesha në një zonë me mina për mua si kirurge” thotë ajo për mendimet e para që kishte në kohë para hapjes së ekspozitës. Por, guximi, është një prej vlerave që ka njeriu. Dhe për Lida Shoshën, guximi, nuk dukej vetëm në sallën e operacionit me bisturi në dorë. Por shpërtheu dhe jashtë asaj salle. “Unë mendoj që njerëzit në vetvete kanë edhe dhunti të tjera, por i frikëson të dalin nga zona e konfortit ku ndihen të sigurtë. Objektivi im ishte të dilja nga zona e konfortit dhe të prezantoja botëkuptimin tim nëpërmjet ngjyrave pasi kam investuar kohë të vyer në ato piktura. Çelsi i suksesit është PUNA, sigurisht në qoftë se njeriu punon pa pushim, ndershmërisht dhe investon në profesionin e tij pa pushim, do vij dita që ai do korrë frytet e kësaj pune dhe do jetë i suksesshëm” thotë me bindje doktoresha. Revista NEWSBOMB.al synon të trasmetoj mesazhe të forta për rininë dhe jo vetëm, çfarë do t’i thoni ju lexuesve tanë që të mund ta shohin botën me më shumë ngjyra… Mesazhi im për të rinjtë është që kudo që të jenë qoftë në Shqipëri qoftë jashtë, duhet t’i largohen vanitetit, aq më tepër vanitetit të pështirë që ofron shoqëria shqiptare. Në këto momente shpeshherë rinia është e orientuar jo ndaj vlerave të vërteta që ndërmerr individi. Një individ ka vlerë kur ai investon dhe investon realisht me dije dhe shkollim, edukim per veten dhe kështu ai është një ndihmë e patjetërsueshme e shoqërisë. Individë të cilët janë të orientuar vetëm pas famës së rreme, pas një vaniteti të papreçedent i cili ofrohet shpeshherë si jetë luksi, në rrjetet sociale dhe hapësirat mediatike që i ofrohen, pa bërë asgjë. Ky është dëmi më i madh që i është bërë dhe po i bëhet rinisë me anë të programeve të cilat janë krejtësisht të pavlera që nuk sjellin asnjë llojë, le të themi pasurimi shpirtëror dhe investimi real në brezin e ri, i cili është e ardhmja e vendit por që kanë efektin e kundërt. Unë do të thosha që të rinjtë duhet të fokusohen drejt shkollimit, edukimit, mbarimit me sukses të universitetit, ku ata mund të krijojnë personalitetin e tyre dhe ata mund të bëhen të aftë të zotë për të përballuar sfidat e jetës dhe për të krijuar familje të shëndetshme”. Këtu Lida ka hyrë pikërisht në atë që folëm në fillim të këtij profili. Në një skaner të shoqërisë shqiptare. Dhe ka disa postulate të vetat që duam t’i ndajmë me ju, sepse gjithsecili duhet ta ndjejë po ashtu. Çfarë mendon nga një vit që shkon? - Shtohen rrudhat - Njeh më mirë maskat e pseudo-miqtë që të rrethojnë - Bëhesh me selektiv - Kupton më mirë vlerat dhe antivlerat - Kupton se të thuash “jo” është respekt i limiteve dhe kufijve të tua - Kupton që pak, është më mirë se aspak - Kupton që një grusht fare i vogël njerëzish, mbeten miq të përjetshëm - Kupton se sado që të përpiqesh, s’mund t’i shpëtosh të gjithë - Kupton se dështimi është pjesë e jetës, dhe kush nuk ka dështuar, s’ka jetuar - Kupton se shëndeti është pasuri, dhe jo vetëm, është pasuria më e madhe dhe e pamatshme e njeriut Kush është doktoreshë Lindita Shosha Ka lindur në Berat në 1970 dhe është nënë e dy fëmijëve, një vajzë e një djalë. Mbaroi studimet e larta në Fakultetin e Mjeksisë në Tiranë dhe fitoi të drejtën e studimit në 1994 si Kirurge e Përgjithshme nga Qëndra Spitalore Universitare e Tiranës “Nënë Tereza” duke kryer më pas specializimin si Kirurge Proktologe. Dr. Shosha ka punuar si Kirurge e Përgjithshme prej vitit 1994 deri në Mars të vitit 2015 në Spitalin e Traumës . Nga viti 2013 deri në fund të vitit 2014 mbajti detyrën e Shefes së Shërbimit të Traumës në Spitalin Universitar të Traumës. Tashmë ajo është Shefe e Departamentit të Proktologjisë në Spitalin Amerikan si dhe Presidente e Kongresit Multidisiplinar. Dr. Lindita Sh. Mano, shëmbulli i shkëlqyer i modelit bashëkohor mjeksor, standart i lartë i performancës mjekësore. Është shpallur “Qytetare Nderi” në Urën Vajgurore. Në vitin 2015 mori detyrën e Presidentes së shoqatës AMEA, Albanian Medical Education Association dhe ka një çmim nga ambasada Hollandeze si “Kampione e barazisë gjinore” në vitin 2019.

LIDA SHOSHA, Nga bisturia e tumoreve, tek Telajo e “Ngjyrave të Jetës”

Nga Besjana Lika

Artikuj të ngjashëm Artikuj

Katër shokët doktorë kavajas, që sjellin bukurinë e jetës dhe madhështinë e qytetit

Eleganca e përjetshme e Valentina Leskajt

David Kostelancik, ambasadori i ri amerikan që do “drejtojë” Shqipërinë

“Gardhet” politike të Artan Lames

ISUF KALO, vdekja e mjekut që skanoi Enverin, Bllokun e Komunizmin

ALTIN DUMANI, frika e të mbeturit vetëm

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

50 vjet nga Revolta/ SPAÇI – Burgu i komunizmit dhe demokracisë

Të pathënat e ekzekutimit të biznesmenit nga turisti-vrasës

Shpellat e jugut, monumente të braktisura dhe të harruara nga shteti

The game is over

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

LIDA SHOSHA, Nga bisturia e tumoreve, tek Telajo e “Ngjyrave të Jetës”

Nga Besjana Lika

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?