Kush do qëndrojë BERISHA-BASHA, kilometrat e fundit të një dueli

Kush do të kishte vënë bast paraditen e 19 majit, se disa muaj më vonë do të kishim këtë skenë; Sali Berishën të rikthyer në terren në një fushatë për të rimarrë PD-në, dhe Lulzim Bashën në rezistencë për ta mbajtur drejtimin e forcës më të madhe opozitare në vend. Vështirë se do ta kishte parashikuar njeri këtë zhvillim, edhe më të guximshmit. Po ja ku jemi. Sali Berisha, i shpallur non-grata nga Sekretari amerikan i Shtetit, i përjashtuar nga Grupi Parlamentar i PD, ka kryer pjesën më të madhe të takimeve në qarqet e vendit, të cilat i ka pagëzuar me emrin Foltore.

Ai po mbledh firmat për të thirrur Kuvendin e jashtëzakonshëm, ku ka ndërmend të ndryshojë statutin, të largojë Lulzim Bashën, dhe me gjasë, të vendoset vetë në krye të partisë që themeloi 30 vite më parë. Këto janë kilometrat e fundit të një dueli, që në fund ende nuk dihet çfarë rezultati do të sjellë. Por ama, një gjë është e sigurtë. PD nuk do të jetë më siç ishte në këto 3 dekada. Paraditen e 19 majit njerëzit më të zënë, më të stresuar në vend, duhet të kenë qënë përgjegjësit e turnit në televizionet informative dhe në portale. Papritur, mbërriti një lajmërim i Sekretarit Blinken. Ai shpalli non-grata Sali Berishën dhe familjarët e tij, me motivin e korrupsionit madhor dhe minimit të demokracisë. Për një moment pati një hezitim. Por fakti që njoftimi jepej nga Ambasada amerikane në Tiranë, e bënte lajmin të sigurtë. Dhe vërshuan titrat në ekrane. “Sali Berisha non-grata”.