Kryebashkiaku për SPAK, Abuzim mbi 15 milionë euro në tenderat e tre viteve

Kur dikush ndihet i fuqishëm dhe i paprekshëm në PS, Edi Rama e ka çelësin për t’i kthyer të zgjedhurit me këmbë në tokë. E provoi fillimisht Saimir Tahiri, u pa se ç’ndodhi me Fatmir Xhafën e më tutje me Ditmir Bushatin. Prova e fundit, ishte zhveshja nga përgjegjësitë e mëdha të Taulant Ballës që nuk mund të mbante “dy kunguj në një sqetull”. Armando Subashi po vendoset në radhë para një sprove të vështirë. I zgjedhur si anëtar i forumit më të lartë vendimmarrës në PS, ai do të jetë më i godituri në PS, nësë SPAK fillon hetimet për kryebashkiakun pas dorëzimit në këtë institucion të raportit të KLSH-së

Ditëlindja e 47-të në fillim të shtatorit nuk e ngrohu aspak. Lulet po i vërshonin në zyrë nga të katër anët, dashamirës që u kishte bërë “goxha ndere” e kishin rënduar dorën. Por edhe pse ishte përpjekur të rregullohej që në pikë të mëngjesit, asgjë nuk e ndryshonte gjendjen e rënduar psikologjikisht që e mundonte prej janarit. As ecejaket në zyrën përballë ku rrinte vetullngrysur kryetari, nuk e qetësonin.