KOLONJA/ Dje, vendi ku lindën kokat e Rilindjes Sot, vendi i mikëpritjes, turizmit e kulinarisë

Kolonja ka qenë djepi i Rilindjes kombëtare ku shquhen emra të mëdhenj si Petro Nini Luarasi, Fan Noli, Jani Vreto, Papa Kristo Negovani, Shahin Kolonja, Gjerasim Qiqiazi, Themistokli Gërmenji, Parashqevi Qiriazi, Abdyl Ypi… Kolonja, një vend i patriotizmit, por edhe aq shumë të synuar nga pushtuesit, si lufta e 1914 ku u dogjën 57 fshatra nga grekët dhe u masakruan 714 vetë. Sot Kolonja është kthyer në një vend të turizmit, kulinarisë, e njerëzve të urtë e punëtorë, i mikëpritjes që në këto ditë festash duket edhe më i bukur, më i zhurmshëm… Ka zgjedhur për kryetar bashkie një regjizor humori, i gatshëm sikurse thotë dhe vetë, për një tjetër “përvëlim 4 vjeçar”. Që ka ditur jo vetëm të marrë investime të shumta nga qeveria, por, t’u tregojë shqiptarëve dhe të huajve, një tjetër destinacion të jashtëzakonshëm argëtues përgjatë gjithë stinëve…

Nga Tirana në qendër të qytetit, rruga zgjat 3.30 minuta, por kjo distancë do të shkurtohet më shumë, pas përfundimit të punimeve në rrugën që lidh Korçën me Ersekën. Edhe pse është dimër, ngjyrat e natyrës në zonën e Ersekës deri në Leskovik, formojnë një ndër tablotë më të bukura të Shqipërisë. “Kolonja i ka të gjitha përveçëse nuk ka det dhe ne kolonjarëve, sensin e goditjes së gjoksit pa lënë gropë, duhet të na e mirëkuptojnë dhe vlonjatët, pasi sigurisht që e kemi, por jo të pabazë”,- thotë duke buzëqeshur kryetari i Bashkisë së Kolonjës, Erion Isai kur i shprehim impaktin e parë për zonën që ai drejton.