Imamë e hoxhallarë, si janë ndarë gylenistët dhe erdoganistët në Shqipëri

“Kur ngjitët shkallët dhe mbërritët deri tek unë, patë ndokund ndonjë turk nëpër ambientet tona?”… Kështu nisi biseda me një zyrtar të Komunitetit Mysliman, i cili me bindje përfaqëson dhe deklamon idenë se zhvillimet e fundit nuk meritojnë koment në opinionin publik! “Ne e dimë se kush jemi, se çfarë principesh e lirish mbartim e demonstrojmë”,- vijon arsyetimin zyrtari i Komunitetit, ndërsa refuzon të identifikohet për të ruajtur balancën e heshtjes që ka vendosur Komuniteti për këtë rast të shumëdiskutueshëm. Për çështjen më të debatuar të mungesës së përfaqësuesve të Komunitetit Mysliman në ceremoninë e inaugurimit të Xhamisë së Et’hem Beut në qendër të Tiranës nga ana e Presidentit turk Erdogan dhe kryeministrit Edi Rama, ai na thotë se “nuk kishin ftesë,… mbase për shkak se xhamia është objekt kulture dhe protokollin për atë pjesëmarrje ndoshta e ka patur Ministria e Kulturës”. Por kundër KMSH-së dhe qasjes së tyre kah idetë dhe filozofia gyleniste, janë ngritur edhe hoxhallarë, të cilët kanë dalë publikisht prej kohësh kundër ‘kapjes’ sipas tyre të KMSH nga rrymat gyleniste! Përballja brenda llojit në të dy kampet argumentohet sipas fakteve dhe ideve që kanë, ndërsa ‘gylenistët’ në Shqipëri duket se janë veç shtetas shqiptarë! Historiani diskret tregon Gylenizmin në Shqipëri Një historian, njohës shumë i mirë i historisë turke dhe evoluimit të rrymave të ndryshme në Turqi, tregon se gylenizmi ka hyrë herët në Shqipëri. Daton diku mes viteve ‘93-‘94! Sipas tij, themelet janë hedhur nga shqiptarët e shkolluar në Turqi që më pas janë rikthyer. Kanë ardhur me investime, kryesisht në shkolla e spitale. Sipas tij, gylenizmi operon me rrjet, me elementë të caktuar në çdo fushë, kryesisht në ato që kapet më shpejt impakti publik! “FETO nuk është organizatë terroriste, tjetër punë që ata ta minojnë pushtetin nga brenda. Ata, kudo në botë, kanë funksionuar me të njëjtin mekanizëm, krejt të njohur, ashtu siç edhe sollën Erdoganin në pushtet! Zakonisht, aty ku investojnë, presin të marrin edhe rezultate, veçse jo të menjëherë. Kanë aftësinë të presin, për shkak të ecjes me ritme të sigurta! Përshembull, vëmendjen, shumë kohë, e kanë përqendruar në Ushtri dhe Polici! Janë dy skektorët ku investimet e tyre janë të rregullta e për pasojë pati edhe gylenistë që gjendeshin në krye të institucioneve të rëndësishme turke në momentin e grushtit të shtetit. Pak a shumë kështu ka ndodhur edhe në politikën dhe biznesin tonë. Ata drejtojnë bizneset e tyre këtu, i futën rrugës së politikës dhe më pas mbërrijnë deri në qeveri. Ka patur deputetë e ministra në të gjitha qeveritë që janë konsideruar gylenistë. Ndonëse të tanët, nuk janë dhe aq parimor, fjala bie, siç është një zyrtar gylenist në Turqi. Por ama, ata kanë qenë dhe janë pjesë. Siç janë disa medrese, kolegje, kampuse universitare dhe një sërë spitalesh”! Historiani nuk do të identifikohet, se thotë që gylenizmi në vendin tonë është i fuqishëm ekonomikisht dhe me interesa të forta që lidhen me të gjitha pushtetet. Ai flet me emra ministrash e deputetësh që kanë gjeneruar në disa qeveri. Tregon se në disa katedra universitetesh, gjithë drejtuesit janë gylenistë! E këtu ndalet e fikson: “Shteti i di, SHISH i di, prokuroria dhe policia, po e po. Ka emra që mbeten gjithnjë në krye me çdo pushtet! Ata dihet që përfaqësojnë më shumë sesa një forcë politike në vendin tonë. Edi Rama, pra kryeministri jonë, bën gabim që nuk i përgjigjet publikisht, sepse krijon imazh të gabuar duke e anashkaluar këtë fakt. Që dikush të të thotë se ti ke brenda vendit tënd një organizatë terroriste të vendit tim dhe duhet të m’i sjellësh mua, kjo krijon panik, sepse masa nuk e di se çfarë përfaqësojnë këta njerëz në instanca të shumta tonat. Terrorizmi është term i shpikur nga Erdogan për t`i bërë këta njerëz të duken armiqësor kudo ku operojnë. Por në fakt, ata janë thjeshtë të fuqishëm ekonomikisht, të pushtetshëm dhe shpeshherë edhe të paprekshëm! Në vendin tonë, ata nuk gjenden në formën e terroristëve, as të vrasësve, por si ministra, deputetë, drejtues nëpër institucione të ndryshme deri edhe në media!” E, kur i parashtron faktin se përse u anashkalua Komuniteti Musliman nga takimi për inagurimin e xhamisë, historiani e ka të qartë dyshimin: “Komuniteti Musliman edhe mund të përçojë ide të kësaj rryme. Në fakt ata janë perëndimorë dhe sigurisht që nuk i rrinë përshtat filozofisë së Erdogan. Por nuk janë në nivele shqetësuese. Fundja investimet që janë të kësaj rryme në Medrese dhe Kolegje janë të njohura, ndryshe atyre që operojnë me biznese të tjera, si spitale, media, apo universitete shtetërore. Ndaj Komuniteti Musliman nuk duhet të shqetësojë askënd përsa kohë ata nuk cenojnë për asnjë moment harmoninë mes komuniteteve! Përkundrazi janë një katalizator perfekt i kësaj marrëdhënieje unike mes besimeve që ka shoqëria jonë”! Hoxha që identifikon dhe akuzon... Justinian Topulli është një hoxhë që flet me emër, pa dorashka, nuk fshihet dhe ka vendosur që betejën e tij kundër Komunitetit Musliman ta bëj hapur. Po kaq hapur akuzon dhe identifikon gylenizmin jo vetëm në KMSH-së, por edhe në shëndetësi, arsim, media dhe biznes. Si një zë publik, ai nuk ngurron të përgjigjet dhe të tregojë gjithçka të kapur nga gylenistët, së pari, në komunitetin fetar ku ai bën pjesë. Pyetjes në lidhje me akuzat e tij për kapjen e KMSH nga gylenistët, ai i përgjigjet gjatë e pa asnjë pengesë: “Kapja në mënyrë ilegjitime e KMSH-së nga gylenistët ka ndodhur më së shumti në mënyrë të heshtur, hap pas hapi, për më shumë se dhjetë vjet përmes metodës së tyre të infiltrimit të pazëshëm në administratën e KMSH dhe, në veçanti, në kryesinë e saj, e cila praktikisht është organi i vetëm që vendos për gjithçka. Ata kanë përdorur ndikimin ekonomik, politik dhe lidhjet që kanë pasur me disa nga drejtuesit e dikurshëm të KMSH, duke i mbështetur ata, apo duke heshtur ndaj abuzimeve të tyre, në këmbim të vendosjes së njerëzve të tyre në poste të rëndësishme në KMSH. Ata, gjithashtu kanë përfituar në këtë situatë në mjaft raste edhe nga indiferenca e imamëve dhe frika që këta të fundit kanë për vendin e punës”! Hyrjen e ‘gylenistëve’ në radhët e KMSH-së, Topulli e identifikon aty rreth viteve 2000. Në parashtrimet e tij të rritjes së kësaj rryme brenda komunitetit, ai jep idenë se si në fakt operojnë përfaqësuesit e gylenizmit, paçka se ai e ka fokusin vetëm brenda institucionit të cilit i përket. “Në vitet 2000, lindi nevoja e shtimit të të rinjve, intelektualëve dhe e klerikëve të diplomuar në vendet e botës islame në drejtimin e KMSH, si kërkesë e besimtarëve. Mes tyre kishte edhe ndonjë gylenist, të cilët u punësuan që herët në zyrat e KMSH, por pa pasur ndonjë post të rëndësishëm dhe pa u ndjerë asnjëherë zëri i tyre. Në dallim me këta të fundit, të cilët i përkasin një grupi tepër të strukturuar dhe organizuar hierarkik, të tjerët ishin mjaft të ndryshëm mes tyre dhe të pa organizuar, megjithatë, ata arritën të përçonin një lloj larmie dhe demokracie të brendshme brenda KMSH për një farë kohe, duke krijuar kështu një hapësirë debati në të, për disa nga çështjet më të nxehta në atë kohë, siç ishte çështja e administrimit të pronave vakëf të KMSH...etj”. Topulli ndalet dhe analizon situatën që karakterizohej nga një frymë konflikti latent mes brezit të ri dhe pjesës së vjetër për mënyrën sesi zhvillohej aktiviteti fetar i KMSH, që në dukje ishte konflikti brezash, por për të ishte shumëherë më tepër sesa aq. “Në këtë situatë, deri diku kaotike brenda KMSH, gylenistët përfituan duke u afruar me kryesinë dhe kryetarin e atëhershëm, duke mos hapur gojën kurrë kundra shkeljeve që bëheshin si dhe duke përfituar nga imazhi se ata ishin tolerant, sepse kishin studiuar në Turqi, apo nuk mbanin mjekër etj. Përveç kësaj ata kishin siguruar edhe lidhje interesash dhe favoresh me disa nga drejtuesit e lartë të KMSH, duke i bërë ata borxhli karshi tyre. Fillimisht gylenistët morën nga KMSH administrimin e shumicës së medreseve, dhe duke pasur përvojë në arsim, ata i kthyen ato në modele kolegjesh, çka u pa dhe trumbetua si sukses. Në vitin 2010, pati një konflikt në kryesinë e KMSH mes dy grupimeve që kryesoheshin nga njerëz të diplomuar në Turqi, njëri tërësisht gylenist, tjetri i përzier. Grupi gylenist arriti të sigurojë mbështetjen e kryetarit të atëhershëm, por edhe me mbështetjen e shtetit, arriti të vendosë nën kontroll gjithë kryesinë e KMSH dhe të largojë pas kësaj me ritme të shpejta të gjithë elementët që nuk i përkisnin grupit të tyre”. Sipas tij nga pozitat drejtuese të kryesisë, ata i kanë detyruar në mjaft raste myftinjtë e rretheve që të vendosin si anëtarë përfaqësues “të zgjedhur” nga besimtarët e zonës përkatëse vetëm njerëz të besuar apo të pranuar nga gylenistët, këta të fundit shpesh të panjohur nga radhët e besimtarëve. Ndërkohë që duke i mëshuar rrymës që ka kapur KMSH, ai thekson faktin se në mjaft myftini, as që zhvillohen zgjedhjet për përfaqësuesit e zonave, por edhe atje ku ato bëhen, zhvillohen në mënyrë fiktive dhe manipulohen në mënyrë të turpshme, duke përfituar nga fakti se myftinjtë dhe imamët janë të emëruar dhe kanë frikë të kundërshtojnë presionin e kryesisë të KMSH. Sipas Hoxhës, Këshilli i Përgjithshëm i KMSH, që supozohet të zgjedhë gjithë drejtuesit e KMSH, është një organ fiktiv, praktikisht pothuajse i gjithi i emëruar nga kryesia e KMSH në shkelje flagrante të statutit dhe moralit të besimit. Po cilët janë gylenistët sipas Topullit, kryesisht në KMSh dhe jo vetëm? Ai shpjegon: “Gylenistët janë një grupim okult, hermetik të cilët janë përjashtues, edhe pse në radhët e muslimanëve praktikantë ata janë një pakicë, megjithatë, përmes metodave të tyre makiaveliste ata kanë kapur përfaqësinë e KMSH dhe e mbajnë atë në mënyrë ilegjitime. Ata nuk pranojnë de fakto të respektojnë statutin e KMSH, nuk pranojnë në Këshillin e Përgjithshëm dhe drejtimin e KMSH gjithëpërfshirjen, përfaqësimin e denjë demokratik, pra legjitimitetin që parashikon statuti, dhe as nuk ndjekin kriteret e meritës në përzgjedhjen e njerëzve, por vetëm kriteret sektare. Përveç kësaj, për mbi dhjetë vjet ata nuk kanë përmirësuar gjendjen e mjerë të imamëve të xhamive, të cilëve u fillojnë rrogat nga 50 mijë lekë të vjetra në muaj dhe shumica e tyre as nuk kanë kontratë të rregullt pune dhe as siguracione edhe pse mund të kenë me vite në detyrë. Sigurisht që kanë edhe probleme fetare, por kryesorja është se ata nuk mund t’i imponohen besimtarëve muslimanë si përfaqësues të tyre, ndërkohë që nuk janë zgjedhur prej tyre, duke shkaktuar madje edhe probleme të tilla si ajo me shtetin turk. P.sh. populli dhe shteti turk kanë investuar për ndërtimin e xhamisë së madhe të Namazgjasë, por ata nuk duan t’ia dorëzojnë atë KMSH aktuale, e cila përbëhet nga gylenistë, njerëz që ata i konsiderojnë të lidhur me një grup që akuzohet për puçin ushtarak të 2016-s në Turqi”. Hoxha “rebel” i praktikave të ndjekura në Komunitetin Mysliman thotë se përbërja gyleniste e KMSH paracakton zgjedhjen e kryetarit të këtij komuniteti. Vijon argumentin duke thënë se kjo situatë është e qartë dhe e njohur nga imamët dhe myftinjtë. “Vetëm një i jashtëm dhe i painformuar mund ta mohojë, ose një i pamoralshëm, siç janë në këtë rast gylenistët”. Për investimet gyleniste në vend ai thotë atë që flitet kudo. “Duke u nisur nga personat dhe fondacionet gyleniste që i zotërojnë, investimet janë të shtrira në arsim, nga ai fillor e deri tek arsimi i lartë, dhe që përbën investimin e tyre më të madh në vend. Kanë investime në median elektronike dhe atë televizive, në mjekësi dhe disa biznese të tjera. Në disa nga këto biznese ata janë pronarë të vetëm dhe në disa të tjera me ortakë vendas ose të huaj”. Dilemat gyleniste të Erdogan Kur kanë kaluar 6 vite nga ‘grushti i shtetit’ që gylenistët i bënë sistemit të Erdoganit nën petkun e opozitës, kur janë lëshuar me qindra e mijëra urdhër-arreste në të gjithë botën për ‘armiqtë’ e pushtetit të Erdogan, kur në vende si Shqipëria dhe Kosova ai vijon të vërë kushte për gjetjen dhe dorëzimin e ‘terroristëve gylenistë’, kur gylenistët, ata që mundën të shpëtonin nga kthetrat e dhunës shtetërore kanë kërkuar strehime politike nëpër vende të ndryshme, kur shtete si ky i joni bëjnë be dhe rrufe që brenda kufijve tanë nuk ka asnjë terrorist-gylenist, atëherë lindin dilemat e mëdha mbi kërkesat e Erdogan: A mos i do mbrapsht gjithë investimet që mbajnë gylenizmin në themele të binzeseve në vendin tonë? A mos ka një listë individësh apo biznesesh që ua ka lënë autoriteve tona në duar dhe këta nuk e kanë zbatuar? Sa seriozisht e ka betejën edhe brenda vendit të tij, me anëtarët e deklaruar të kësaj lëvizjeje? Për të gjitha këto dyshime jep përgjigje të qartë biseda me një ish-zyrtar shqiptar që ka punuar në një nga administratat shumë afër Erdogan. Ai shpjegon me pak fjalë se armiqësia mes Erdogan dhe Gylen është armiqësi mes miqsh, miq interesash dhe pushtetesh. “Ata ishin shokë! Erdogan erdhi në pushtet nga qarqet dhe investimet gyleniste. Sigurisht që ata ishin më të shkolluar, sepse investimet e Gylenit kanë bazë shkollimin. Ndaj gjendeshin në krye të shumë sipërmarrjeve. Por ka një dallim thelbësor mes zyrtarëve gylen dhe mbështetësve në popull të Gylenit. Si të thuash, në Shqipëri, opozitarët që s’rrinë kurrë jashtë pushteti me ata që kur janë në opozitë nuk munden dot të sigurojnë as mbijetesën. Kështu ka ndodhur fiks me gylenistët! Ata sot janë të pabukë, por ka gylenistë sërish në pushtet. Madje i fundit u emërua në fundin e janarit në krye të dikasterit të Drejtësisë. Bëhet fjalë për një nga ithtarët më të mëdhenj të doktrinës dhe filozofisë gyleniste. Quhet Bekir Bozdağ. Në administratën e parë të Erdoganit ishte zëvendëskryeministër, më vonë ministër Drejtësie. U hoq dhe i rimor prapë. Pra nuk është e njëjta gjë, si për masat si për personat me lidhje me pushtetin! Pra praktikisht Erdogan e ka ulur luftën me një pjesë të tyre”. Lidhur me gylenistët që kërkon Erdogan në vendin tonë, ai thotë qartë se presidenti Turk e di çfarë kërkon. Ish-zyrtari thotë se gylenistët që morën pjesë në grushtin e shtetit nuk qëndrojnë në Shqipëri pasi ata kërkojnë vende ku kanë besim dhe shtet të fortë. Shqipëria, në optikën e tij, nuk ka asnjërën. “Pra, një gylenisti, flas nga këta që janë të kërkuar ndërkombëtarisht nuk ka çfarë i ofron Shqipëria, duke parë pafuqinë përballë Erdogan, sidomos me investimet që ai ka ndërmarrë së fundmi atje. Unë di që në fillime, para disa vitesh është dërguar një listë me emra. Nuk jam i sigurtë nëse ishin turq apo shqiptarë, por di që aty ka investime të të dy palëve. Erdogan, kërkon personat që drejtojnë bizneset gylene, dhe s’janë pak, por e para, ata kanë vite aty dhe e dyta shumë biznese të njohura tashmë janë me pronarë shqiptarë, që Shqipëria nuk ka pse ia dorëzon si ‘terrositë’ Turqisë, sepse ata s’janë terroristë edhe nëse janë njerëzit e besuar të fondacioneve të Gylenit”. Pikat ku thyhet ‘vëllazëria’ Rama-Erdogan Në një dalje publike dhjetë ditë pas vizitës së Erdogan në vendin tonë, kryeministri Edi Rama dha një përgjigje hermetike në lidhje me kërkesën e vazhdueshme të Erdogan për t’i dorëzuar gylenistët që gjenden në vendin tonë. Rama nuk tha asnjë fakt konkret, por u fsheh pas një përgjigjeje diplomatike kur shtoi: “Fjalët janë shumë të rëndësishme prandaj duhen dëgjuar siç thuhen. Parakusht vëllazërie është t’i thuash mikut të vërtetën, sado e hidhur të jetë ajo. Kjo lidhet me thënien e një të vërtete mbi çështjen, jo parakusht vëllazëria. Duhet të bëni diçka e thotë vazhdimisht, ne e dëgjojmë me respekt dhe nuk kemi ndenjur me duar të lidhura. Kemi pasur persona problematik në raport me shtetin shqiptar dhe kemi vepruar. Qasja në fjalë do të thotë që kjo është një organizatë që atë që e bëri atje, mund ta bëjë edhe këtu. Ne nuk kemi pasur të dhëna. Për elementë të caktuar që nuk paraqiten në rregull në raport me legjislacionin, patjetër”. Por çfarë i ka kërkuar në 6 vite, Erdogan - Ramës? Në vitin 2016, ambasada turke në Tiranë i dërgoi një shkresë Ministrisë se Arsimit, që të ndalojë vendosjen e simboleve të Turqisë dhe flamujt në shkollat në Shqipëri, pasi ata pretendonin se disa prej atyre shkollave kanë lidhje me Gylenin. Pas kësaj shkrese, simbolet u larguan. Më pas Erdogan dha urdhër që shkollat e lëvizjes ‘Gylen’ të mbyllen. Rama refuzoi duke i bërë me dije se shkollat ishin të licensuara dhe përbushnin standartet. Pak më vonë, Erdogan kërkoi edhe mbylljen e disa medreseve si në Tiranë, Shkodër, Durrës, Kavajë, Elbasan, Berat dhe Korçë. Në listë u tha se gjendeshin edhe kolegjet si: “Mehmet Akif”, “Hasan Riza Pasha” në Shkodër, Kolegjet “Turgut Ozal” në Tiranë dhe Durrës, Kolegji Gulistan, qendra e kurseve “Meridian”, Fondacioni i edukimit “SEMA”, shkolla në gjuhën angleze, “Memorial International School of Tirana”, Universitetet “Bedër” dhe “EPOKA” dhe qendrat kulturore, “Horizontet e Reja” dhe “Drita Islame”! Të gjitha këto shkolla thuhet se u listuan nga Erdogan si financime të armikut të tij dhe ato duhet të mbylleshin, ndërsa ende nuk dihen emrat e personave që janë mbyllur në zarf dhe janë dorëzuar në zyrën e shefit të qeverisë shqiptare. Në muajin maj të vitit 2017, pra rreth një vit pas grushtit të shtetit, konkretisht në datat 24-25 maj, në vendin tonë u bë një takim mes prokurorive të rajonit e më gjerë. Objekt i diskutimeve ishte lufta e përbashkët e krimit që gjenerohej përmes internetit. Në këtë takim mori pjesë edhe kryeprokurori Turk, i cili iu dha porosi homolëgëve të tij të Ballkanit për të kapur gylenistët që strehoheshin në vendet përkatëse. Ish-kryeprokurori shqiptar, Adriatik Llalla la të kuptohej se mund të gjendeshin persona të tillë të strehuar në Shqipëri, mbase edhe të fshehur pas bizneseve, por ai nuk dha emra: “Dyshimet janë se po. Dyshimet e autoriteteve turke janë se autorët e këtyre veprave penale të këtij grushti shteti mund të jenë edhe persona që fshihen pas bizneseve. Emrat nuk mund të bëhen publik që në këtë fazë. Të dhënat janë të plota, pritet vetëm verifikimi nga ana jonë. Në varësi të të dhënave që na vihen në dispozicion nga autoritetet turke, ne do të kryejmë hetime brenda kapaciteteve që kemi, pra brenda atyre hapësirave që ligji shqiptar e lejon”. *** ....Që prej asaj kohe nuk u fol më për takime konkrete mes institucioneve, por u fol gjerësisht për gylenistë, gylenizëm dhe për organizatën “FETO”, që Erdogan e ka pagëzuar si terroriste! Njohës të mirë të rrymës liberale të përndjekur tashmë nga Turqia, përfliteshin gjithmonë biznese që lulëzonin nën gylenizmin në Shqipëri. Gylenistët në Shqipëri, sipas pretendimeve të shtetit Turk, nuk janë turq, janë shqiptarë, që jetojnë, punojnë dhe kontribuojnë në vendin tonë. Turqit janë turq, janë të veshur me petkun e investitorit, e duket se pak rëndësi ka se kujt i përkasin erdoganizmit apo gylenizmit! Për sa kohë hedhin para dhe nuk bëjnë ‘sherre’ ata janë të mirë, të pranueshëm dhe vellëzër pa parakushte..! Si shpëtoi mësuesi i gjeografisë Në 8 tetor 2017 në portin e Durrësit u ndalua shtetasi turk Muhammed Yasir Aydogmus me profesion mësues gjeografie, së bashku me familjen e tij, në tentativë për t’u larguar nga Shqipëria me pasaporta falso. Në 11 tetor, shtetasi turk doli përpara gjykatës së Durrësit që e liroi atë. Menjëherë reagoi ambasada turke që e konsideroi vendimin skandaloz. Nëpërmjet një deklarate, ambasada turke tha se gjykata liroi një individ që i përket organizatës terroriste FETO. “Ne ofruam të gjitha dokumentet dhe pritëm që Shqipëria ta mbante të ndaluar për 40 ditë në bazë të konventës” tha ambasada në deklaratë. Pasi gjykata vendosi për të detyrim paraqitje, kjo nuk ndodhi. Për shtetasin turk nuk pati asnjë të dhënë. Mësuesi që u deportua në Turqi Harun Çelik, mësuesi 42 vjeçar pati një fat të ndryshëm nga mësuesi i gjeografisë. Ai u arrestua ndërsa hynte në Shqipëri nga Turqia me një vizë false kanadeze në 8 korrik 2019. Me gjykim të shkurtuar u dënua me 8 muaj e 20 ditë burg dhe doli nga burgu në 1 janar 2020. Por sapo la qelinë e burgut, u deportua menjëherë. Informacionet janë se menjëherë pas lirimit nga burgu ai u ndalua nga shërbimi sekret turk që e mori me avion të posaçëm menjëherë për ta deportuar drejt Turqisë. Avokati mbrojtjës i mësuesit nuk dinte gjë dhe deklaroi se Çelik kishte aplikuar për azil. Por, mësuesi nuk e pati këtë fat. U deportua në Turqi ku akuzohet si pjesmarrës në një organizatë terroriste.

Imamë e hoxhallarë, si janë ndarë gylenistët dhe erdoganistët në Shqipëri

Nikoleta Kovaçi

Artikuj të ngjashëm Artikuj

Mashtruesit e Mikrokredive

102 kontejnerët me ngarkesën e errët të maskuar nën hijen e portit

Dritëhijet e investimit të “Durrës Yacht Marina”

PIRAMIDAT e reja “moderne”

Aldor Nini, grabitqari i artit shqiptar dhe fjalës së lirë

Nga xhamia e tabakëve për t’i rënë me grusht Berishës, kush është agresori i 6 dhjetorit

Artikujt më të lexuar

Zonjat pas Liderit/ Linda dhe Liria: Eleganca e një pushteti të pazëshëm

“Zoja e randë” azil, jeta e re e “yllit” që nuk është vetëm i Shkodrës

Todi e Fatos LUBONJA,13 vitet e burgut pa asnjë takim

Si e (vetë) vranë Vladimir Shehun, ku është letra e fundit???

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Basti i Ramës me brezin e ri

Neritan Liçaj, artisti që refuzon të jetë një qytetar që hesht!

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Imamë e hoxhallarë, si janë ndarë gylenistët dhe erdoganistët në Shqipëri

Nikoleta Kovaçi

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?