Ikja e Ramës pengohet nga rikthimi i Berishës

Është një konkluzion i shpeshpohuar nga komentonjës të kaheve dhe grupimeve të ndryshme, i cili mund të formulohet se: Ikja e Edi Ramës nga qeverisja e vendit, pengohet nga rikthimi i Sali Berishës. Të dy politikanët që determinojnë njeri prej 34 vitesh dhe tjetri prej dy dekadash, politikën në Shqipëri, janë në një akt të fundit rikonfirmues të statusquosë së tyre. Të dy janë investuar dhe investohen, përplasen dhe ngrenë strategji vetiake, (si antagonistë dhe partnerë njëkohësisht), për të qëndruar në këtë status. Ikja me rikthim e Sali Berishës nga kryesimi i PD-së është një kapitull politik i shtuar që fillimisht la përshtypjen e një post-epilogu të përkohshëm për karrierën e tij. Ky kapitull ka vlerën e një historie të pazakontë e cila u rrëmbye dhe u përdor nga “ujku i vjetër” Berisha, për një rikthim pa konkurencë penguese në krye të “shtëpisë së hipotekuar” tashmë rishtaz. Tashmë ajo më shumë mund të quhet “Shtëpia politike Berisha” se sa PD. Historia që lindi kur u shpall “non grata” amerikane dhe më pas ajo britanike për Sali Berishën, i dha arsyen dhe “të drejtën” për ta përdorur se e gjithë kjo është një lëvizje nga kundërshtarët e tij jashtë Shqipërisë, tek ndërkombëtarët dhe në qeverisjen e Edi Ramës, për eleminimin përfundimtar politik të tij. Përpos kësaj, për një vit rresht, politikani që ktheu në tribunë ditore dritaren e banesës së tij në lagjen qendrore të Tiranës, me aktin prej “muezini të Partisë”, ia doli të rikthehet edhe formalisht në krye të partisë së vet për konkurimin zgjedhor të 11 majit të vitit 2025. Shumëkush në mjedisin publik shqiptar këtë histori rikthimi të Sali Berishës si kryetar i forcës kryesore të opozitës e konsideron me zë apo me heshtje si një akt dhe investim retrograd për politikën shqiptare. Natyrisht nuk mendojnë kështu vetëm militantët dhe fansat e tij që tashmë shpesh cilësohen si entiteti berishist i skenës politike të vendit. Ai vetë dhe këta, e konsiderojnë këtë si stoicizëm dhe e sjellin me kërshëri në kontekst me rikthimin e presidentit Trump në Shtëpinë e Bardhë. Për efekt të njohur, po ndërtojnë edhe narativën e një konteksti të ngjashëm mes dy të papërqashmëve. Por realiteti i rishtuar i Sali Berishës është në Shqipërinë e qeverisjes vijuese të Edi Ramës dhe ai i rikthimit të Donald Trump, në qeverisjen e përfunduar të Joe Biden! Të gjitha krahasimet çalojnë, ndërsa ky është plotësisht sakat! Qeverisja e Edi Ramës është më e dobët se kurrë në sytë e shqiptarëve. Ndërsa kryeministri Rama është ende në mundësi qeverisëse pamvarësisht, 11 majit 2025. Kjo qeverisje është dobësuar dhe madje ka marrë metastaza të pashkëputshme korruptimi në shumë sfera dhe sidomos krejt strukturat e saj. Kundërshtari potencial i dobësimit tronditës të qeverisjes socialiste është pikërisht ky kancer. Këtij armiku i mbishtohet dhe injorimi si natyrë, që mbart Edi Rama në vijimësinë e mëtejshme qeverisëse. Përballë tij nuk ka qenë rrezikuese opozita, aq më tepër rikthimi i Sali Berishës, përkundrazi, këtë rikthim Edi Rama, po e përdor dhe do ta përdorë edhe në muajt e ardhshëm të fushatës zgjedhore si alibi të qëndresës së tij në qeverisje. Edi Rama është goditur jo individualisht porn ë imazh të tij, nga institucioni i ri i antikorrupsionit- SPAKU. Ka pësuar dhe do të ketë goditje aq shumë gjurmëlënëse dhe me plagë të pari[arueshme në imazhin e tij qeverisës. Marrëdhënia e të dy zotërinjve protagonist Rama_Berosha me institucionin e SPAK-ut është një mishërim urrejtjeje që ka kaluar fillimisht nga konsensusi i detyrueshëm. Qysh atëhere dy protagonistët dominantë të skenës sonë politike, kanë garantuar mundësinë e tyre të pakthyeshme për të qenë jo vetëm një herë, por disa here, personazhe të ftueshëm shpesh dhe të akuzuar disa hershëm, për vepra penale të së shkuarës së largët, të së tashmes dhe fatkeqësisht edhe të së ardhmes së afërt. Deri sa të mbarojnë punë me gjykatat, të dy do të qeverisin asimetrikisht skenën politike ose do të bashkëndajnë statusquonë e një Shqipërie që politikisht nuk është në gjendje të lindë asgjë. Të paktën edhe pas 11 majit 2025, për pak kohë, ikja e Edi Ramës do të vijojë të mbetet e penguar nga rikthimi i Sali Berishës, ky i fundit, jo për qeverisje vendi, por për kalim në gjendje tjetër.

Ikja e Ramës pengohet nga rikthimi i Berishës

Nga Aleksandër Çipa

Artikuj të ngjashëm Artikuj

SHAMIZEZAVE, NË 80-VJETORIN E ÇLIRIMIT

Unë jam me doktorët!

Një “sprovë” për Ministrin e ri!

Faleminderit!

Braktisur…

Ti Shqipëri më jep nder!

Artikujt më të lexuar

RA NGA QIELLI, edhe “Profeti” i Ben Blushit

“Rilindja” që erdhi me bujë, por u shua pa zhurmë

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Mashtruesit e Mikrokredive

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Çfarë ka Akoma për Rozana RADIN!