Identiteti i së majtës 1991-2021 PS, Partia e milionerëve dhe biznesmenëve

Më 13 qershor 1991 votat e delegatëve të Kongresit X të PPSH vendosën ndryshimin e emrit, programit dhe ekipit drejtues, duke “krijuar” Partinë Socialiste, forca kryesore e të majtës në Shqipëri. Ekipi drejtues i PS më 1991 përbëhej nga një staf profesorësh pa poste të larta në ish regjimin komunist. Fatos Nano, ekonomist dhe prurje në politikë në 1991, u bë i njohur vetëm pas 20 shkurtit 1991, kur u bë kryeministër disamujor. Mënyra sesi ai e manaxhoi kabinetin e tij të parë (shkurt-prill) dhe më pas kabinetin e dytë (prill-qershor) e lejoi të krijojë profolin e një ekonomisti teknik, një politikani jo konfliktual dhe një njeriu që ishte e prirur për bisedime politike, deri në atë pikë sa të kërkonte koalicion të madh politik midis PPSH dhe PD.

Në momentin e zgjedhjes kryetar, Nano ishte ministër në kabinetin Bufi, dhe vetë ai ishte zgjedhja e dytë e R.Alisë për kryetar, pasi kandidati i parë e refuzoi postin. Në krah të tij ishin dy profesorë të filofozisë, Ismail Lleshi dhe Servet Pëllumbi, si dhe gazetari Spiro Dede, gjithëanshtu nga pjesa e lexuar e PPSH. Në kryesi bënin pjesë emra të njohur të jetës kulturore të kohës, Dritero Agolli, Xhevat Lloshi, Namik Dokle, ekspertë ekonomie si Ermelinda Meksi e Shkëlqim Cani, etj. Me përjashtim të Gramoz Ruçit, “dorës së fortë” të bazës së PPSH/PS, i cili u bë sekretar i përgjithshëm, të gjithë të tjerët nuk kishin pasur funksione me rëndësi në strukturat e larta të PPSH. Në Asamble/Komiteti Drejtues u zgjodhën 81 anëtarë, shumica në moshë të mesme, ku asnjë prej tyre nuk ishte pjesë e Byrosë Politike të PPSH. Midis emrave gjenden edhe figura si gazetari Bashkim Zeneli, pegagogët Maqo Lakrori e Ethem Ruka, regjizori Kiço Londo, kompozitori Limoz Dizdari, mjeku Sabit Brokaj, ekonomisti Zef Preçi, etj.