Donald Trump si “patronazhist”, apo “qëndrestar”? Ku po gabojnë politikanët

Rikthimi i Donald Trump, në Shtëpinë e Bardhë, si Presidenti i 47-të i SHBA-ve është dhe do të mbetet “historik” edhe pasi ai të largohet përfundimisht nga politika. E gjithë historia e dy garave të tij presidenciale, e qeverisjes në mandatin e parë dhe ajo që presim të shohim gjatë mandatit të tij të dytë, do të jetë një minierë ari për historianët dhe analistët politikë, të cilët duhet t’u japin përgjigje shumë pikpyetjeve që rrethojnë fenomenin “Trump”. I gjithë udhëtimi i tij drejt projektit presidencial, është një sagë politike e pashoqe, e cila nisi si garë kundër “establishmentit”.

Entuziastët pro-Trump e shohin MAGA-n e tij jo thjeshtë si një platformë për ndryshime rrënjësore në qeverisjen e Amerikës, por edhe si një mekanizëm për “riorganizim të rendit botëror”, sidomos në zona e rajone ku ka mosmarrëveshje, tensione, konflikte dhe aleanca anti-perëndimore. Skeptikët anti-Trump, në anën tjetër, parashohin një qeverisje problematike të Amerikës dhe një kaos global lidhur me paqen dhe sigurinë. Të gjithë po përpiqen të “parashikojnë” diçka më shumë në paparashikueshmërinë e Trump dhe çdo shtet e komb është në proces përkthimi të kësaj fitoreje në raport me interesat lokale. Më tej akoma, politikanë të caktuar jo vetëm e kanë “përkthyer” në gjuhën e tyre, por po e paraqesin në disa raste edhe si zgjatim të imazhit dhe të ardhmes së tyre “të ndritur” politike.