Pas 13 viteve në opozitë, PD nis sezonin e përjashtimeve

Pas 13 viteve në opozitë, Partia Demokratike po futet në një korsi të rrezikshme të ruajtjes së rradhëve dhe përjashtimit të atyre që sfidojnë lidershipin. Ndërkohë që gjithçka rreth nesh po ndryshon, PD pritet që në Maj të rimandatojë në krye Sali Berishën. Ky proces që po shoqërohet me largime të “armiqve” të brendshëm, nuk sjell as rritje, as freskim të kësaj force politike, as shpresë dhe besim tek e nesërmja Artemis II ndryshoi botën, shkoi më larg se kushdo tjetër në hapësirë, solli pamje e perspektiva që nuk i kishte rrokur syri i njeriut deri më tani, të anës së errët të Hënës dhe foto spektakolare të planetit tonë. 4 austronautët u kthyen pas 9 ditësh dhe treguan impresionet e tyre. Futbolli po ndryshon. Piramida ushqimore nuk është më e njëjta. Jeta ka kapërcime të frikshme prej teknologjisë. Viktor Orban në Hungari humbi zgjedhjet pas 16 vitesh, edhe pse kishte mbështetjen personale të Donald Trump dhe të gjithë establishmentit atje, mediave dhe oligarkëve. Vetëm në Shqipëri mbetet gjithçka siç ka qënë. Edi Rama me propagandën e rezultateve të mëdha. Dhe me Partinë Demokratike që bëhet gati të rimandatojë në krye të saj, muajin tjetër, Sali Berishën, tashmë 82 vjeç. Dhe pos kësaj, aty kanë nisur përjashtimet. Kjo parti ka përvojë të pasur në këtë drejtim. Por këto largimet e fundit duket se dhembin më shumë pasi PD është në ditën që i duhet krejt e kundërta. Eshtë në kohën që s’mund ta kishte në fjalorin e saj, as në komunikim, këtë term. Vetë përmendja në publik krijon një bezdi më shumë, një rrudhje buzësh, një shije të keqe. Padyshim se ka raste, pas 13 vitesh në opozitë, kur elementë të PD joshen apo vendosin të kenë bashkëpunim me qeverinë. Dhe normalisht këta nuk duhet të kenw të bëjnë me partinë, me aksionin e saj, me opozitën. Sepse kanë bërë zgjedhje, kanë kaluar në kampin tjetër. Por, largimi i tyre, heqja nga regjistrat, mund të ekzekutohej pa zhurmë, në heshtje. Ndërkohë që duket se kemi të bëjmë me një fushatë. Fushatë që nisi, pasi Ervin Salianji filloi një lëvizje sfiduese për lidershipin. Dhe këtu mori jetë hetimi i njerëzve që po e mbështesin. U identifikuan, dhe atyre ju gjet më tej prova që kanë kryer akte kundër demokratëve. Vetë Berisha është shprehur disa herë se për këtë soj, nuk duhet të kemi asnjë kompleks, asnjë mëshirë. Terma luftarakë. Goditjet më të forta ishin në Durrës dhe Elbasan. Dritan Burgija dhe Arlind Boshku janë dy prej demokratëve të njohur në qytetin e Durrësit me angazhim që prej rinisë së hershme aty. Së fundmi ata ishin zgjedhur anëtarë të Këshillit Bashkiak. Pa nisur Salianji lëvizjen, për ta nuk kishte dyshime, as qortime, as denoncime. Kur ish-deputeti filloi takimet dhe ata e pritën në Durrës, atëherë rezultoi se kishin bashkëpunuar me qeverinë dhe kishin votuar në Këshill në favor të kundërshtarëve. U mor vendimi. Dhe ky vendim u mbrojt në publik nga Sali Berisha dhe Flamur Noka. Po ashtu, në Elbasan u zbulua një grupim që nuk duhej të ishte më pjesë e PD. E para, Doris Madhi, kryesuese e këshilltarëve demokratë në Këshillin Bashkiak. Më tej, ish-deputetja Zheni Gjergji, e cila u emërua Drejtoreshë e Spitalit Rajonal të Elbasanit. Rudina Alla, Kryetare e Forumit të Gruas, apo Alesia Balliu, një zë i spikatur që ka kohë që kritikon Berishën dhe Flamur Nokën në daljet e saj publike, dhe që ka shpallur ambicien për të kandiduar në garën për kreun e demokratëve në Maj. Për Madhin motivi zyrtar ishte se ka bërë fushatë në zgjedhjet e fundit për partinë e Tom Doshit. Për doktoreshën Gjergji, duhet të jetë pranimi nga ana e saj, i detyrës së Drejtoreshës së Spitalit të Elbasanit. Ndërsa publikisht nuk është thënë diçka për rastin e Balliut apo Allës, po ato njihen si mbështetëse të Salianjit, dhe kjo mesa duket mjafton. Pasi ndërmorën këtë kryqëzatë, me efekt në publik shumë më të madh se sa pesha e emrave konkretë, drejtuesit e PD dhe Berisha dolën me një kthesë të butë, kur nisën një riorganizim në degë e struktura, duke lënë detyra për anëtarësime të reja. Sipas lidershipit, ka shumë, ka mijëra që kërkojnë të bëhen pjesë e PD. Deri tani, në publik dhe media nuk kemi parë ende të tillë. Salianji, i përjashtuari i madh Pasi kreu dënimin prej 9 muajsh në burgun e Fierit, për shkak të denoncimit që bëri ndaj ish-Ministrit të Brendshëm dhe vëllait të tij, Ervin Salianji qëndroi vetëm pak muaj në qetësi. Nga fundi i vitit 2025 ai nisi një lëvizje me disa takime që nuk ishin as të pafajshme, as spontane. Në krye, ai u shfaq në një foto me disa demokratë që kishin marrë shumë vota në primare dhe shumë vota në zgjedhje, por që nuk ishin në listën fituese të PD. Ky ishte tharmi ku ai ngjizi më tej lëvizjen. Pse më të votuarit nuk janë në listë, dhe janë aty të tjerë?! Pra, zhdukja e meritës. Me shpejtësi të rrufeshme, Berisha ja doli të largojë nga Salianji disa prej “themeluesve” dhe t’i kthejë në gjirin e tij. Si përshembull, doktorin Ilir Alimehmeti, i cili pas dy takimeve që pati me rebelët nëpër rrethe, u shfaq më tej dendur në krahun e djathtë të kryedemokratit, dhe sot besohet se do të jetë kandidati i PD për zgjedhjet për Bashkinë e Tiranës që do të mbahen vitin tjetër. Po ashtu, edhe i spikaturi Aulon Kalaja, pas disa takimeve me Salianjin, shihet gjithnjë e më pranë PD-së dhe Berishës. Në një nga mitingjet e mëdha para Kryeministrisë, ai ishte folësi kryesor. Por Salianji nuk u dorëzua. Disa qëndrime në intervista e dalje televizive ishin kritike, por deri këtu nuk kishte asnjë problem. Edhe pse kishte akuza të ashpra, ai vijoi të ishte pjesë e Kryesisë së PD madje të shkonte dhe në mbledhje. Gjithçka ndryshoi kur ai mbajti takime masive, ku sallat mbushen plot. Kjo krijoi shqetësim në lidershipin e PD. Salianji po mbushte të njëjtat aula që mbushte dhe Sali Berisha. Në Durrës, në Korçë, në Fier, në Elbasan, në Shkodër, në Lezhë. Ishte një sfidë e hapur. Shto këtu retorikën dhe mesazhin e tij kryesor. Që PD duhet bërë fituese, jo një parti që vetëm denoncon e justifikohet pas rezultatit. Sipas Salianjit zgjedhjet mund të fitohen edhe pse përballë është një regjim si i Edi Ramës. Me këto, ai ngacmoi më shumë se duhet, shkoi më larg se duhet. Dhe u konsiderua si i vetëpërjashtuar. Fabula ishte se Salianji bashkëpunon me qeverinë dhe krimin e organizuar. Me Ergys Agasin e Suel Çelën. Akuzat e replikat nuk munguan. Berisha nxori në shesh pjesë nga bisedat private me të, dhe në të njëjtën mënyrë u përgjigj dhe Salianji. Tani s’ka më paqe mes tyre. Vija e kuqe është kaluar. Ka momentalisht një si tërheqje, një rënie ritmi në lëvizjen e tij. Me gjasë do të jetë duke pritur që zyrtarisht t’i bëhet e pamundur që të kandidojë në Maj për kreun e PDSH. Pasi të marrë këtë përjashtim me letra, besohet se Salianji do t’i kthehet sërish takimeve me bazën dhe tureve nëpër qytete. Rikonfirmimi i Sali Berishës në krye, padyshim se do të krijojë një moment tjetër pakënaqësie tek një shtresë demokratësh. Dhe pas kësaj, ata ndoshta nuk do të kenë më hezitim t’i bashkohen një lëvizje kundërshtuese si e Salianjit, edhe nëse deri më tani nuk ishin 100 përqind dakort me të. Kjo strategji me gjasë justifikon qetësinë dhe heshtjen e këtyre ditëve. Ama në rastin më të parë, siç ishte ajo e ndryshimit që ndodhi në Hungari, Salianji qe i pari që reagoi. Mesazhi nga Budapesti sigurisht që prek dhe Edi Ramën një njeri që aplikon të njëjtat metoda si Orban dhe me të njëjtën jetëgjatësi në pushtet. Por më së shumti, ky mesazh adreson, apelon demokratët, pasi doli e qartë që me një lider të ri siç ndodhi në Hungari, mund të fitohet, mund të rrëzohet edhe një njeri-mit siç ishte Orban. Salianji qe i pari që bëri këtë përkthim në një qwndrim publik. Dhe nuk është rastësi që lidershipi i PD nuk kishte ndonjë gjë për të përshëndetur dhe vonoi shumë në reagimin për këtë ngjarje, që në fakt u bë botërore, pasi BBC dhe CNN qendruan pothuajse gjithë ditën e dielë të 12 prillit në raportim live nga Budapesti. Edi Rama mban gjithnjë një derë hapur për demokratët Në këtë atmosferë që zien në PD, Edi Rama nuk harron asnjëherë të mbajë një derë hapur për demokratët. E ka pjesë të mesazhit të tij. Dhe ka raste kur mes socialistësh, ai identifikon rastësisht ndonjë nga ata, që është bërë pjesë e tyre. Dhe e shfrytëzon për të ngritur fabulën. Kur dikush nga militantët, i tha në një asamble në kryeqytet, se nuk na duhen ata, Rama iu kthye prerazi: Na duhen, na duhen ata. Nuk janë të paktë ata që Edi Rama ka arritur të fusë në skuadrën e tij nga merkatoja partiake. Pak kohë më parë, bëri drejtues të Hipotekës së Vlorës, ish-Kreun e PD të atij qyteti, Genc Deromemaj. Deromemaj kandidoi për PD për Bashkinë atje, ishte dhe në listën për deputet. Pra një nga më të përfaqësuarit e demokratëve, u bë zgjedhja e Edi Ramës. Pjesë e PD ishte dhe Zamira Sinaj, që shkoi tek rilindja me një fluks nga forumi i PD të Vlorës. Sot, Sinaj është deputete e PS. Megi Balliu e kryesisë së FRPD, është drejtoreshë e një agjensie qeveritare. Po ashtu, drejtoresha aktuale e AZHBR, ka qënë më parë një nga vajzat drejtuese të Forumit Rinor të Partisë Demokratike. Zheni Gjergji, një nga gratë demokrate më të pëlqyera e të votuara në qytetin e Elbasanit, u la jashtë listave nga PD. Edi Rama nuk hezitoi t’i ofronte postin e Drejtoreshës së Spitalit. Mjekësia është një pasion i njohur i doktoreshës. Kur ata bëjnë kapërcimin, marrin indulgjencë të madhe nga Edi Rama dhe kjo është tanimë një strategji, dhe nuk kemi të bëjmë me akte spontane. Joshja për kundërshtarët vijon, teksa brenda PS kanë nisur disa debate, pakënaqësi e ngritje zërash, të cilat më mandatin e katërt qeverisës, Edi Rama duket se i menaxhon, e nuk i lejon të kthehen në kosto. 35 vite parti, 36 vite përjashtime Që me krimin e saj, dhe marrjen e drejtimit, Sali Berisha ka diktuar shpesh zhvillime dramatike në PD me vendimet për përjashtime. Diçka që mesa duket u kthye në një mallkim për atë vetë. Pasi i përjashtuari më i madh i kësaj force politike që solli lirinë dhe demokracinë në vend, ishte ai vetë. Në shtator të vitit 2021, qe pikërisht benjaminimi i tij, Lulzim Basha që vendosi ta largojë nga radhët e Grupit Parlamentar. Akti më i fortë politik i Bashës ishte pikërisht kundër “babait”. Ish-kryetari vendoste ta “vriste” atë, pasi u shpall non-grata nga SHBA. Ato orë, ato ditë, me siguri në një fraksion të kohës, Sali Berishës duhet t’i kenë shkuar në mendje, të gjithë ata që ai vetë kishte larguar nga PD në kohë të ndryshme. Në vitin 1992 u përjashtua Gramoz Pashko, Arben Imami, me grupin e mocionistëve. Me Neritan Cekën, Perikli Tetën, Preç Zogajn, Ridvan Peshkëpinë dhe disa intelektualë të kohës ata krijuan partinë Aleanca Demokratike. Po në vitin 1995, PD përjashtoi kryetarin e saj Eduart Selami. Po dhe Petrit Kalakulën e Abdi Baletën. Në vitin 1997, themeluesin Azem Hajdari. Ai nisi një lëvizje sindikaliste që nuk i pëlqeu Berishës. Po ashtu një flusk prej 14 deputetësh u larguan, ata që firmosën një promemorie me qëndrim kritik ndaj lidershipit, mes tyre Dashamir Shehi, Tomorr Malasi, Alfred Serreqi. Në vitet 2000 pati një tjetër erozion, me Genc Pollon, Tritan Shehun, Ferdinand Xhaferrin. Ishte po Sali Berisha që pati instiktin dhe vizionin e rikthimit e bashkimit me shumë prej tyre, në fund të 8 viteve opozitë, kur para zgjedhjeve të 2005, u shfaq në një front me ta, ku spikaste përshembull ardhja e Arben Imamit. Por sot, shanset që të ketë një valë dramatike rikthimi, përmbysje, ku të larguar, themelues, apo emra të spikatur nga shoqëria civile të afrohen në PD, duken shumë të vakëta. Eshtë mesa duket kohë tjetër. Për të ruajtur radhët, jo për të ardhur në pushtet.

Pas 13 viteve në opozitë, PD nis sezonin e përjashtimeve

Newsbomb.al

Artikuj të ngjashëm Artikuj

Historia e protestave nga ’90: Çdo brez, revoltën e vet

Donald Trump si “patronazhist”, apo “qëndrestar”? Ku po gabojnë politikanët

MEGASKANDALI/ Xarrë, Flamuri grek që valëvitet prej falsifikimit

Kur Super-Leku bëhet Super-Problem

Agon Maliqi: Shantazhet e Vuçiç mbaruan, por Perëndimi duhet të jetë i qartë

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

PROTESTA E MEMEVE TË TALLESH NË ZGRIPIN E PAMUNDËSISË

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Pas 13 viteve në opozitë, PD nis sezonin e përjashtimeve

Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?