Agon Maliqi: Shantazhet e Vuçiç mbaruan, por Perëndimi duhet të jetë i qartë  

Një zë racional dhe një analist sqimatar i zhvillimeve politike në rajon, Agon Maliqi është ndër ata njerëz që mendojnë se Kosova dhe Shqipëria duhet të afrojnë qasjen politike të zhvillimeve në rajon, pavarësisht se e sheh pozicionin delikat të Shqipërisë si anëtare e NATO-s për të mos i “fryrë zjarrit të luftës” sikurse ndokush mund të kërkoj në Prishtinë e gjetkë. Por për Maliqin është ora e shqiptarëve. Me autogolin serb pas sulmit të Banjskës, kushdo në perëndim e sheh të dobësuar influencën ruse në Ballkan. Tani, mendjet e ftohta dhe të logjikshme duhet të lexojnë realitetin e ri, jo për një rend të ri, por për një mënyrë të re të menduari që do të prosperojë shqiptarët kudo ata ndodhen…

15 vjet pas pavarësisë, Kosova gjendet në një udhëkryq jo pak të rrezikshëm. Sulmi terrorist në Banjskë riktheu destabilitetin në marrëdhëniet mes Prishtinës dhe Beogradit. Nuk ishte diçka e panjohur ndërsa një muaj para kësaj ngjarjeje, policët e Kosovës u morën peng nga forcat e ushtrisë serbe brenda territorit të Kosovës, e ndërkohë propaganda serbe kishte rritur tonet e akuzave për “genocid” ndaj popullsisë serbe në veri. Janë të gjithë elementë se diçka e madhe po përgatitej. Informacioni siç duket ishte, por a mund të themi se nuk u lexuan qartësisht?