GYLENISTET, halli i madh i Edi Ramës

Në 2019, liderët botërorë të NATO-s pritën gjysëm ore që Trump e Erdogan të vinin për foton familjare. Kur ata hynë në sallë, u pa të shoqëroheshin nga Edi Rama. Dhe ai, siç duket, në rolin e ndërmjetësuesit për shkak të miqësisë së madhe me Erdogan. Po cilat janë bizneset gyleniste në Shqipëri? Kë duhet të tradhëtojë Edi Rama për Erdogan? Një gazetë turke nxjerr hartën e tyre në Shqipëri, vetëm pesë ditë pas vizitës së presidentit Turk në Tiranë… Ishte mesdita e 4 dhjetorit 2019, kur 27 drejtuesit më të lartë të shteteve anëtare të NATO-s prisnin tre liderë. Ata ishin vendosur për të bërë foton familjare në hotelin Grove në Watford, një zonë në Lodër, ku po zhvillohej samiti Britani – NATO. Kancelarja gjermane Angela Merkel, dhe presidenti francez Emanuel Macron, madje edhe mikpritësi Boris Jonson, ishin mes atyre që prisnin për një foto. Tre anëtarë të aleancës, nuk kishin mbërritur akoma. Bëhej fjalë për drejtuesit e dy superfuqive, dhe një kryeministri të një vendi të vogël. Donald Trump, ish-Presidenti i SHBA, Taip Erdogan, president i Turqisë, dhe Edi Rama, kryeministër i Shqipërisë, erdhën gjysëm ore me vonesë për foton familjare që ju dokumentua gjithë botës nga ai samit i NATO-s. Dhe siç duket qartazi në foto, i pari hyn Erdogan, pas tij, Trump e në fund Edi Rama. Po çfarë i ngjau kryeministrit të Shqipërisë që u fut me vonesë në atë foto familjare? Përveç fotos që u servir nga gjithë mediat ndërkombëtare pakgjë u fol në kohën që u shkrep foto. Ka një të vërtetë të madhe: Rama ishte në takimin që Donal Trump, president i Amerikës, zhvilloi me presidentin e Turqisë Taip Erdogan. Ishin muajt e ethshëm kur Trump kishte tërhequr trupat nga Siria dhe një muaj më vonë, në nëntor 2019, priti në Shtëpinë e Bardhë presidentin Turk, për të cilin atëkohë tha se ishte një “fans i madh” i tij, siç u shpreh publikisht. Vetëm një muaj më vonë, në dritën e këtyre zhvillimeve, Trump dhe Erdogan u takuan sërish, këtë herë në Londër, e në takimin e të dyve, ishte edhe kryeministri i Shqipërisë Edi Rama. *** Nuk është sekret se kryeministri Edi Rama është mik me presidentin Erdogan. Dhe nuk është e para miqësi turko-shqiptare. Në vitin 2004, ish-Kryeministri Fatos Nano dhe ish-kryeministri Italian Silvio Berluskoni ishin dëshmitarë në martesën e djalit të kryeministrit turk atëkohë, përpara se të merrte pozicionin e presidentit të Turqisë. Pas firmës simbolike familjare, erdhën shumë investime turke në Shqipëri, një prej të cilave, Albtelekom. Më vonë, pas 2005, edhe pse Berisha deklaroi se do rishikonte kontratën me turqit për Albtelekom, nuk arriti të bënte dot gjë. Përkundrazi, koncesionin më të madh, ndërtimin e rrugës së kombit, ia dha firmave turke, pas vizitës së parë jashtë vendit që bëri si kryeministër, e që ishte në Turqi me ftesën e kryeministrit Erdogan. Koha e artë e marrëdhënieve vazhdoi, aq sa kryeministri Sali Berisha, për habi të të gjithëve e ftoi kryeministrin Erdogan të vinte në 100 vjetorin e festimeve të pavarësisë së Shqipërisë… nga Turqia. Ardhja e Ramës në krye të qeverisë në 2013, nuk e ndryshoi kursin e marrëdhënieve dypalëshe. Madje, sikurse paraardhësi i tij socialist, Fatos Nano, Edi Rama ishte dëshmitar në martesën e vajzës së kryeministrit Erdogan në 13 maj 2016, në një ceremoni me 6000 të ftuar dhe nën masa të rrepta sigurie. Sikurse vetë Rama deklaroi në takimin e fundit që kishte me Erdogan paraditen e 17 janarit 2022, ata janë takuar fillimisht kur Rama ishte ende kryetar i opozitës. “Të them të drejtën unë isha i ndrojtur pasi e kisha parë nga televizori dhe nuk dukej shumë i qeshur. Dhe kur u takuam më shikonte, por nuk buzëqeshte. Dhe unë akoma nuk isha bërë Kryeministër dhe më thotë dëgjo këtu “Shqipëria dhe Kosova janë në zemrën time, shqiptarët janë në zemrën e popullit turk dhe unë dëshiroj të jesh vëllai im dhe unë do të të them vëlla kur t’i si kryeministër të fitosh respektin e popullit tënd”, kujtoi Edi Rama nga ai takim i parë. Ka një lloj magjepsjeje mes dy liderëve. Rama deklaron se e ka shumë mik presidentin Erdogan. Të njëjtën gjë thotë dhe ky i fundit. Por ndërsa pjesa e marrëdhënieve miqësore ecën në shinat që Ramës i besohet të ndërhyjë te Erdogan edhe për konflikte ndërkombëtare, në aspektin e brendshëm, Erdogan ia tha troç se nuk i pëlqen që Gylenistët në Shqipëri kanë fituar terren. Tej kësaj, diplomatët thonë se të tjera çështje janë në lojë. Acarimi i marrëdhënieve të NATO-s me Rusinë muaj e fundit, po rrit valencën e Turqisë për të mbajtur Ballkanin larg këtyre zhvillimeve. Ndërsa për pabindjen e Erdogan në shumë çështje, gjendet “ilaçi”: Edi Rama mund të jetë një interlokutor i jashtëzakonshëm mes tij dhe liderëve perëndimore. Madje edhe për kancelaren gjermane Angela Merkel, vitaliteti i Ramës për të negociuar me Erdoganin që i linte pa karrige zyrtarët evropianë, ishte një zgjidhje. E ndërkohë që Ramës i pëlqen pozicioni ndërmjetësues që ka marrë në arenën ndërkombëtare për shkak të raportit miqësor me Erdogan, këtu brenda vendit, presidenti turk ishte i qartë dhe i prerë sesi donte të evolonin çështjet. “Në takimet tona nënvizuam luftën tonë kundër organizatës terroriste FETO, që tentoi në 2015 një grusht shteti që donte të rrëzonte demokracinë tonë. Është e qartë që kjo strukturë e cila i ka duart e lyera me gjakun e të pafajshmëve përbën kërcënim jo vetëm për Turqinë, por edhe vendet ku është e pranishme. Fakti që FETO është ende në gjendje të gjejë fushë veprimi në vendin mik e vëlla, e lëndon thellë vendin tonë. Pritshmëria jonë është që të ndërmerren hapa më të shpejtë dhe më konkretë kundër FETO-s në Shqipëri”, tha Erdogan në 17 janar 2022. Kush janë gylenistët? A ka dalë ndonjëherë ndonjë listë të gylenistëve që pretendohet se operojnë në vendin tonë? Zyrtarisht, asnjëherë nuk është bërë publike. Një listë e tillë mund të vërtitet në zyrat e qeveritarëve, apo në listat e kërkesave të ambasadës turke në Tiranë drejt qeverisë, por gjithmonë nën dorë. Vetëm 5 ditë pas vizitës së liderit Erdogan në Shqipëri, në 22 janar 2022, një gazetë proqeveritare në Turqi, “Dirilis Postasi” nxjerr një hartë të bazave të lëvizjes FETO në Shqipëri, të shkollave të mbështetura nga lëvizja Gyleniste, por edhe biznese dhe OJQ që Turqia beson se janë të sponorizuara nga lëvizja FETO. Shkrimi në median turke Pas diktaturës së Enver Hoxhës, organizata FETO që kërkon të ndërmarrë avantazh në vakumin edukativ dhe fetar në Shqipëri, u vendos në vend që në vitin 1990. U shfrytëzua dashuria e shqiptarëve për Turqinë dhe turqit dhe u rrit kërkesa për hapjen e shkollave nga organizata FETO. Shqiptarët shkuan në këto shkolla, jo se ishin fansa të FETO, por për shkak të besnikërisë ndaj Turqisë. Megjithatë, pas grushtit të shtetit të 15 korrikut 2015, shqiptarët reaguan menjëherë. Shumë fëmijë ikën nga këto shkolla. Edhe qeveria e Shqipërisë dha mesazhin se kushdo që është armik për Turqinë, është armik edhe për ne. Edhe pse institucionet e FETO nuk janë aq popullore sa ç’kanë qenë më parë, ato vazhdojnë të jenë ende shumë aktive. Anëtarët e FETO që hynë në vend së bashku me Fondacionin Gylen, në vitin 1993, hapën “Mehmet Akif College” në kryeqytet; po në të njëjtin vit hapën kolegjin “Turgut Ozal” dhe “Draç” në 1997. Në vitin 2001 në Shkodër hapën kolegjin “Hasan Riza Pasha”. Po në vitin 2001 u hap nga FETO-istët “Memorial International School Tirana” (MIST) ku shkonin fëmijët e shtresave më të pasura, që influencojnë në bizneset kryesore, qarqet politiko-ekonomike të vendit. Një nga liderët e FETO, Mustafa Ozcan, një kriptomenaxher në Turqi dhe Ballkan dhe Noman Gulen, nipi i liderit të FETO, Fetullah Gylen ishin mes menaxherëve të këtyre institucioneve. Në vitin 1994, u krijua fondacioni SEMA po nga anëtarët e organizatës FETO. Anëtarë të komunitetit FETO janë edhe tek Komuniteti Mysliman shqiptar, duke përfshirë edhe strukturat e tij dhe administratën që kur kanë filluar të operojnë në vend. FETO mori mederesetë e KMSH në qytetet e Kavajës, Korçës, Beratit, Elbasanit, Tiranës, nën organizatën Sema. U hap një dritare e re e mbledhjes së të ardhurave si donacione. FETO u bë shumë aktive në KMSH, duke siguruar që edhe një person që nuk ishte teolog të zgjidhej president i KMSH në zgjedhjet e brendshme. 14 organizata janë në operim Sot ka 14 organizata aktive në Shqipëri, duke përfshirë dy universitete, “Beder” dhe “Epoka”; pesë kolegje (parashkollor dhe parauniversitar), 5 medrese, dhe 2 kurse gjuhësh. Ka 7 mijë studentë që po rriten në këto institucione të drejtuara nga FETO, ku 2 mijë prej tyre janë në edukimin e lartë. Disa nga kompanitë dhe institucionet me të cilat FETO operon në Shqipëri janë: Organizata jo-qeveritare Horizontet e reja: Anëtarët e FETO e krijuan atë në 2005. Përdoret për të organizuar dhe mbledhur së bashku njerëz, për t’i lidhur së bashku dhe për të pasur informacion edhe për jetët e tyre. ACITAD: ky institucion që është krijuar nga njerëzit e FETO është quajtur prej tyre edhe si “Dhoma e tregtisë” për shkak të shumë kompanive që erdhën në Shqipëri nga Turqia për biznes. ACITAD, që filloi të shohë për gjëra të reja pas grushtit të shtetit të 15 korrikut, parashikon mbështetje për financat e organizatës duke kapur investitorë lokalë që besojnë tek FETO, si bashkëpunimi me rajonet ku jetojnë shqiptarë, duke investuar te rinia shqiptare. Fondacioni SEMA, është një tjetër organizatë e fortë që operon në Shqipëri. Financon medresetë dhe Universitetin Beder. Fondacioni i Edukimit Gylenist vepron si një ombrellë për shkolla të tjera dhe për t’i financuar ato. Sektori Privat Turgut Ozal Sh.a.: Kjo kompani që është një nga organizatat ombrella për shkollat FETO në Shqipëri, përfshin universitetin “Epoka”, kolegjin në Tiranë “Turgut Ozal”, kolegjin “Turgut Ozal” në Durrës dhe Shkollën Internacionale Memorial. Spitali amerikan: kjo strukturë që është spitali privat më i madh në Shqipëri ka mbështetje të fuqishme financiare. Të tjerë: Në vijim të këtyre dy bizneseve të mëdha në Shqipëri ka shumë kompani dhe biznese të tjera që parashikojnë financime për organizatën. Media Anëtarët e FETO kanë infiltruar në media ashtu si në çdo sektor tjetër dhe njerëzit e tyre i kanë vendosur në pozicione shumë të rëndësishme. Platforma online Albeu operon nën drejtimin e organizatës. Ata kontrollojnë dhe Departamentin e Gazetarisë në Universitetin e Tiranës dhe dominojnë në media duke punësuar figura shumë influente në Universitete shtetërore dhe në universitetet e tyre. Publikime dhe libra Shtëpia botuese “Prizmi” vazhdon punon në mënyrë aktive në Shqipëri në mënyrë që të përdorë dhe të shpërndajë librat që i përkasin liderit të FETO, Fetullah Gylen. Ka dhe një website shqiptar që i përket FETO. Në këto website përveç përkthimeve dhe shkrimeve të Gylen, ka edhe fjalime të tij të përjavshme. (Ky është artikulli botuar në revistën turke) E vërteta e madhe Sipas raportimit të medias turke në datën 22 janar 2022, vetëm pesë ditë pas vizitës së Erdogan në Shqipëri, panorama bëhet më e qartë për ata që Turqia kërkon të mos fitojnë terren në Shqipëri. E bëhet fjalë për biznese të mëdha, për Komunitetin Mysliman Shqiptar, për Universitete e kolegje që operojnë gjerësisht në Shqipëri, dhe për fondacione që sipas Turqisë ushqehen me paratë e lëvizjes gyleniste. Këtu, kryeministri Edi Rama ndodhet vërtet në hall. Në fund të fundit, të gjithë të përmendurit nga Erdogan, edhe pse jo nominalisht me emra, janë biznese të konsoliduara në Shqipëri. Universitetet kanë shumë studentë, staf akademik profesional dhe zgjerim edhe më të madh sesa universitetet shtetërore. Po kështu edhe kolegjet: ato arrijnë të thithin gjithmonë e më shumë fëmijë për shkak të rregullave strikte të mësimdhënies e disiplinës. Për të mos folur për spitalin Amerikan që është një ndër bizneset më të fuqishme në Shqipëri, ku mjekët e punësuar janë ajka e elitës shëndetësore në vend, e ku shërbimet e këtij spitali privat, i marrin jo vetëm qytetarët e thjeshtë, por edhe qeveritarët. Komuniteti Mysliman është një çështje më vete. Aty, gjithçka ndodh me votë dhe të zgjedhurit në të, dalin nga komuniteti i imamëve dhe hoxhallarëve. Të gjithë këto institucione janë ngritur dhe konsoliduar. Nuk mund të besohet asesi që Edi Rama dhe qeveria shqiptare të arrijë t’i mbyllë ato me një të rënë të lapsit. Si do të garantohet Turqia që këto institucione të fuqishme financiare të mos kryejnë aktivitetin e tyre normalisht. Shkollat dhe universitetet janë të licensuara dhe përmbushin standartet. Po kështu, edhe bizneset e tjera të supozuara si të sponsorizuara nga gylenistët. Struktura paralele Turqia e ka të qartë se historia e mbylljes së shkollave të kërkuara në listë si gyleniste, nuk është e lehtë. Për këtë arsye, në vitin 2016, në betejën e vërtetë për arsimin, krijoi fondacionin “Maarif” që të merrte administrimin e shkollave ekzistuese që sipas Turqisë, ishin nën ndikimin e FETO. Fondacioni arriti të marrë Universitetin New York Tirana, gjimnazet New York High School dhe “IMSA High School Elbasan” dhe institucione të tjera mësimore. Në një rrjet që deri tani vlerësohet me 1500 nxënës. TIKA, Agjencia Turke për Zhvillim dhe Kordinim është një tjetër instrument që përdor Turqia për ekspansion në Shqipëri. Sipas ambasadorit Murat Ahmet Yoruk, TIKA që nga viti 1996 ka realizuar mbi 546 projekte në Shqipëri që kapin shifrën e 20 milionë eurove. E fundit, ishte restaurimi i Xhamisë kryesore në kryeqytet e inauguaruar pak ditë më parë nga Presidenti Erdogan dhe kryeministri Edi Rama por pa prezencën e asnjë imami, apo përfaqësuesi të komunitetit mysliman, për shkak të dyshimeve që ka Turqia për lidhjet e tyre me gylenistët.

GYLENISTET, halli i madh i Edi Ramës

Nga Newsbomb.al

Artikuj të ngjashëm Artikuj

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

“GOGOLI” McGonigal dhe vullkani i ndezur i Ballkanit

GJERMANI – SHQIPËRI, Një marrëdhënie e veçantë?

RAPORTI SEKRET, Britanikët: “18 mijë çam u dëbuan, 800 u vranë”, si u krye genocidi grek në Shqipëri

Presidenti i ri, historia dhe skenarët

Berisha, a mund të ngrihet sërish sfinksi?

Artikujt më të lexuar

SONDAZHI/ Si ndahen votat për Tiranën e Shqipërinë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

DITARI I NJË NËNE QË VUAN, 22 vjet në kërkim të së vërtetës

Shpellat e jugut, monumente të braktisura dhe të harruara nga shteti

Të pathënat e ekzekutimit të biznesmenit nga turisti-vrasës

Banka Botërore, “dhuratë” qeverisë para zgjedhjeve

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

GYLENISTET, halli i madh i Edi Ramës

Nga Newsbomb.al

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?