Gjykatësi që dha tre dënime me vdekje

Shaqir Hasani është një nga gjykatësit e parë të Shqipërisë që kishte dalë nga komunizmi, që do t’i duhej të jepte dënime për ata që kishin urdhëruar e dënuar me burg, pushkatime edhe pa gjyq e tortura për mijëra shqiptarë. Sa dhe si do të duhet ta dënojë Nexhmije Hoxhën, të venë e diktatorit, apo edhe një gjyqtar që kishte marr vendime për pushkatime dhe ekzekutime në grupe si Aranit Çela? Shaqir Hasani do të duhej të zgjidhte pikërisht këto pikëpyetje pas rënies së diktaturës. “Unë jam Shaqir Hasani dhe vij nga një trevë me shumë vlera si Malësia e Madhe. Unë jam ish, se jemi bërë me shumë isha përpara sepse jam ish i përndjekur, ish gjyqtar dhe ish avokat. Unë vija nga familje fisnike që kisha bërë nga ata 93 vite burg, por si gjykatës jam përpjekur t’i gjykoj njerëzisht. I pandehuri Aranit Çela pinte me një kanaçe nën tavolinë. I thashë vëre mbi tavolinë se ne nuk jemi si ju, s’kemi ardhur të hakmerremi. Aranit Çela kishte pushkatuar njerëz, se plumbin e fundit e jepte prokurori. U kishte dhënë 11 vetave plumb pas koke, e ndonjë e kishte futur gjallë në dhe”, tregon Hasani ndër kujtimet që ka nga gjykimi i Çelës duke theksuar se për të tillë njerës përveçse burg përjetë nuk mund të jepte.