Gjushi, hekurthyesi i votave të Durrësit, pas hekurave

Vangjush Dako ishte vetëm 41 vjeç kur u shfaq për herë të parë si ylli shkëlqyes i socialistëve kur këta të fundit ishin në opozitë. Fitoi bashkinë e Durrësit në një kohë që vendin e drejtonte PD e Sali Berisha. Pas votimeve të para, votat e tij veç shtoheshin. Edi Rama e deklaroi mik të përbëtuar ndërkohë që SHBA e shpalli “Non Grata”. Po kush ishin ulje-ngritjet politike të njeriut më të pushtetshëm të socialistëve, i akuzuar disa herë për lidhje me krimin dhe gjithmonë i dalë si “i palagur” nga akuzat. Një profil i detajuar i politikanit që pak ditë më parë përfundoi pas qelive të ftohta të burgut…

Vangjush Dako nuk priti që policia të zbarkonte në shtëpinë e tij për t’i vënë prangat. Lajmi për një arrestim të mundshëm të tij u shpërnda në mënyrë të rrufeshme në rrethet mediatike e politike në Tiranë e Durrës. Askush nuk e di me siguri, sesi lajmi rrodhi nga godina e xhamtë e SPAK. Në zhurmën e madhe politiko-mediatike që u zhvillua, një fakt është i pakundërshtueshëm: Vangush Dako, politikani vendor më i fuqishëm në Durrës, e dinte me siguri se do të prangosej. Ndaj zgjodhi të vetëdorëzohej. Mesditën e 6 qershorit 2023, bashkë me avokatin e tij, ish qytetari i parë i Durrësit u ndalua në dyert e policisë së Tiranës. U vendos në një nga qelitë e izolimit në policinë e Tiranës. E zyrtarët e kësaj të fundit, u kujdesën që të mbanin imazhin e Dakos larg syrit të publikut. Pasi një “perde” u shpalos në anë të godinës për të penguar objektivët e kamerave dhe aparateve që ishin fokusuar me shpresën për të shkëputur një foto të njeriut që thuhet se ishte këmbësi i kryeministrit Edi Rama në Durrës, e një prej miqve të tij më të ngushtë. Dako u akuzua se kishte lejuar ndërtimin e një pallati pa leje, godinë që ishte dëmtuar rëndë nga tërmeti tragjik i 26 nëntorit 2019, si dhe për dyshimet se kishte shpërdoruar detyrën duke i shkaktuar dëm buxhetit të Bashkisë për një tender, për Promenadën, një projekt që kishte synim rehabilitimin e bregut të Currilave, por që mbeti ne letër.