“Gardhet” politike të Artan Lames

Xhaketa ushtarake i shkon shumë. Jo për të treguar se ai do t’i ngjajë një ushtaraku. As bëhet fjalë. Gjeneral e sipër. Por del me këtë performancë në konferencat për shtyp për të treguar se shteti është një gjë e rëndësishme për t’u lënë në dorë të dallaverexhinjve, maskarenjve, matrapazëve.

Shumë prej atyre që e lexojnë mund të qeshin me këtë qasje, e të ngrenë gishtin e akuzës kah Lames për të dizenjuar pikërisht këtë “kostum shtetari”. Përnjimend legalizimet e hipotekat kanë qenë gangrena më e madhe e shqiptarëve. Por ta shohësh situatën me syzet e para 10 viteve, ku shkallët e çdo institucioni të legalizimeve vinin era shurrë falë matrapazëve, sekserëve, dallaverexhinjve që kishin hall të mos iknin nga institucioni se bashkë me legalizimet iknin dhe lekët, dhe të bësh bilancin 10 vite më vonë, do të të duhet një tjetër qasje.