Ethem Ruka “skanon” PS e Ramës: Të vjetrit do mbledhin vota, të rinjtë rigjenerojnë partinë

Në zyrën e ndriçuar lehtë nga dritat e pasdites, profesor Ethem Ruka, një nga themeluesit e Partisë Socialiste, na pret me qetësinë e dikujt që ka parë gjithçka: sukseset, dështimet, shpresat e thyera, dhe rilindjen. Ai nuk është thjesht një figurë politike, por një histori e gjallë që flet për sfidat e një vendi në përpjekje për të gjetur drejtimin e tij në botën moderne.

Sot në gjithë debatet e tryezave, aty ku njerëzit konsumojnë më shumë politikë sesa punë, pyetjet e përhershme vërtiten rreth zhvillimeve të qeverisë dhe PS. Mandati i tretë dhe në kërkim një mandat i katërt, padyshim sjell konsumin e një force politike. Në 30 vite tranzicion, një gjë e tillë nuk ka ndodhur kurrë më parë. “Kaq specialistë janë socialistët xhanëm?” është pyetja më standart që të vjen ndërmend teksa tik-tok e platforma të tjera sociale mbushen me deklaratat e të rinjve të angazhuar në PS. Sa nga Helena, të cilës kryetari i PS Edi Rama i deklaroi publikisht se ndoshta një ditë mund të ishte kryetare e PS, aq edhe tek Ilda që nuk gjente asnjë defekt te puna e kryeministrit.