Edi Rama fitoi… po tani?

Rezultati nuk është i papritur. Të gjithë e dinin se socialistët e Edi Ramës do fitonin zgjedhjet. A pritej një fitore kaq e thellë? Skeptikët kam frikë se janë nisur nga shijet e tyre personale, pasi fitorja e qëruar e PS-së nuk qe surprizë. Prandaj, të paktën gazetarët, komentuesit e politikës ditore nuk kanë arsye të kalojnë në pozita mbrojtëse. Gjithkush që shpresoi te heqja e non grata-s apo efekti magjik i SPAK-ut që do të shtynte zgjedhjet në vjeshtë, me gjasë e dinte se këto ishin më shumë ëndërra se sa shpresa.

Prandaj, duhet pranuar me qetësi se Edi Rama fitoi aq sa donte dhe ashtu si donte. Fitoi, sepse sistemi politik që ai ka ngritur tani për tani të jep përshtypjen që përshtatet më së miri me shqiptarin bashkëkohor, i cili ka një dobësi gati skllavëruese për qënien e udhëheqësit. Këtë Edi Rama e ka kuptuar i pari, madje prej shumë kohësh, ndaj shfrytëzoi më së miri dobësitë e kundërshtarëve të tij duke instaluar një rrjet informacioni, matje të opinionit, organizim të partisë që e çon atë në çdo garë elektorale me një avantazh paraprak të thellë. Është njësoj sikur ta nisësh një ndeshje futbolli në humbje 4 me 0. Ligji elektoral që propozoi opozita ia lejon Edi Ramës ta vdesë rotacionin politik qysh në mendjen e atyre që e dëshirojnë. Këtë dhuratë ia bënë atij vetë demokratët, të cilët më shumë hall kishin mos i fuste ujë nën rogozë ndonjë si Basha, ndaj ruajtën më me afsh bipolarizimin e politikës se sa të punonin për ndryshimin e pushtetit.