Dëshira e Agim Ademit: Politikë, Kosovë-Shqipëri bëje një

“Politika të na bashkojë, vetëm disa orë na duhen për një Kombëtare”, këto fjalë kumbuan në veshin, por dhe në mendjen time. Dëshirën e kishte të pastër, të kulluar, ashtu sikurse të gjithë shqiptarët duan. Pasionant, profesionist dhe mjaft i zhdërvjellët. Nuk donte të humbte asnjë minutë. Prej ditësh i kisha kërkuar një intervistë, por kohën fizike e kishte të limituar. Andaj, një ditë më ra telefoni: “Dëgjo, unë po vozis. A mundemi ta bëjmë tani të flasim?” Dukej që Agim Ademi ishte i përpiktë dhe nuk i pëlqentë t’i zvarriste punët. Nuk kishte përgjigje standarte, përkundrazi. Në një rrëfim enkas për revistën Newsbomb.al , tregoi gjashtë vitet në krye të Federatës së Futbollit të Kosovës, por edhe objektivat për të ardhmen. “Dua që një ditë të thuhet që këto u bënë në kohën e Agim Ademit. Kjo do të jetë lumturia ime më e madhe”, tregoi ndër të tjera kreu i FFK-së që nuk ngurroi të shfaqë edhe krenarinë e kënaqësinë që homologu i tij, Armand Duka, është zëvendës president i UEFA-s. E ndërsa presin që një ditë Shqipëri e Kosovë të jenë një, së bashku kanë një projekt konkret “Kupa Nënë Tereza”. - Zoti president! Fillimisht më lejoni t’iu falënderoj që pranuat të bëheshit pjesë e revistës Newsbomb përmes intervistës suaj... Faleminderit ju dhe ndihem i privilegjuar të jem pjesë e agjencisë suaj mediatike në Shqipëri. - Prej vitit 2018-të jeni në krye të Federatës së Futbollit të Kosovës. Si kanë qenë këto vite për ju si drejtuesi i “shtëpisë së futbollit”? Po, është e vërtetë që nga viti 2018-të jam zgjedhur President i Federatës së Futbollit të Kosovës. Prej asokohe e deri më sot, kanë qenë vërtetë vite sfiduese. Por, kanë qenë dhe pozitive duke qenë se kemi bërë shumë për futbollin. Për mua është dhe kënaqësi për faktin që kam qenë dhe më parë pjesë e Federatës. Kam qenë në pozicione të ndryshme dhe në mandatet e fundit, pothuajse për 20 vite zëvendës-president i Federatës. Kam kaluar gjithë zinxhirin e mundshëm në këtë institucion dhe tashmë jam në krye të tij. Siç e dini kam qenë futbollist e më tej, jam bërë president klubi. Më vonë jam bërë pjesë e Federatës. Pra kam një karrierë të gjatë në të gjitha pozicionet. Unë e kam ndarë me etapa qëndrimin tim në këtë institucion. Tashmë është etapa e zhvillimit dhe ne kemi bërë mundur të bëjmë shumëçka pas pranimit në UEFA dhe në FIFA. - FFK-ja ky institucion i rëndësishëm, rregullator dhe mbikëqyrës i sportit të futbollit në Kosovë. Si janë marrëdhëniet me instancat qeverisëse në vend? FFK-ja është OJF, pra është organizatë jo qeveritare dhe plotësisht e pavarur. Është anëtare e FIFA-s dhe UEFA-s. Por, gjithësesi unë jam institucionalist dhe kemi marrëdhënie edhe me shtetin. Përgjithësisht marrëdhëniet kanë qenë të mira. Nuk mund ta mohoj që shpesh ka pasur edhe probleme të natyrave teknike, ku janë ndërruar disa ligje të sportit, disa udhëzime administrative. I kemi përfunduar këto dhe tashmë kemi marrëdhënie solide. - A ka qenë i mjaftueshëm suporti i qeverisë apo si çdo herë, gjithmonë ka vend për përmirësim? Gjithmonë ka nevojë për politikat e shtetit, për aq sa i lejohet këtij të fundit të ndërhyjë në futboll. Siç dihet, sipas statutit të FIFA-s dhe UEFA-s nuk lejohet përfshirja e politikës në sport. Dhe ne, ashtu kemi vepruar. Sigurisht në përgjithësi mund ta vlerësoj si pozitive mbështetjen e qeverisë për futbollin. - Por, mos të harrojmë "Ligjit të Sponsorizimit", kaq i rëndësishëm dhe kaq i trumbetuar në edhe në Shqipëri. Si ka ndikuar implementimi i tij në Kosovë? Ligji i Sponsorizimit është një mrekulli që ka ndodhur për sportin në Kosovë, në veçanti për futbollin si sporti numër një. Ishte Komisioni Parlamentar që e propozoi këtë ligj dhe parlamenti e votoi. Ky ligj normalisht mundësoi lirimin e shtetit nga detyrimet dhe rriti nevojën e sportit për mbështetjen financiare nga bizneset private. Shumë kompani dhe koorporata i janë dedikuar, kanë kontribuar duke e bërë sportin më të pasur, duke mundësuar funksionimin më të sigurt ekonomik. Me një fjalë u bashkua biznesi në sport dhe mundësuan që bashkarisht të funksionojnë shumë më mirë. Implementimi i tij në fillim nuk qe i lehtë, por më pas ndryshuan disa gjëra. - Falë këtij ligji, a mund të na thoni me përafërsi se sa të ardhura ka pasur nga klubet apo investitorët që kontribuojnë në sport? Për këtë nuk kam një shifër të saktë. Megjithatë mund të evidentoj faktin që paratë në të ardhmen do të zhvillojnë dhe do t'i japin një hov të madh zhvillimit të pavarur të sportit. Nuk do të ketë pengesa në çdo shtresë, në çdo hap të fillimit të sportit, qoftë edhe në shkolla. Është më e mirë që talentëve tanë t'u jepet një "dorë" pasi falë këtij ligji, tashmë nuk mungon më përkrahja financiare që dikur ishte ngërç për futbollin e Kosovës. - Në Shqipëri ky ligj ka mbetur në sirtar. Kryeministri Edi Rama e premtoi që do ta realizonte shumë shpejt, por në fakt kanë kaluar më shumë se 2 vite dhe ende asnjë ndryshim. Çfarë do i këshillonit qeverisë shqiptare? Mesazhi im për parlamentarët është që të mos shkojnë shumë larg për një shembull. Mjaftojnë të kthejnë kokën nga Parlamenti i Kosovës dhe të mos ngurrojnë që ta votojnë këtë ligj. Në këtë mënyrë do të heqin një "barrë" prej vetes dhe do të mundësojnë që shumë njerëz të merren me sport. Fëmijët shqiptarë e meritojnë një nxitje në këtë vit që përkon edhe me mrekullinë e Kombëtares sonë në arenën ndërkombëtare. Besoj dhe jam shpresëplotë, që me kërkesën e pashtershme të Armand Dukës, kjo do të arrihet sa më shpejt. - Veç të ardhurave, mbështetur në përvojën tuaj çfarë sjell Ligji i Sponsorizimit? Shumë e thjeshtë, progres dhe vetëm progres. Kampionati kombëtar ngrihet në nivele europiane, por mos të harrojmë dhe ato zinxhire që janë "ushqim" për skuadrat e para. Ku ka financa të shëndosha, edhe investimet në çdo aspekt nuk do të mungojnë. Sport dhe futbolli në veçanti, do të shkojnë shumë përpara, nëse qeveria nuk do të ngurrojë të votojë Ligjin e Sponsorizimeve. - Si ka qenë mbështetja e FIFA-s dhe UEFA-s për Federatën e Kosovës? Si Federata më e re e pranuar në institucionet e futbollit siç janë FIFA dhe UEFA, suporti ka qenë shumë i mirë. Jam falënderues për mbështetjen që kanë dhënë në të gjitha drejtimet, e sidomos në pjesën e projekteve të infrastrukturës, të edukimit dhe zhvillimit. Mund ta them lirisht, që jemi Federatë e privilegjuar pas pranimit në FIFA dhe UEFA. - Infrastruktura nuk duket në ditët më të mira. Çfarë ka ndodhur? Pse po çalon puna për evoluimin e terreneve sportive? Për 50 vite në Kosovë nuk është investuar as në stadiume dhe as në palestra sportive e as në një vend tjetër të sportit. Pas luftës kemi filluar me procedurat e reja dhe sidomos pas pranimit në UEFA dhe në FIFA. Kanë ardhur gjithë projektet infrastrukturore dhe asnjë projekt nuk është refuzuar as nga FIFA dhe as nga UEFA. Sigurisht jam shumë falënderues për këtë - Cilat janë projektet tua në aspektin personal për zhvillimin e infrastrukturës dhe çfarë planesh ka konkretisht FFK-ja për këtë? Unë kam një objektiv. Që në ditën që kam hyrë në këtë institucion dhe tashmë si president i Federatës së Futbollit të Kosovës, dua që vetëm të thuhet që “Kjo është bërë në kohën e Agim Ademit”. Kjo është lumturia ime dhe kjo është pjesa që mua më “rimburson” nëse mund ta them kështu për gjithë lodhjen apo punën në Federatën e Futbollit të Kosovës. Ndihem i plotësuar kur bëj për futbollin dhe bëj për ato pjesë të cilat janë më të ndjeshmet dhe te ne pjesa infrastrukturore ka qenë kryesore. - Kur pritet të kemi një “Fadil Vokrri” të ri modern? Tani stadiumet si në të gjithë vendet e botës janë në kompetencën e shtetit, të buxhetit shtetëror. Ne bëjmë fusha stërvitore ose e thenë ndryshe kozmetikë të futbollit në stadiumet e ndryshme. Në këtë drejtim nga projektet e FIFA-s dhe UEFA-s, kemi marrë fonde dhe jemi duke bërë fusha stërvitore. Shumicën e tyre me bar artificial për faktin se temperaturat në Kosovë nuk janë gjithmonë të mira. Kemi ndihmuar pothuajse të gjitha klubet me fusha. Ne kemi parim që çdo 45 ditë të ndërtojmë një fushë stërvitore. Këtë po e realizojmë ditë pas dite. Sa i përket stadiumeve, kemi rinovuar “Fadil Vokrrin” dhe “Adem Jasharin” në Mitrovicë. Do të ndërtohen stadiumi i Gjilanit, i Drenasit që do të jetë i kategorisë së tretë. Besoj se Ministria ka filluar të punojë në këtë drejtim për të shpallur tenderin fitues. Sigurisht që Federata është aty me pjesën e vet për ndihmë. Ne kemi nënshkruar memorandume bashkëpunimi me të gjitha komunat. Kemi dhe dy projekte të tjera që besoj dhe shpresoj që do të bëhen. Është stadiumi “Nacional” me kompetencën e Ministrisë dhe ne bashkë me Bashkinë e Prishtinës, do të bëjmë një “Fadil Vokërr” të ri që do të ndërtohet nga fillimi. Ne si Federatë do të marrim pjesë me aq mjete sa mundësi kemi. Besoj se për një periudhë 3-4 vjeçare do të finalizohet me sukses dhe ngritja e stadiumit kombëtar. - Tashmë Kosova ka në UEFA dhe një shtyllë të fortë mbështetje siç është presidenti i Federatës Shqiptare të Futbollit, Armand Duka. Si janë marrëdhëniet tuaja me zv. presidentin e UEFA-s? E pamohueshme! Sigurisht të kesh një zv.president shqiptar në UEFA, është një gjë e madhe jo vetëm për Shqipërinë, por për të gjithë shqiptarët. Sigurisht që Armand Duka është një njeri i futbollit dhe një njeri me ndikim në futboll. Është post i jashtëzakonshëm. Duhet ta respektojmë. Jemi të privilegjuar që kemi një zv. president të UEFA-s. Është një institucion jashtëzakonisht kredibil dhe i lartë. Pra, marrëdhëniet tona janë të shkëlqyera dhe vazhdojnë të jenë. Jemi në bashkëpunim të plotë në të gjitha drejtimet. Suporti për ne është jashtëzakonisht i madh, pasi është zëri ynë drejtëpërdrejtë në Komitetin Ekzekutiv të UEFA-s. Dhe, çfarë të them tjetër, janë këto ditët e futbollit shqiptar, për faktin se jemi tre presidentë shqiptarë. Njëri nga këta, është zv. president i UEFA-s. Armand Duka, Agim Ademi dhe Muhamed Sejdini i Maqedonisë së Veriut. Të kesh këtë privilegj dhe të jetosh në këtë kohë kur po lulëzon futbolli shqiptar në të gjitha drejtimet, madje edhe me rezultate të mira në aspektin ndërkombëtar. Edhe të ekipeve siç bëri Ballkani, por edhe të Kombëtareve, sikurse Shqipëria është kualifikuar në kampionatin evropian për të dytën herë. Është shumë nder për ne shqiptarët që Duka është zv. president i UEFA-s. Uroj që të vazhdojë ky bashkëpunim dhe ky suport i futbollit shqiptar. - A e keni diskutuar ndonjëherë që të kemi një kompeticion të përbashkët në futboll siç është edhe në basketboll? Këtë e kemi diskutuar disa herë. Dhe ndoshta ka qenë idea e të parëve, sepse tashmë kanë dalë shumë njerëz që po thonë “Që kemi ne si ide, e kemi ne si ide”. Jemi të gatshëm si Federatë e Futbollit, që si Shqipëria, ashtu edhe Kosova. Në atë moment që politika do të na bëjë një shtet, ne na duhet shumë pak kohë që të organizojmë ligën e përbashkët. Ne në fakt do ta kishim bërë. E kemi lançuar një projekt të përbashkët me Federatën Shqiptare të Futbollit, “Kupa Nënë Tereza”. Kjo do të thotë që ky turne do të ishte gjithëpërfshirës për të gjitha skuadrat e Kosovës dhe Shqipërisë, të cilat mund të luanin ndeshje për këtë Kupë me sistem vajtje-ardhje. Për shembull një skuadër nga Gjilani me një ekip nga Saranda dhe e anasjella. Dhe kështu me radhë gjithë skuadrat, për të gjitha kategoritë, nga më e ulëta e deri te Superiorja. Këtë e kemi lançuar dhe në FIFA e UEFA. Por, besoj se këto dy institucione nuk do të na e lejojnë pa u bashkuar shtetet sepse këtë e parashikoni statuti i tyre që nuk mund të ndërhyjnë në territorin e shtetit tjetër. Faktikisht Kupa është diçka tjetër me emrin “Nënë Tereza” që i përket të gjithë shqiptarëve. E kemi lançuar, na duhen disa mjete për t’i realizuar këto. Kemi menduar që mjetet t’i sigurojmë nga dy qeveritë shtetërore si dhe nga Federatat. Në UEFA kemi kërkuar që të na njihet kjo Kupë dhe fituesi i saj, të jetë pjesëmarrës i garave ndërkombëtare, siç ndodh për shembull me Kupën e Mbretit në Spanjë. Tani që Duka është zv. president i UEFA-s, do ta kemi më të lehtë ta realizojmë. - Ndalemi pak te kombëtarja shqiptare. Kualifikimi në Euro 2024 erdhi edhe prej kontributit të padiskutueshëm tuajin, në mënyrë të ndërsjellë. Disa futbollistë të Kosovës, luajnë për ngjyrat kuqezi, kjo për faktin se kanë pasur lejen dhe miratimin tuaj. Zhurma e krijuar pas kualifikimit të Shqipërisë në Gjermani ishte artificialisht apo ka ndonjë shkak tjetër? Është privilegj dhe mundësi e artë për të gjithë futbollistët e Kosovës që të mund luajnë me Shqipërinë apo edhe ata kuqezi me Dardanët. E kemi Kombëtare dhe asnjëherë nuk ka pasur asnjë ndalesë në këtë drejtim. Më shumë ka qenë zhurmë mediatike. Futbollistët janë të lirë të vendosin me zemër. Është e drejtë e futbollistëv dhe asnjëra palë nuk është përzier kurrë, për t’i ndaluar apo joshur për zgjedhjet e tyre. Ne duam vetëm suksesin e tyre dhe na vjen mirë që kosovarët, ose shqiptarët nga Kosova kanë dhënë kontribut gjithmonë, edhe radhën e parë në kombëtaren tonë shqiptare, por edhe këtë herë për kualifikimin në Gjermani. - As ju, as presidenti Duka në fakt nuk e keni përmendur kurrë. Mos ndoshta Kosovë dhe Shqipëri duhet të kenë vetëm një skuadër futbolli për t’u përfaqësuar në arenën ndërkombëtare? E ceka pak më lart këtë. Në atë moment që politika do të bëjë një shtet Kosovën dhe Shqipërinë, ne na duhen shumë pak orë për ta organizuar dhe për ta bërë projektin e bashkimit të ligës. - Si e shihni Kombëtaren shqiptare në Europian, mendoni se ka shanse për të kaluar grupin apo duhet të kënaqen me faktin se do të jenë përballë elitës të këtij kompeticioni? Jo, nuk ka kënaqësi me faktin që veç pjesëmarrja është e rëndësishme. Tani kemi kaluar në fazë tjetër. Ky është grupi më i fortë i kampionatit evropian. Mendoj që Shqipëria do ta kalojë këtë fazën e parë. Atëherë do të bëhet më e fortë dhe më e rrezikshme për ekipet e tjera. Unë besoj në fuqinë e Shqipërisë, në angazhimin e të gjithëve, përfshirë stafin dhe futbollistët. E them pa mëdyshje që Shqipëria do të bëjë mrekulli në këtë kompeticion. - Do të jeni në Gjermani për t’i ndjekur nga afër kuqezinjtë? Po, gjithmonë. Kudo dhe kurdo! - A besoni se do të jetë e afërt dita që edhe Kosova të jetë pjesë e këtyre turneve? Tashmë skuadrën përfaqësuese e kemi të dëshmuar dhe dihet që kemi lojtarë jashtëzakonisht të mirë. Janë 5 futbollistë që kanë arritur të jenë kampionë me ekipet e tyre në Europë. Është privilegj dhe vlerë e madhe për ekipet kombëtare. Por, duhet të vijë momenti. Unë besoj shumë te këta futbollistë. Janë diku afro 145 lojtarë që janë të nivelit për të përfaqësuar Kosovën. Do të kërkojmë patjetër rezultate sepse nuk jemi më në fazën e zhvillimit, por jemi në fazën e rezultateve. Shumë shpejt besoj se dhe Kosovën do ta shohim në kompeticione të tilla. Edhe pse dihet se në futboll, jo gjithmonë fiton më i miri. Asgjë nuk ka të sigurtë. - Ju keni thënë që “Sylvinho” i Kosovës do të jetë gjerman. Kur do të vijë zyrtarizimi? Shumë shpejt, sigurisht. Në ndeshjet e marsit, Kosovën do ta gjejë me trajner të ri. Jemi në bisedime me disa, por vërtetë nuk kemi asnjë emër. Ne i kemi dhënë objektivat tona, të gjithë atyre konkurrentëve që kanë qenë. Do të shohim projektin e tyre, cili projekt është në përputhje me objektivat tona. Dhe normalisht është dhe faktori ekonomik. - Në aspektin e cilësisë së futbollistëve, Futbolli në Kosovë ka njohur progres të jashtëzakonshëm. Tashmë keni një ekip si Ballkani që na nderon ne të gjithëve në arenën ndërkombëtare. Si e vlerëson punën e suharekasve? Është jashtëzakonisht një punë e madhe e bërë aty nga Ilir Daja. Ndikimi dhe ardhja e tij e ka vazhduar suksesin, por edhe e ka ngritur nivelin e suksesit në Ballkanin e Suharekës. Por, gjithësesi ky është një fakt që futbolli i Kosovës realisht është ngritur shumë. Jemi renditur si liga më e mirë në Ballkan. Kemi nisur nga vendi i 55-të dhe tashmë jemi në vendin e 31-të. Është ngritje e madhe për kaq vite. Është shumë i rëndësishëm puna në kampionatin kombëtar. Duke përmendur edhe kontributin e Shqipërisë, kemi licencuar jashtëzakonisht shumë trajnerë. Na ka mbetur pas instaluar vetëm UEFA A në Kosovë. Për dy vite se besoj se do ta kemi UEFA Pro. - Meqenëse e përmendët edhe ju punën e trajnerit Ilir Daja. A mund të drejtojë ai një ditë Kosovën? Jo vetëm Ilir Daja, por besoj se ka dhe trajnerë të tjerë në Kosovë dhe në Shqipëri që të drejtojnë një ditë përfaqësuesen tonë. Por, kur është fjala për Ilir Dajën, të gjithë këta kanë mundësi të marrin udhëheqjen e Kosovës. Në këto momente, ende kemi nevojë për diçka që është pak më shumë e dëshmuar, pikërisht në aspektin ndërkombëtar. Na duhet një trajner që ka eksperiencë në ndonjë kombëtare tjetër, apo në ndonjë skuadër. Prandaj kemi vepruar kështu. Do të isha shumë i lumtur që të vinte shumë shpejt një trajner konkurrues me kriteret e kërkuara. Nuk do të largohem nga Federata e Futbollit të Kosovës pa drejtuar një herë një trajner shqiptar përfaqësuesen tonë. - Liberalizimi i vizave për Kosovën, padyshim ka edhe anët negative. Tranzicioni në gjithë Europën apo dhe botën, po krijon probleme sa i përket burimeve njerëzore. A i druheni faktit se në të ardhmen mund të mos keni profesionistët e kërkuar për të punuar me ta? Shumë pyetje e mirë. Jo aspak nuk i druhem! Ne e njohim Diasporën. Kosova e njeh që moti Diasporën. Kemi shumë njerëz atje. Pothuajse çdo familje e ka një njeri jashtë që punon. E njohim shumë mirë formatin. Ka njerëz që shkojnë të punojnë sezonalë dhe kthehen sërish në Kosovë. Sa i përket rinisë, rreth 11 mijë veta janë larguar, por dhe janë kthyer që prej momentit kur u liberalizuan vizat. Kosova ka një popullsi të re, ka resurse të mjaftueshme njerëzore që të mund të zhvillojnë futbollin, veçanërisht talentët e rinj. - E fundit! Ku e sheh Kosovën dhe Shqipërinë pas disa viteve, sigurisht jo vetëm në aspektin sportiv? Tani në të gjitha aspektet Kosova dhe Shqipëria janë në zhvillim. Pas disa viteve në kohën më të afërt, Shqipëria është në NATO dhe do të jetë anëtare e Bashkimit Europian shumë shpejt. Kosova po ashtu është drejt asaj rruge, dhe ndoshta në BE do të hyhet si bllok gjithë Ballkani dhe do të jemi bashkarisht dhe do të bashkohemi aty. Do të heqim fillimisht kufijtë administrativë dhe nëse shkojmë së bashku aty sigurisht kufijtë do të jenë të hequr. Kosovën e shoh në NATO duke pasur parasysh edhe ndihmat që i marrim nga SHBA dhe Unioni Europian, por dhe nga Shqipëria. I shoh shumë shtete prespektive dhe normalisht janë shtete të pastërta në aspektin e popullatës pasi shqiptarët janë kombi më i ri në Ballkan dhe mund të them edhe në Europë.

Dëshira e Agim Ademit: Politikë, Kosovë-Shqipëri bëje një

Nga Retin Toka

Artikuj të ngjashëm Artikuj

Lufta me Bulevardin

“ALBANIAN FILES”: 4 çështjet e debatueshme

Vajzat e humbura

Librazhdi, qyteti që nuk njihni, me bujtina dhe aventura që ju lënë pa mend

Mariglen Disha, njeriu pas vizionit të ri për Librazhdin!

DY PËR HISTORINË

Artikujt më të lexuar

Zvërneci, investimi që do ndryshojë historinë e turizmit shqiptar

Përtej Zvërnecit

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

Vajzat e humbura

Lufta me Bulevardin

Gjiri i Kakomesë, “Bukuroshja” e braktisur bëhet gati për TURIZËM

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Dëshira e Agim Ademit: Politikë, Kosovë-Shqipëri bëje një

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?