Berisha, a mund të ngrihet sërish sfinksi?

Më 22 maj, 31 vite pasi e themeloi dhe u zgjodh për herë të parë në krye, Sali Berisha rikthehet si drejtues i Partisë Demokratike. Çfarë do të thotë kjo për demokratët dhe skenën politike në vend? Revista Newsbomb sjell në këtë analizë shumë prej përgjigjeve që mundojnë sot opozitarët dhe vëzhguesit e jetës publike Përfytyroni si ngjan sot një anëtar aktiv të Partisë Demokratike. Kokëulur dhe pa shpresë. Prej 9 vitesh përjeton një dramë të vazhdueshme politike e personale. Po mbushet një dekadë, asnjë betejë elektorale e fituar. I përgjigjet çdo kërkese të partisë së tij, vjen në protesta e marshime. Sakrifikon. Eshtë pa punë. Mobilizohet në votime, si komisioner, numërues ose vëzhgues. Merr fisin dhe shoqërinë, u kërkon të mbështesin PD. Në shtëpi me gjasë i thonë; boll me këtë temë se nuk ja kemi parë hajrin. Pas zgjedhjeve të 25 prillit të vitit të kaluar, ai është ndjerë i dërrmuar. Shansi tjetër për të festuar, për të menduar për projektet, ëndrrat e aspiratat, ose për të ushtruar pushtet është 3 vite larg nga sot. Mundësi teorike sidoqoftë. S’ka më nerva, nuk ka më pasion. Nuk do të shohë as lajme, as debate politike. Në lokalin e lagjes përton të kërleshet me zjarr me fqinjin socialist, dukshëm i veshur më mirë dhe me kuletë më të rëndë. Ky anëtar partie, është thirrur sërish më 22 maj të paraqitet për Partinë Demokratike. Kësaj radhe, për të rikthyer në krye me votë, liderin historik, Sali Berisha, i cili prej vitit 1991, ka ikur 2 herë nga drejtimi, dhe në këtë fund pranvere të vitit 2022 kërkon të ngjisë dhe një herë shkallët që të çojnë tek zyra e kryedemokratit. Në fakt i ka kaptuar ato, pasi votimi i 22 majit është formal. Sali Berisha do ta fitonte këtë garë me këdo, dhe patjetër edhe me Ibsen Elezin, nëse ai do të qendrojë deri në fund, si i vetmi kandidat që është regjistruar përballë tij. Rikthimi më i vështirë Ky është padyshim rikthimi më i vështirë për doktorin. Jo vetëm se mosha biologjike nuk është një favor, edhe pse rrezaton prore energji e elegancë me kostumet e kravatat të kuruara mirë, por ngase ka disa rrethana shumë të forta, aspak në anën e tij. Shumë erëra fryjnë kundër. Më e egra, suferina e vërtetë, ajo e Departamentit amerikan të Shtetit, që është kthyer tashmë në një sfidë permanente. Ambasadorja Kim herë pas here kujton shpalljen e tij non-grata dhe sidomos motivin mbi të cilin është ngritur ai dekret. Një goditje që vjen thuajse çdo javë nga një anë ose tjetër. Një pjesë e struktutave të PD, dhe mbështetës në bazë duket se nuk ngarendin më drejt tij, madje janë kritikë. Nuk është fjala për kryetarin në detyrë, Enkeleid Alibeaj, e rreth 20 deputetë që shkojnë në mbledhjet e thirrura prej tij. Ka deputetë të tjerë më të heshtur që nuk janë në asnjërën palë, të parreshtuar nëse mund të cilësohen, dhe anëtarë të thjeshtë të PD që nuk janë dakort e nuk mbeten pasues të Berishës, ashtu si nga ana tjetër, janë shumë larg Lulzim Bashës. Këta spikasin si më të kthjellët, më racionalë, dhe si moment, është sak shenjë e emancipimit të kësaj force politike që në 31 vite nuk ka patur kurajon të kontestojë doktorin. Ata nuk janë dakort me gjuhën e ashpër të liderit historik, me mënyrën se si u zhvilluan zgjedhjet me nxitim në degë e struktura, dhe se si po procedohet në vijim me Këshillin Kombëtar, apo me 22 majin. Po aq të palëkundur, në të huajësimin ndaj Bashës, që e bëjnë përgjegjës për dështimet elektorale. Por një pengesë jo e vogël mund të shfaqet nga dita në ditë për Sali Berishën. Kaosi që mund të sjellë vendimi i Gjykatës Një mur i lartë për t’u kaluar mund të jetë për Sali Berishën verdikti i Gjykatës së Apelit, pas kërkesës që ka bërë Enjkeleid Alibeaj, që në thelb synon mosnjohjen e Kuvendit të 11 Dhjetorit, dhe si pasojë të gjithë vendimeve që dolën nga aty. Çka do të thotë se logoja, vula dhe selia, nuk janë më të Rithemelimit, por i ngelen kryetarit në detyrë, pasuesit të Lulzim Bashës. Hapi i parë në këtë drejtim është hedhur, që ka qenë pranimi i ankimimit në dhomën paraprake. Më tej, nga dita në ditë pritet çekiçi i trupës gjykuese. Alibeaj ka apeluar vendimin e Gjykatës së Rrethit të Tiranës, që njohu kuvendin e thirrur nga Berisha me 11 dhjetor. Automatikisht, u legalizuan aktet e këtij Kuvendi, që do të thotë u ligjerua shkarkimi i Bashës dhe mbështetësve të tij më eminentë. Ditën që foli kësisoj Gjykata e Tiranës, Sali Berisha dhe përkrahësit e tij u kthyen në seli dhe morën zyrat, prej nga ku u përzunë prej policisë së shtetit më 8 janar, pas asaj përplasje të dhunshme e të palavdishme në godinën dhe oborrin e selisë blu. Vendimi i pritshëm i Apelit, për të cilin në Tiranë njëzëri besojnë se do të jetë kundër doktorit dhe pro-Bashës, do ta komplikojë shumë kursin e mëtejshëm të liderit historik, dhe të krejt demokratëve në fakt. Askush nuk di të thotë me saktësi se si do të sillet Berisha dhe strukturat që ai tashmë ka ngritur e konstituar, nëse Apeli do të kthejë çdo gjë mbrapsht. Vendimi i Gjykatës është i detyrueshëm për t’u zbatuar dhe do të ishte çmenduri injorimi apo sfidimi i tij. Një skenar i tillë mund të rikthente sërish skalionet e përdorimit të forcës në seli, dhe policia e shtetit do të vihej në punë. Rekursi ndaj një vendimi të tillë në Gjykatën e Lartë kuptohet se do të merrte shumë kohë. Dhe kohë nuk ka. Zgjedhjet lokale po afrohen me vërtik, dhe në kushtet që do të jetë pa logon historike, pa godinën, pa subjektin e njohur ligjërisht, Berisha dhe demokratët që e mbështesin do ta kishin të siziftë betejën për pushtetin vendor. Që nga përfaqësimi në KQZ, pasja e komisionerëve, e deri tek kostoja e madhe që do të sillte në publik, shkuarja sërish para qytetarëve me një simbol tjetër, jo me atë, 31 vjeçarin, PD. Shtëpia e lirisë rezultoi e suksesshme për Berishën më 6 mars në zgjedhjet e pjesëshme, por gjithkush e di se rezultati do të ishte edhe më i mirë për të, nëse do të kishte shkuar me logon historike. Pasiqë, ka shumë demokratë, tradicionalë, që ndillen, joshen, dhe kanë lidhje shpirtërore pikërisht me atë sigël. Një raport 3 dekadash tashmë. Kryesia dhe drejtuesit, pas 22 majit Pas Kuvendit të fundit të thirrur nga Berisha u zgjodh Këshilli Kombëtar. Në nivelin e strukturave drejtuese, instancat kryesore kanë ngelur ende pa u formësuar. Që janë Kryetari i Partisë, i cili do të zgjidhet më 22 maj. Më tej, kryesia, dhe sekretariati. Ka jo pak garë, ambicie, dhe lëvizje mes demokratëve mbështetës të Berishës për këto pozicione. Përplasja edhe pse mbahet e heshtur dhe nën kontroll nga doktori dhe autoriteti i tij, nuk do të thotë aspak se nuk po ndodh. Listën me emrat që do t’i shkojnë Këshillit Drejtues, për t’u votuar, do ta paraqesë Sali Berisha, në cilësinë e kryetarit, pas 22 majit. Ka rivalitet të fortë. Shumë prej anëtarëve të Komisionit të Rithemelimit duan të jenë në postet kyçe. Po ashtu, e fortë është konkurenca për të qënë anëtar kryesie. Në ambjentet e demokratëve flitet shumë për dy emra që mund të jenë nënkryetarët e rinj, Agron Shehaj dhe Luciano Boci. Mbetet e mbushur me mister dhe ankth çështja e Sekretarit të Përgjithshëm, post që është në fakt më i lakmuari. Si favorit shihet Belind Këlliçi, por përmenden dhe emra surprizë si, një rikthim i mundshëm i Arben Imamit. E ardhme e mjegullt Të gjitha këto zhvillime e bëjnë shumë të mjegullt të ardhmen e demokratëve. Nuk ka dyshime tashmë se Berisha do ta marrë nën kontroll forcën politike, në të cilën shfaqet për herë të tretë në këto 31 vite, si kryetar. E para ishte në vitin 1991, kur sapo u krijuar PD. U largua në vitin 92 si u zgjodh President, rierdhi në vitin 1997. Iku në vitin 2013, dhe më 22 maj, vjen sërish në krye. Rikthimi i Berishës ka sjellë entuziasmin e militantëve, megjithatë jo pak demokratë me këmbë në tokë e dinë se kjo nuk mjafton për të ardhur në pushtet. Zor se një pjesë e shoqërisë do t’i jepte edhe një herë shansin doktorit për t’i qeverisur. Më anë tjetër, me Berishën përballë, Edi Rama do të kishte një bonus të madh. Do t’i zerohej pika e tij më e dobët, që është konsumi tejet i gjatë nga pushteti, dhe mosha biologjike që edhe për atë po ecën. Por me liderin historik të PD në ring, Rama sërish nuk do të dukej më i vjetër as në politikë, as në thinja. Përkundrazi. Vetëm një emër i ri, një i ri në çdo kuptim në PD do të krijonte shanse që forca politike që solli pluralizmin në vend, që ishte në pushtet dy herë, dhe drejtoi për 13 vite, të mund të rifitonte besimin e qytetarëve, e të shpëtonte na atrofizimi prej qëndrimit të gjatë në opozitë. Ka zëra që pohojnë se ndoshta Berisha e di më mirë se gjithkush tjetër se sa e pamundur do të ishte të fitonte një palë zgjedhje politike, e me gjasë, para se ato të vijnë, ai t’i hapë rrugën dikujt tjetër, që këto kohë do të shërbejnë për ta rritur e konsoliduar. Por këto ngelen nanuritje optimiste, kur dëgjojmë shpesh e shpesh vetë doktorin që shprehet se ai do ta mundë Edi Ramën dhe do të jetë sërish kryeministri i vendit.

Berisha, a mund të ngrihet sërish sfinksi?

Artikuj të ngjashëm Artikuj

Agon Maliqi: Shantazhet e Vuçiç mbaruan, por Perëndimi duhet të jetë i qartë

TË FSHETAT E ZGJEDHJEVE 2023: ROLI I FISEVE, OLIGARKËVE, PARTIVE DHE ODIHR

“GOGOLI” McGonigal dhe vullkani i ndezur i Ballkanit

GJERMANI – SHQIPËRI, Një marrëdhënie e veçantë?

RAPORTI SEKRET, Britanikët: “18 mijë çam u dëbuan, 800 u vranë”, si u krye genocidi grek në Shqipëri

Presidenti i ri, historia dhe skenarët

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

“Uno kryqzimo”, kush është lushnjari që bëri “Gol” me banderolën

Mario Ashiku, një dashuri, shanse të dyta dhe një jetë e jetuar bukur (si vetë ai)

Aldor Nini, grabitqari i artit shqiptar dhe fjalës së lirë

Inva Mula: Unë sopranoja e parë shqiptare në skenat evropiane

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Berisha, a mund të ngrihet sërish sfinksi?

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?