Banane dhe kokainë, një rrugëtim i përbashkët…

Sistemuesit e arkave me banane në disa supermarkete frutash në Gjermani, u shokuan kur brenda kutive panë se gjysma e mallit ishte diçka që s’kishte të bënte me banane. Pako 1 kg ishin me mbishkrime të ndryshme, kryesisht që lidheshin me skuadrën bavareze të Bajernit dhe të vendosura poshtë bananeve. U lajmërua policia dhe nisën hetimet. Fillimisht u dyshua se trafikantët kishin gabuar kodet në identifikimin e arkave në momentin e daljes së kontejnerëve nga porti i Hamburgut! Më pas, u zbulua kompania e importit, e cila dorëzoi të gjitha shkresat edhe për disa porosi të tjera që priste t`i vinin nga Ekuadori. Hetimi zgjati 6 muaj, ku policia gjermane mundi të sekuestronte plot 1.8 ton kokainë, me të njëjtën mekanizëm transporti. Policia vuri kamera nëpër disa supermarkete në të cilat kishin mbërritur arkat e kushtueshme dhe nga aty nisën verifikimet e personave të interesuar për këto arka. U identifikuan 12 persona, ndër ta rezultuan të ishin 9 shqiptarë e 3 gjermanë.

Pas përfundimit të operacionit, në majin e 2018-s, policia theksoi: “Ne tentuam disa herë të ndërhynim, ndërsa trafikantët vinin në supermarket për të ‘riblerë’ arkën e bananeve, por gjithnjë shquajtëm se ata ishin të armatosur”! Detajet e operacionit u bënë publik nga gazeta ‘Bild’ ndërsa vetëm pak javë më parë një rast ishte pikasur edhe në portin e Durrësit! Në fakt sinjali vinte nga agjensitë e huaja, përfshirë edhe ato gjermane ku thuhej se në kontejnerin me banane që vinte nga Ekuadori kishte kokainë. Malli u shkarkua në magazinat e kompanise që kishte për pronar një djalë me emrin Arbër Çekaj, që si për koinçidencë doli që gjendej dhe madje edhe jetonte në Gjermani… Rastet kishin element të përbashkëta, ndërsa Arbëri i mohoi 613 kg e kokainës, por ama rasti i tij zgjoi interesin e kompanive të tjera për të realizuar import të dyfishtë nën stemën e bananes!