Nga Lindja drejt rrugëve shqiptare, si po ndryshon tregu i makinave në Shqipëri

Imagjino një mëngjes të zakonshëm në hyrje të Tiranës. Qyteti ende nuk është zgjuar plotësisht, por rrugët kanë nisur të marrin ritmin e tyre të përditshëm, semaforë që ndërrojnë ngjyrë, makina që lëvizin ngadalë, njerëz që nxitojnë drejt punës, prindër që çojnë fëmijët në shkollë dhe taksi që ndalojnë e nisen pa pushim.

Në këtë lëvizje të zakonshme urbane, ka diçka që nuk bie menjëherë në sy, por që po bëhet gjithnjë e më e pranishme. Mes makinave europiane, që për vite me radhë kanë dominuar rrugët shqiptare, sot shfaqen gjithnjë e më shpesh emra të tjerë, forma të tjera, logo të tjera. Automjete që vijnë nga Koreja e Jugut, Kina apo tregje të tjera të largëta, të cilat dikur për shumë shqiptarë dukeshin të panjohura, sot po bëhen pjesë e zakonshme e peizazhit rrugor.