Dirigjenti Britanik, James Ross: Shqipëria, si m’u duk!

Ai është një emër që ka shëtitur botën. Ja që rrethanat e sollën edhe në Shqipëri. Eshtë dirigjenti i njohur britanik James Ross që ka plot 40 vjet që performon mes spektaklit, duartrokitjeve, mikëpritjesh, në shumë qendra botërore, në shumë kryeqytete evropiane dhe botërore. Një ditë, ia behu edhe në Tiranë. Sa me kuriozitet, aq edhe me dashuri. Kuriozitet sepse babai i tij, mjek dhe profesor, ka qenë në Shqipëri në fillim të viteve ’90, duke dhënë mësim për studentët shqiptarë të mjeksisë. Dhe kishte kujtime të tjera për Shqipërinë, siç ato ia kishte treguar i ati, që duhet të ecte me prozhektor në dorë se mos rrëzohej ndonjë grope rrugëve të prishura të Tiranës. “Nuk ka vend tjetër ku bota osmane dhe ajo mesdhetare-perëndimore të përplasen kaq bukur sa në një menu shqiptare”, thotë Ross.
I ftuar në Tiranë nga British Council Albania, si pjesë e aktiviteve të Javës Kulturore Britanike, maestro Ross vlerëson nivelin e lartë të artistëve shqiptarë, ku si cilësi të tyre veçon aftësinë për t’u përshtatur në kohë rekord me një repertor të panjohur për ta. Si fans i Queen dhe studiues i muzikës folk, biseda me maestro Ross nuk mund të mos ndalet edhe tek një nga temat kryefjalë të zhvillimit të shoqërisë njerëzore siç është AI dhe ndikimi i saj tek krijuesit.