Sevdaja e Ali Pashës për Vasiliqinë

Kush ishte Vasiliqia që mori mendtë e Ali Pashait që në moshën 12 vjeçare; Zonja me Kështjellë e me Kishë që ka hapur shumë debat mes shqiptarëve u shuajt në moshën 45 vjeçare. Historia tregon që pas vdekjes së Ali Pashës, ajo nuk u martua kurrë edhe pse pati kërkesa të shumta. Përmendja e saj prej dekadash në folklorin shqiptar, me tone pozitive, dëshmon se mbi të nuk rëndonte një akuzë mbi tradhëtinë e saj ndaj Ali Pashës, por përkundrazi kujtohej si një bashkëshorte e denjë e Luanit të Janinës

Ngjarjet e Pashallëkut të Janinës edhe 90 vjet pas vrasjes së Ali Pashë Tepelenës vazhdonin ende të kishin jehonë në shoqërinë shqiptare të kohës. Eqerem Vlora në librin e vet “Ditar nga Berati në Tomorr dhe kthim” botuar në Konstandinopojë në 1910 mes këngëve popullore të mbledhura në Berat sjell edhe këngën popullore “Sevdaja e Ali Pashës për Vasiliqinë”. Eqerem Vlora e ka përfshirë këngën e mbledhur në kapitullin e titulluar “Nga thesari i këngëve toske”/ Këngë dashurie. Ai shkruan se kjo këngë është një këngë e vjetër e kënduar shpesh në gjithë Shqipërinë. I këndohet dashurisë së madhe të Ali Pashës Tepelenës për gruan e tij të dytë, Vasiliqinë e krishterë.