100 VJETORI I LORO BORIÇIT, Nipi i legjendës së futbollit flet nga Kanadaja, Kryebashkiaku: Si do festojmë në Shkodër

Të shkruash për Loro Boriçin, padyshim është kënaqësi, privilegj dhe përgjegjësi e madhe. Vepra e tij qëndron ende e gjallë mes gjithë sportdashësve shqiptarë. Data 4 gusht do të shënojë 100-vjetorin e lindjes, për legjendën e futbollit shqiptar që nuk do të vdesë kurrë. Në këtë shkrim për herë të parë do ketë intervistë ekskluzive të pabotuar ndonjëherë në mediat shqiptare me familjarët e tij, larguar 30 vite më parë nga Shqipëria. Në Shkodër ngrejnë supet për të afërmit e tij, por ata janë të shumtë sikurse sukseset e Loros në futbollin shqiptar. Qyteti i lindjes po përgatitet për një event të madh që do të mbahet në stadiumin që mban emrin e legjendës shkodrane. Kryetari Bardh Spahia tregon mes emocioneve se çdo të ndodhë në ditën e 4 gushtit. Klorinda Boriçi, motra e Loro Boriçit 92-vjeçarja që jeton në Tiranë "Alo", dëgjoj një zë nga ana tjetër e telefonit. Ishte disi i lodhur, por me dëshirën për të mos qenë vetëm. " Nënë Klorinda, jam një gazetar dhe jam i interesuar për t'iu takuar ", iu përgjigja unë. " Po, urdhnoni, urdhnoni ", më ktheu me një ton shumë mikpritës. M'u duk se kisha zbuluar një thesar të madh. Kisha pyetur në shumë vende dhe të gjithë ishin në dijeni se vetëm një motër e Loro Boriçit ishte gjallë, por nuk kishin informacion se cila dhe ku ishte vendodhja e saj. Pas hulumtimesh të shumta, arrita të gjej se jetonte në Tiranë, në moshën 92-vjeçare. Gjunjët s'i përgjigjeshin më si dikur, por mendja po. Kujtimet për të vëllanë i ruante të freskëta. Pamundësia fizike e saj më detyroi të mos e shqetësoja më shumë, megjithëse dëshirën e kishte të madhe për të treguar. Nuk u ndala këtu, por vijova të kërkoj. Loro Boriçi vjen nga një familje e madhe shkodrane. Kishte pasur dy vëllezër, Markun dhe Pjerinin, si edhe tre motra, Angjelinën, Margaritën dhe Klorindën. Loro ka lindur në 4 gusht të vitit 1922, ishte i mesit nga djemtë. Ndërsa motrat më të vogla. Kujtimet për legjendën shkodrane, kontaktet me nipin në Kanadanë e largët Në bindjen time kisha krijuar gjithë intervistën që do të zhvilloja me një person të afërm të Loro Boriçit. Ishte e pamundur që një legjendë si ai, që rridhte nga një familje e madhe, mos të kishte trashëgimtarë. Edhe pse vetë s'u martua kurrë, Loro kishte lënë nipër dhe mbesa. Dhe në fakt kështu rezultoi. Arrij të gjej nipin e tij. Plator Boriçi, i biri i Pjerin Boriçit prej 25-vitesh ishte zhvendosur në Toronto të Kanadasë. Ishte "CEO" i lartë i programimeve në një kompani prestigjoze kanadeze. " Më thoni, çfarë doni konkretisht për xhaxhain tim ?", ishte përgjigja e parë e tij. Pasi e kuptoi se do të ishte pjesë e artikullit të revistës së Newsbomb, hezitoi fillimisht, por më pas nisi të tregonte gjitha kujtimet. Loro Boriçi kishte qenë një futbollist mjaft i talentuar, por mbi të gjitha një njeri fantastik. Kështu e mban mend edhe Platori: " Ishte i jashtëzakonshëm, mjaft i zgjuar edhe përtej fushës së sportit. Ulesha të komunikoja me të dhe ndihesha shumë rehat. Shpesh e pyesja dhe për futbollin në vitet 70'-80' ". Arben Minga, kollosi i futbollit shqiptar që u pikas nga Loro Boriçi Bisedat me Loro Boriçin, nipi i tij i ruan të gjalla dhe kjo duket nga imtësitë që zbulon. Arben Minga, kollosi i futbollit shqiptar, është zbuluar pikërisht nga legjenda shkodrane. Shumë pak mund ta dijnë, por sot për herë të parë e tregon edhe Platori. " Nga bisedat me të, mbaj mend që i njihte lojtarët nga detajet më të imëta. Në atë kohë më fliste shumë për të ndjerin Arben Minga. Më thoshte se ka potencialin për t'u bërë lojtar i madh. Dhe më vonë kjo u vërtetua. Koha i dha të drejtë xhaxhait tim ". Loron e donin të gjithë. Ishte jo vetëm shok skuadre i shkëlqyer, por më vonë edhe trajner i suksesshëm. Me sa duket dinte t'i merrte maksimumin futbollistëve. " Ai ishte si një psikolog, kur vinte puna për të drejtuar lojtarët e skuadrës. Arrinte të merrte maksimumin nga të gjithë ata që kishte në dispozicion" , tregon më tej Platori. "I qetë dhe i rafinuar", si e përshkruante i vëllai Pjerini, Loro Boriçin Asnjëri nuk ata nuk jeton më, megjithatë Plator Boriçi arrin të kujtojë fjalët e të atit për xhaxhain. Tregon se si e shihnin në fushë dhe cilësitë që kishte. "Ishte një lojtar me një teknikë të rafinuar, golashënues dhe shumë i qetë. Kapiten i vërtetë në fushë. Kështu thoshte babai. Ndoshta kjo ka qenë dhe cilësia më e mirë që e bëri gjithashtu një trajner shumë të rëndësishëm në Shqipëri", shprehet Platori. Në Shqipëri nuk kanë shkruar ndonjëherë për familjarët e Boriçit. Në një ceremoni të zhvilluar para disa vitesh në Shkodër, ka qenë e ftuar vetëm e motra e tij, Klorinda. Por, të dokumentuar nuk ka asnjë artikull. Ndofta largësia e familjarëve ka bërë që të zbehet edhe interesi. Megjithatë në familje, Platori tregon se vijojnë të mbajnë të gjallë kujtimet për xhaxhain dhe gjithë fisin në përgjithësi: " Familja gjithmonë ka qenë e dedikuar për të ruajtur veprën e tij për t'ia transmetuar brezave të tjerë. Për Loron ka edhe një film dokumentar në Kinostudio të realizuar nga Mark Topollaj. Një pjesë kryesore e nipërve dhe mbesave jetojnë larg. Unë dhe motra ime gjendemi prej shumë vitesh në Kanada. Ndoshta kjo është arsyeja se pse mediat nuk kanë pasur mundësi të na kontaktojnë thjeshtë, siç mund ta bënin në Shqipëri ". Profili sportiv, sukseset me Vllazninë, Lazion dhe Partizanin Loro Boriçi nisi për herë të parë futbollin profesionist në moshën 15-vjeçare. Gazetarët e kohës tregojnë se ai luajti për herë të parë në ndeshjen Vllaznia-Dragoi i Pogradecit, më 6 qershor 1937, kur ishte 14 vjeç e 297 ditë. Një rekord! Interesant është fakti se, vëllai i tij më i madh, Mark Boriçi, luante si portier. " Nuk mbaj mend shumë nga xhaxhai tjetër, por më kanë thënë që merrej dhe ai me sport ", tregon shkurtimisht Platori. Loro Boriçi ishte një pasionant i madh pas futbollit, me një trup elegant, tepër i fuqishëm teksa bëhet pjesë e Vllaznisë, së vitit 1937, njëherësh edhe kampionati i shtatë Kombëtar dhe i fundit i para LIIB. Nuk zgjati shumë aventura me Vllazninë, pasi ai shkoi në Itali për të kryer studimet në Fakultetin e Drejtësisë. " Kalimi i Loros në Itali është edhe i dokumentuar. Në sezonin 1941-1942 ai kaloi te Lazio ", vijon bisedën nipi Plator Boriçi që duket mjaft i mallëngjyer nga kujtimet që i kalojnë në mendje. Në vitet 1941-1943, shtatlarti shkodran u ble nga ana e Lazios nga Vllaznia. Paralelisht me studimet, ai jepte kontributin e tij edhe për italianët. U aktivizua në 18 ndeshje dhe shënoi 4 gola si sulmues. Një nga ndeshjet e tij të mëdha është ajo Lazio-Juventus 3-2, për një të tetat e Kupës e Italisë 1942-1943 (27 shtator 1942), ku përballë njëri-tjetrit ishte Loro Boriçi i Lacios dhe Riza Lushta i Juventusit, një duel shqiptarësh. Loro shënoi golin e barazimit 2-2, dhe më pas goli i tretë i realizuar nga gjermani Koenig (62’) vulosi edhe eliminimin e juventinëve. Gjithsesi, një vit më parë, Riza Lushta kishte arritur të fitonte e Italisë me Juventusin e vitit 1942, kurse Naim Kryeziu kampionatin e Italisë, me Romën, po në vitin 1942. Përvoja me Lazion e ndihmoi të rritej shumë teknikisht. U rikthye sërish te Vllaznia, ku në 1945 fitoi titullin e parë kampion me shkodranët. Deri në vitin 1948 kontribuoi për ekipin e vendlindjes. Në Kampionatin Ballkanik të vitit 1946 të mbajtur në Shqipëri, kuqezinjtë dolën kampion pasi mundën Rumaninë 1-0 në finale. Një nga fotografitë më të njohura të pas-finales është ajo e Boriçit në stadiumin “Qemal Stafa” me një kuror dafine në kokë dhe trofeun në duar. Më vonë u detyrua të shkonte te Partizani pas një fletëthirrje për ushtar. Me të kuqtë luajti plot 7 vite duke qenë një nga futbollistët kryesorë të kohës. Pas mbylljes së karrierës si futbollist, Loro u bë trajneri i Partizanit, “shtëpia” e tij e dytë, duke iu përkushtuar tërësisht trajningut. Fiton tituj kampion si trajner me të kuqtë: 1962-1963, 1963-1964 dhe 1970-1971. Në palmarasin e tij janë dhe katër Kupa Republike: 1964, 1966, 1968 dhe 1970. Loroja bën Partizanin, Kampion Ballkani në vitin 1970, por ai është dhe kampion Ballkani me Shpresa, dhe fiton me Partizanin medaljen e argjendtë në Lojërat e Ushtrive të Lindjes (Hanoi) 1963. Loroj dallohej për “dashurinë” e tij për futbollistet e fuqishëm fizikë, duke sjellë një numër të konsiderueshëm nga rrethet. Kombëtarja dhe aftësia për të menaxhuar FSHF-në Si futbollist, Loro Boriçi u aktivizua në 24 ndeshje me Kombëtaren, 11 me fanellën e Vllaznisë dhe 13 të tjera me Partizanin. Sikurse kishte bërë me ekipet e kampionatit, ashtu edhe me kuqezinjtë la gjurmë. Ndeshja e tij e parë daton në vitin 22 shtator 1946. Ndërkohë me Kombëtaren kontribuoi edhe si trajner pasi u tërhoq nga futbolli. Nuk do të harrohet asnjëherë ndeshja kundër Republikës Federale Gjermane në vitin 1954. Gjermanët vinin në Tiranë me statusin e nënkampiones së botës. Formacioni i Shqipërisë ishte: Dinella, Gjinali, Jorgaqi, Vaso, Rragami, Shllaku, Pano, Mema, Zhega, Kazanxhi, Bizi. Ky barazim vazhdon të mbetet një nga sensacionet e futbollit tonë, ndërkohë që në Gjermani konsiderohet si në humbje. Trajneri Helmut Shën do të shprehej: “Unë dua t’i bëj një kompliment shumë të madh skuadrës shqiptare dhe trajnerit të saj, kolegut tim Loro Boriçi. Edhe një herë komplimente për Shqipërinë e futbollin shqiptar dhe për skuadrën e tij të mirë”. Dhe të mos harrojmë se Shqipërisë iu anulua nga gjyqtari Marshall, një gol i rregullt i realizuar nga Frederik Gjinali. Boriçi është njeriu i Kinës, në mesvitet 1970, ku dha një ndihmesë të madhe në zhvillimin e futbollit kinez me stërvitjet, leksionet e drejtimin e skuadrave kineze. Dhe kinezët ia ditën shumë lektorit, pedagogut e njeriut që shkriu gjithçka nga jeta e tij në ato vite. Ato befasoheshin për orët e shumta që ai punonte gjatë tërë ditës. Ai arriti të krijonte atje një ekip shumë të mirë dhe atë gjë e bëri me shumë pasion. Siç e përmend edhe Platori në intervistë, Loro Boriçi ka qenë edhe një menaxher i shkëlqyer. Ai u dallua si organizator i zoti duke fituar menjëherë një vend në drejtimin e Federatës Shqiptare të Futbollit. Ai ishte anëtar i Kryesisë së Federatës Shqiptare të Futbollit, i Këshillit të Bashkimit të Fizkulturistëve Sportivë Shqiptarë, pedagog në Institutin e Kulturës Fizike “Vojo Kushi”. Ai ka drejtuar edhe ekipet kombëtare për të rinj dhe Shpresa. Për kontributin e tij, Loro Boriçi, është nderuar me titujt e lartë sportivë: “Mjeshtër i Merituar i Sportit”, “Trajner Kombëtar”, si dhe urdhra të ndryshëm: Urdhri “Naim Frashëri” Klasi i Parë, Urdhri i Artë “Naim Frashëri”, Medalje pune: “Mjeshtri i Madh i Punës”. 25 prill 1984, ndarja nga jeta e Loro Boriçit 25 prilli i vitit 1984 ishte ditë e zezë për gjithë Shqipërinë, veçanërisht për sportdashësit shqiptarë. Loro Boriçi u nda nga jeta prej një sëmundje të rëndë. Atë moment e kujton edhe nipi i tij që thekson se një faktorët që ndikoi në vdekjen e parakohshme ishte konsumi i tepërt i duhanit. " E mbaj mend atë periudhë. Kam qenë në shkollë të mesme, para se do të emigroja për në Kanada. Ishte disi e pabesueshme edhe për familjen tonë. Edhe pse la futbollin, kishte një trup atleti. Por, problemi më i madh ishte duhani. Pasi ndërpreu aktivitetin sportiv, nisi ta konsumonte shumë. Besoj se kjo ishte e vetmja e metë e tij ", flet mes kujtimesh Plator Boriçi, që mundohet të na e servirë gjithçka sa më të gjallë. Siç tregohet edhe në dosierët e ndryshëm, për Loron u tregua një kujdes i posaçëm nga ish-sekretari i Komitetit Qendror të Partisë së Punës së Shqipërisë, dhe më pas Sekretari i Parë, Ramiz Alia. Ai u dërgua jashtë shtetit për kurim, por nuk mundi të mbijetojë. 100-vjetori i lindjes, eventi i madh në Shkodër Data 4 gusht do të shënojë edhe 100-vjetorin e lindjes së Loro Boriçit. Me iniciativë të Federatës Shqiptare të Futbollit, Bashkia Shkodër në bashkëpunim me klubin e Vllaznisë do të organizojnë një event të madh në stadiumin "Loro Boriçi" në kujtim të legjendës së futbollit shqiptar. Kryetari Bardh Spahia, në një intervistë për Newsbomb tregon se përgatitjet kanë nisur prej ditësh dhe janë në rrugën e duhur. Madje, s'i fsheh emocionet duke thënë: " Fillimisht më lejoni t’ju falenderoj për intervistën. Organizimet e 100-vjetorit të Loro Boriçit janë drejt fundit. Ka akoma disa detaje të vogla për t'u fiksuar, por po ecim mirë me organizimin . Kur bëhet fjalë për ikona të sportit të Shkodrës dhe vëmendje ndaj qytetin tonë, jemi gjithmonë të hapur për bashkëpunime me qëllim promovimin e vlerave te cilat qyteti jonë mbart". Sporti për çdo shkodran është si "fe". Padyshim është vendi ku bashkohen të gjithë me qëllimin e përbashkët, mbështetjen e ekipit të zemrës. " Kur ka ndeshje Vllaznia ", thotë kryetari Spahia, " e gjithë vëmendja përqëndrohet në stadiumin "Loro Boriçi". Edhe pse klubi i Vllaznisë është 100 përqind subjekt privat, vijojmë të japim gjithë suportin tonë, veçanërisht për anën e infrastrukturës", shton më tej ai. E për t'u kthyer sërish në eventin e datës 4 gusht, kryetari pyetet nëse kujton diçka nga legjenda Loro Boriçi. Atë vit që është ndarë nga jeta, ka qenë afro 8-vjeç. Megjithatë me kujtimet e një fëmije e ka të vështirë të nxjerrë nga memoria diçka. " Tani aq sa mund të mbajë mend kujtesa e një fëmije di të them këtë, që nga babai veçanërisht, por edhe pjestarët e tjerë të familjes, për sportin na flisnin plot pasion dhe na merrnin në çdo ndeshje që Vllaznia luante në stadium. Padiskutim që këtu kanë nisur kontaktet e para me futbollin dhe sportin në tërësi dhe ajo lidhja shpirtërore që ne shkodranët e kemi të natyrshme". Por, të afërm të tij i kanë treguar: " Veçonin artin e tij në fushën e blertë, por mbi të gjitha qytetarinë që e karakterizonte. Sepse ja diktonte prejardhja familjare, por dikçka konkrete mbi këtë personalitet nuk kujtoj për momentin. Janë shumë vite të kaluara nga bisedat e bëra me familjarët e mi. Në Shkodër ka aq shumë rrëfime për këto mjeshtra që kemi patur fatin ti kemi në gjirin tonë, e kuptoni vetë sa shumë është folur e treguar për secilin prej tyre ". Organizimi, Shkodra dhe Tirana në lëvizje Organizimi i eventit në nder të 100-vjetorit të lindjes, ka vënë në lëvizje edhe kryeqytetin, Tiranën. Zyrtarë të Federatës Shqiptare të Futbollit, por edhe dashamirës të sportit janë vënë në kërkim të materialeve apo sendeve që kanë lidhje me Loro Boriçin. Për këtë, kryetari Bardh Spahia s'e fsheh kënaqësinë, përkundrazi shprehet: " Besoj jo vetëm Shkodra e Tirana, por e gjithë Shqipëria e ka në nderin e saj ti kujtojë dhe nderojë të tilla figura që i dhanë emer sportit në vendin tonë. Ju e kuptoni fare mirë se si shkodran ndjehem shumëfish i emocionuar që bijtë e Shkodrës lartësohen në historinë e futbollit shqiptar dhe marrin vendin që i takon". Të nderosh një figurë të tillë si Loro Boriçi, padyshim është privilegj i madh. Kur pyetet nëse ndihet se po organizon diçka njësoj si për babain e vet, kryetari emocionohet dhe thotë: " Nëse pyesni sot çdo shkodran se çfarë ndjen kur vlerësohet një figurë e qytetit të tij, të gjithë pa përjashtim do ta përshkruajnë me ndjesinë e njëjtë, sikur të ishte për njerëzit e familjes. Janë njerëz të rallë që në kohë aspak të zakonta me talentin e tyre i dhanë emër Shqipërisë dhe na bën krenar. Prandaj krenohemi me to dhe ndjehemi mirë që janë pjesë e familjes tonë të madhe, e Shkodrës së vlerave e qytetarisë" . Kryetari Bardh Spahia me stafin e vet po punon maksimalisht që të mos mungojë asgjë në atë ditë të veçantë. Kurioziteti është i madh se si ai e mendon Loron nëse do të ishte gjallë. Kush do të ishte mesazhi i këtij qytetari të mrekullueshëm shkodran që është ende mes nesh përmes veprës së tij? " Ai do të fliste ashtu siç ka ditur gjithmonë, me artin e tij në fushën e lojes dhe jam i sigurtë që po të ishte në mesin tonë, do ta bënte duke zbritur në stadium përpara tifozerisë kuqeblu. Duke shkelmuar topin dhe duke i dhënë mesazhin lojtarëve të sotëm që për Vllazninë të japin gjithçka në fushë ". Eventi, të ftuarit specialë nga Bashkia e Shkodrës Në një organizim të tillë padyshim s'mund të mungojnë as të ftuarit specialë. Sportistë, ish-futbollistë dhe shumë të tjerë do të jenë në 4 gusht në shkallët e stadiumit "Loro Boriçi". A do të ketë ndonjë familjar? Fillimisht për këtë përgjigjet Platori, i cili kur pyetet përtypet për shkak të largësisë së madhe, megjithëse dëshira për të qenë prezent e josh. "Nuk di ta them. Nëse do kisha më shumë kohë, besoj se do të vija. Por, deri tani s'jam ftuar", e thotë me zërin e prerë. Ndërsa kryetari Spahia ka menduar: " Patjetër që do të ketë të ftuar specialë. Sportistë, kolegë, trajnerë e miq do të jenë të gjithë bashkë për të kujtuar një nga emrat në të mëdhenj të sportit Shkodran. Ka për të qënë një përkujtim siç ai e meriton. Shkodra ka qënë dhe do të jetë gjithmonë shtëpia e futbollit, e artit e kultures dhe traditave më të mira, prandaj sot kemi detyrimin ta mbajmë fort këtë trashigimi që na bën të gjithëve krenar. Loro Boriçi është një prej tyre, që i përket plejadës së artë! ", përfundon ai.

100 VJETORI I LORO BORIÇIT, Nipi i legjendës së futbollit flet nga Kanadaja, Kryebashkiaku: Si do festojmë në Shkodër

Nga Retin Toka

Artikuj të ngjashëm Artikuj

Mission Complete! Shqiponjat shtegtojnë në Gjermani

Ermal Dredha/ Vlora pret Kombëtaren t’i dorëzojë Flamurin

“Uno kryqzimo”, kush është lushnjari që bëri “Gol” me banderolën

Aurora Dibra nxjerr nga “Kutia e Errët” historinë tragjike të jetës së saj

Myfarete Laze, rrëfim për një kohë të ndaluar

Dëshmorët nën dhe bërtasin: NDAL, TOKË E LYER ME GJAK

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

“Krenaria e Kuçovës”, uzina e “shqiponjave” në qiell

Mario Ashiku, një dashuri, shanse të dyta dhe një jetë e jetuar bukur (si vetë ai)

Inva Mula: Unë sopranoja e parë shqiptare në skenat evropiane

Aldor Nini, grabitqari i artit shqiptar dhe fjalës së lirë

Nano, beteja e një jete

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

100 VJETORI I LORO BORIÇIT, Nipi i legjendës së futbollit flet nga Kanadaja, Kryebashkiaku: Si do festojmë në Shkodër

Nga Retin Toka

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?