Who’s next?!

Që nga krijimi i tij në vitin 2019, SPAK ka qenë në qendër të debatit publik si një institucion kyç në luftën kundër korrupsionit dhe krimit të organizuar. Në një vend ku korrupsioni ka qenë dhe vijon të mbetet ende një plagë e thellë e jetës publike për dekada, ngritja e SPAK u konsiderua si një hap vendimtar drejt rindërtimit të besimit në drejtësi. Por si duhet vlerësuar puna e këtij institucioni? Çfarë ka arritur SPAK dhe cilat janë sfidat që ende përballet?

Revista Newsbomb.al ofron një analizë të plotë, duke u bazuar në të dhëna konkrete dhe raste kyçe që kanë tronditur skenën politike dhe institucionale të vendit, gjithashtu edhe në mendimet e profesorit të së drejtës penale, Ervin Karamuços. A është SPAK një model drejtësie që do t’i qëndrojë kohës dhe presioneve politike, apo do të mbetet thjesht një institucion i paralizuar nga sfidat që vetë korrupsioni imponon? Shumë çështje të viteve të shkuara ku tanimë janë kthyer në të “tashme” për t’u hetuar nga organi i akuzës me politikanë të fuqishëm që askush s’e besonte se një ditë do të parakalonin në oborrin e këtij institucioni. “Inceneratorët”, “Gërdeci”, “21 Janari”, “Sterlizimi” e shumë çështje të tjera të futura në një tavë gati për t’u “gatuar”. E paçka se ka shumë dyshime, kur situata sa vjen e bëhet më e nxehtë, pyetja që bëjnë të gjithë është: Kush e ka radhën?

“Krimet e natyrës korruptive janë krimet më të vështira për t’u hetuar sepse është një krim në detyrë, një krim intelektual dhe intelektuali para se të bëjë krimin, përpiqet që të fshehë dhe gjurmët e tij apo shfrytëzon hapësirat ligjore me qëllim kryerjen e krimit“. E ndërsa mendon këtë deklaratë të tij në Kuvend, Altin Dumani qëndron i palëkundur. Era e ftohtë e mbrëmjeve të vjeshtës fërfëllin mbi qytetin e Tiranës dhe brenda mureve të zyrës në SPAK, dritat janë të ndezura, paçka se akrepat e orës po i afrohen mesnatës. Ai është pranë dritares duke parë qytetin që po “vlon” prej ditësh. Vorbullës së mendimeve nuk po i shpëton, pikërisht për qytetarin e parë të Tiranës, Erion Veliajn. Duket si një film i parë njëherë me Ilir Metën, për të cilin prokurorët kërkonin arrestimin, gjykatës iu desh kohë ta shqyrtonte. E në një tablo kur e vërteta mund të dalë në prag së shpejti, për kryebashkiakun “ziejnë” të gjithë mediet. Ashtu bashkë me mendimet shkon pranë tryezës së tij ku janë dosjet e një vargu të gjatë politikanësh dhe zyrtarësh të lartë që duken gati për të rrëfyer gjithçka: lidhje të fshehta, marrëveshje të dyshimta dhe korrupsion që për vite, kish mbetur i paprekur. Duke i parë një nga një e siç e përafron legjislacioni, Dumani e ka mendjen se kush është i radhës. Një pyetje që qarkullon po aq mes kolegëve të tij sa edhe në bisedat e fshehta mes vetë politikanëve.

Ishte data 16 dhjetor 2022 ku mes shumë zhurmash, Altin Dumani u zgjodh në krye të SPAK. Ai nuk do ishte një emër i zakonshëm. Po drejton një strukturë me aksione që për shumëkënd dukeshin të pamundura. Është një mision që tanimë koha po tregon se do t’i japë një vend të veçantë në historinë e drejtësisë shqiptare – me beteja që të tjerë do të preferonin t’i shmangnin.