Vlora - 110 vite për shtetin, kryebashkiaku 8 vite për Qytetin

Në katin e parë të godinës mbi 100 vjeçare ka punuar nëna e tij, dhe kur ai ishte i vogël, si çdo fëmijë tjetër, kishte dëshirë të shkonte te zyra saj. E njihte atë godinë si shtëpinë e tij, të cilën e kishte vetëm 50 metra larg dhe kur 8 vjet më parë ai u votua nga qytetarët për të drejtuar Bashkinë e Vlorës, u vetëngarkua me superenergji për ta kthyer qytetin e lindjes, në vendin më të frekuentuar nga turistët. E gjen gjithmonë në Bashki, ku sëbashku me dy-tri piktorë, po e kthejnë godinën përfshi dhe zyrën e tij, në një ekspozitë, që do të qëndrojë e hapur këto ditë festash për qytetin ku 110 vjet më parë, u ngrit flamuri i pavarësisë. Ai e ka Vlorën, fiks si një të ftohur të vjetër, që nuk do i zhduket asnjëherë prej trupit. Ulemi në zyrën e tij, në një tryezë modeste ngjyrë të gjelbërt të hapur, ndërsa Dritan Leli sjell në vëmendje ditën e parë si kryebashkiak. “Sigurisht që e mbaj mend ditën e parë të punës në Bashki megjithatë para se të zgjidhesha kryetar Bashkie kisha bërë një vizitë të mëparshme për të takuar personelin shumica e të cilëve ishin persona që i njihja vetë ose njihnin familjen time. Dita e parë në këtë detyrë ishte e veçantë, ceremoniale, e mbushur me takime dhe emocione. E dija që kisha marrë përsipër një sfidë të vështirë, sepse Vlora në ato vite ishte e rrëmujshme, e pastrukturuar, e mbuluar nga tymi i plehrave që digjeshin si pa të keq… por për arsye të profesionit tim si mjek, isha i kalitur për t’u përballur me vështirësi, i kalitur për të marrë vendime të rëndësishme për jetën gjë që padiskutim më ndihmoi edhe në punën si kryetar bashkie” , - tregon Dritan Leli. Puna e parë që bëri ishte rikthimi i dinjitetit të institucionit të bashkisë duke i kthyer godinës vlerat arkitekturore e bashkë me të seriozitetin e të punuarit. “E nisa punën pikërisht nga rikonstruksioni i kësaj godine e cila më kishte mbetur një kujtim i bukur nga fëmijëria, por kur e pashë, më trishtoi, e deformuar dhe e shkatërruar totalisht. Restaurimi i godinës që është monument kulture ashtu siç e kishin projektuar italianët, përfundoi fiks në 105 vjetorin e Pavarësisë”- tregon kryebashkiaku i Vlorës në prag të 110 vjetorit. Sot kanë kaluar 8 vjet nga të qenurit të tij në krye të Vlorës dhe kur e pyes se si do e shihte radiografinë e vetes së tij, Leli shprehet: “Vazhdoj të kem shumë energji, kjo punë e bërë me dëshirë e përkushtim nuk mund të më japi gjë tjetër përveçse energji pozitive” . Imazhi “Ndryshimet që kanë ndodhur këto 8 vjet janë absolutisht shumë, është një Vlorë tërësisht ndryshe nga ajo që kam gjetur. Sigurisht që nuk janë bërë të gjitha ato që unë do të doja, por në fund të transformosh tërësisht një qytet pavarësisht dëshirës, financimit, dhe projekteve, duhen gjithmonë e më shumë para. Vlora ka qenë fatlume për vëmendjen që ka pasur nga Qeveria shqiptare, nga donatorët që janë bërë pjesë e transformimit rrënjësor”, - tregon kryebashkiaku duke renditur investimet e realizuara në këto 8 vjet. Puna në infrastrukturë nisi me rrugën e spitalit e shkatërruar tërësisht dhe lidhjen e rrugës transballkanike me qendrën e qytetit, investim që kishte nisur, por që sfidën më të madhe e kishte tek besimi që duhej ti rikthehej qytetarëve. Sipas Dritan Lelit investimi më i rëndësishëm i bërë në Vlorë është Lungomare, e investuar nga Delegacioni Europian, me bashkëpunimin e pakursyer të qeverisë shqiptare dhe bashkisë së Vlorës, të cilat nën asamblenë e së tërës, sollën një produkt që sot është bërë një nga zonat më përfaqësuese të qytetit më të madh në jug të vendit duke transformuar në thelb edhe jetën e qytetarëve vlonjat. “Kur u bë inagurimi i Lungomares në prani të komisionerit të zgjerimit Johanes Han, ajo që u vlerësua më shumë, që bëri boom, ishte korsia e biçikletave rreth 4 kilometra nga zona e Skelës deri në zonën ku është kompleksi sportiv te Uji i Ftohtë, bëri që në qytet brenda një muaji të shiteshin biçikleta sa ishin shitur në 20 vite marrë sëbashku. Eshtë një mekanizëm i fortë që projektet publike të ndryshojnë jetën e qytetarëve dhe në harkun kohor të dy viteve në Lungomare u hapën 400 biznese të reja. Unë po ju citoj një shprehje të qytetarëve italianë që jetojnë në Vlorë: una meravillosa cita, misura d’uomo” pra, një qytet i shkëlqyer në dimensionet e njeriut…, një qytet human”, - na thotë kryetari i Bashkisë së Vlorës. Skela dhe Pylli i Sodës Ndërkaq kush e ka vizituar Vlorën e sheh ndryshimin që ka përsuar jo vetëm Lungomare që deri para pak vitesh konsiderohej si pjesë jashtë zonës urbane, por edhe zona e Skelës dhe Pylli i Sodës duke u bërë pjesë integrale të qytetit të Vlorës. “Ne jemi duke punuar për ti dhënë një dimension të merituar zonës së Portit, Skelës, pranë Muzeut të Pavarësisë, një institucioni shumë të rëndësishëm për vlerat historike që bart dhe që deri dje nuk ishte i dukshëm për shkak të zallamahisë së lokaleve të ndërtuara përqark tij. Detyra e projektimit që morën arkitektët e studios që projektoi më parë edhe Lungomaren, ishte të rivitalizonin hapësirën për të theksuar rëndësinë monumentale të Muzeut të Pavarësisë. Dhe sot jam i kënaqur me produktin e përfituar dhe në këtë 110 vjetor i ka rikthyer lavdinë muzeut dhe që do të vijojë me projektet e Ministrisë së Kulturës për të rivitalizuar edhe hapësirat brenda muzeut”, - tegon Dritan Leli. Ndërkaq edhe zona e pyllit të Sodës po merr jetë. Në fillim, nisi rehabilitimi i rrugës, ndërsa më pas përmes një fondacioni të huaj nisi ndërtimi i korsisë së biçikletave deri në drejtim të urës. Megjithatë zona është ende objekt studimi përsa i pëket të ardhmes. “Në planin urbanistik të qytetit, unë insistova që në zonën e pyllit të Sodës të mos kishte ndërtime, pra të ruhej si mushkëria e Vlorës, pavarësisht se ka shumë probleme në degradimin e pyllit. Vite më parë duhej të ishte bërë rrallimi që pemët të rriteshin më të forta, ndaj jemi duke e studiuar ende”, vijon kryetari. Shëtitorja dhe xhamia Një tjetër investim që do të mbajë firmën e tij është edhe shëtitorja nga zona e Skelës te Sheshi i flamurit. Bulevardi “Ismail Qemali” i gjatë rreth dy kilometra është rivitalizuar totalisht. “Koncepti që u vendos me arkitektët ishte që ta kthenin këtë hapësirë në shërbim të qytetarëve duke ndërtuar edhe një pyll në mes të qytetit, ndërsa me insistimin tim u mbollën përgjatë gjithë bulevardit pemë të larta, rrepe, të cilat përshtaten me klimën dhe personifikojnë edhe qytetin si pemë monumentale dhe shpesh i përdorur në toponime edhe si vendtakim. Ndërsa rruga e ngushtë është lënë qëllimisht për të shmangur lëvizjen në qendër të qytetit, ndërsa zonën ta shijonin më shumë këmbësorët dhe dyrrotakët”,- sqaron Leli. Ndërkaq sheshi i Xhamisë është rrethuar duke u kthyer në zonë pedonale e si thotë kryetari ky vendim është marrë për ti dhënë dinjitetin e duhur besimtarëve të cilët në ditët e faljeve ishin të detyruar të kryenin ritet nën kalimin e makinave fare pranë tyre. Edhe rehabilitimi i Sheshit të Flamurit pati kontestime pro e kundër, por të gjithë vlonjatët sot, presin me padurim përfundimin e rikonstruksionit duke shpresuar të përfundojë më 28 nëntor, pra në këtë 110 vjetor të pavarësisë. Zona historike Dikur aty shiteshin rroba të vjetëruara, kishte ndërtime e shtesa edhe pse në tokën e tyre, pa pikë lidhjeje me atë që dikur ishte lagjia më e vjetër e më e bukur e qytetit, ndaj një nga synimet e Dritan Lelit kur mori detyrën e kryebashkiakut ishte pikërisht kthimi në identitet e kësaj zone të përçudnuar siç e quan ai. Lagjia që sot quhet Muradie, emër i marrë nga Xhamia e Muradies, një ndër më të bukurat në vend, sot është kthyer në një atrakion fantastik në qytet. Shembjen e ndërtimeve kryebashkiaku e nisi te kushëriri i tij, i cili sigurisht që e urreu për vendimin e marrë ndërsa sot kur pa rivitalizimin e e zonën dhe rritjen e vlerave të saj, i është mirënjohës. “Pikërisht kjo zonë historike ishte një ndër premtimet e mia të para kur mora detyrën e kryebashkiakut. Kujtoj me shumë nostalgji spotin e parë elektoral që kam bërë me një regjisor vlonjat, Erjonin dhe duhej të kaloja në mes të asaj rruge mbushur me tezga të shëmtuara e që qytetarët e Vlorës preferonin ta mënjanonin dhe sot jam krenar që me angazhimin e të gjithë punonjësve të bashkisë dhe qytetarëve të Vlorës të arrinim të sillnim atë që donin qytetarët tanë”, tregon Leli ndërsa kujton me krenari edhe sloganin e parë të fushatës më 2016: “Vlora, qyteti që projekton të ardhmen”. A ka humbur kryebashkiaku pjesë nga rritja e dy fëmijëve? I martuar me Suela Lelin (Tole), vitin kur mori detyren e kryebashkiakut i kishte fëmijët të vegjël: Noeli 13 vjeç dhe Izabela 3 vjeç. Sot pas 8 vitesh Noeli studion për arkitekturë, ndërsa e vogla i ka mbushur të 11-at. “Im bir thotë që vajza ka humbur shumë se nuk e shikon babain që rri natë e ditë në punë, megjithatë unë e justifikoj këtë duke thënë se edhe puna e doktorit nuk ka orar, është 24 orë në 365 ditë të vitit edhe pse ndryshojnë nga lloji i problematikës dhe intensitetit, por absolutisht kam qenë mirëkuptues nga familja ime. Për mua edhe Vlora ishte si një pacient, që kishte probleme për të ndërhyrë fort vrullshëm për ti dhënë jetë gjë që e përafronte shumë këtë me punën time si mjek”, - tregon Dritan Leli. Aq e rëndësishme është familja për të, saqë kur iu propozua kandidimi për kryetar bashkie, gjëja e parë që bëri ishte ta konsultonte me familjen. “E kujtoj dhe sot me shumë nostalgji fjalinë që më tha im bir kur ia thashë, pyeta time shoqe e cila ishte pak skeptike ndërsa Noeli më tha fjalinë më kurajoze që mund ti japë një djalë babait: Aq shumë sa e do ti të bukurën unë jam i bindur që do e bësh Vlorën. Ai është vlonjat puro dhe e thotë plot krenari orgjinën e tij nga Kuç i Vlorës. Dhe, për mua mbështetja e familjes është më e rëndësishmja që mund të ketë një funksionar publik për të pasur një produkt pozitiv. Ka qenë një eksperiencë e jashtëzakonshme dhe mendoj që ajo që ka mbërritur sot te qytetarët, te vizitorët që shikojnë Vlorën, është një Vlorë e transformuar dhe që vazhdon të ketë probleme, por që mendoj se kemi bërë një punë të mirë duke lënë një shembull se si mund të transformohet qyteti në vitet që vijnë, pasi standardi është vendosur, kërkesat e qytetarëve janë gjithmonë në rritje dhe udhërrëfyesi i viteve pasardhëse është shumë strikt, shumë rigoroz për të lejuar që të punohet keq me qytetin. Bashkia hap dyert për gjithë qytetarët Qyteti më i madh në jug të vendit është zhytur në të kuqen e flamurit tonë, ndërsa është gati për të pritur vizitorë nga gjithë vendet shqipfolëse në jubileun e 110 të Pavarësisë. Këto ditë u hap në Bashkinë e qytetetit ekspozita më e madhe e organizuar ndonjëherë me të gjithë veprat e autorëve vlonjatë. Të shtunave dhe të dielave është e hapur për të gjithë vizitorët. Një tjetër program ka Galeria e Arteve të qytetit që ka ftuar të gjithë piktorët vlonjatë kudo ku ndodhen nxënësit e shkollës së artit po dhe artistë të tjerë që kanë dëshirë të shfaqin veprat e tyre në këto ditë festive. Një program të veçantë do kenë edhe nxënësit e shkollave, për të kulmuar me një koncert të madh festiv. Teatri “Petro Marko” feston 60 vjetorin më 25 nëntor dhe vetë godina i është nënshtruar një ndërhyerje rehabilituese. Më 25 nëntor do të jenë të ftuar të gjithë personazhet që i kanë dhënë artit vlonjat, dhe që kanë kaluar nga teatri “Petro Marko”, ndërsa me inisiativën e kryetarit të bashkisë do të mundësohet restaurimi në formën e një varri monumental, vendit ku prehet Petro Marko në Himarë. Kryetari i Bashkisë së Vlorës ka ngritur një grup pune për të përcaktuar elementët festivë ndërkaq që ka ftuar të gjithë personazhet politikë që kanë dalë nga qytetit, të gjithë kryetarët e bashkive që kanë drejtuar qytetin në këtë 110 vjetor. “Ky është një vit jublar për qytetin e Vlorës, sepse shënohen 110 vjet nga ngritja e flamurit të Pavarësisë, ndërsa bashkia e Vlorës ka një vit të tërë që organizon aktivitete në kuadër të 110 vjetorit, për të qasur e afruar vizitorë në këtë jubile. Çdo gjë që kemi organizuar këtë vit ka qenë në kuadër të këtij eventi të madh dhe vetë statistikat që vijnë nga promovimi i turizmit ka bërë të kuptojmë që gjërat kanë shkuar për mirë”, - tregon Dritan Leli. Nga mjek super i kualifikuar në kryetar Bashkie Kanë kaluar 8 vjet që kur kryetar i Bashkisë Vlorë u zgjodh mjeku radiolog Dritan Leli, i cili la pas dore punën e tij si mjek, për të bërë një tjetër punë të vështirë, të “shëronte” qytetin e lindjes. Pas mbarimit të shkollës së Mesme Mjekësore “Jani Minga” në qytetin e tij të lindjes, Vlorë, ai ndoqi studimet në Fakultetin e Mjekësisë, në universitetin e Tiranës, të cilat i përfundoi në vitin 1992, por studimet nuk rreshtën me kaq. Specializimin pasuniversitar e kreu për Imazheri në Universitetin e Tiranës dhe më pas në Fakultetin e Mjekësisë në Universitetin e Athinës, ndërsa në përfundim të studimeve ai u bë Bashkëpunëtor Shkencor në Katedrën e Radiologjisë, Universiteti i Athinës. Ndërkaq doktor Dritan Leli kreu specializimin e dytë pasuniversitar në Mjekësinë Nukleare në Universitetin Katolik “Gemelli”, Romë, Itali ndërsa në vitin 2014 mori gradën Doktor i Shkencave (PhD) në Universitetin “La Sapienza” të Romës, ku u vlerësua maksimalisht. Së fundmi, një hap para se të zgjidhej në krye të bashkisë Vlorë, punoi në qendrën e radiologjisë pranë Qendrës Spitalore Universitare “Nënë Tereza”, Tiranë, duke e bërë doktor Lelin një ndër mjekët më të kualifikuar në vend. Lungomare Dikur përdorej si një rrugë kalimi thjesht për të çuar në jug të vendit dhe askush nuk ndalonte aty, ndërsa sot nuk ka apartamente që shiten nën 1000 euro metri katror dhe që një pjesë e mirë e tyre janë blerë jo vetëm nga vendas, por edhe shtetas të huaj. Ndërsa e gjithë vija bregdetare ofron lokale e hoteleri duke e kthyer atë në një prej zonave më të frekuentuara. Aeroporti e Porti Dy projektet që do ti japin qytetit të Vlorës një rëndësi të jashtëzakonshme janë aeroporti dhe projekti i zhvillimit të triportit të Vlorës që sigurisht do të ndikojnë në zhvillimin ekonomik të qytetit.

Vlora – 110 vite për shtetin, kryebashkiaku 8 vite për Qytetin

Nga Rezarta Delisula

Artikuj të ngjashëm Artikuj

Ismail Qemali, nga pavarësia te “Grushti i Shtetit”, E vërteta e shtetarit të parë shqiptar

Hymni Kombëtar, Mijëra franga ARI me konkurs, 25 vjet debat për ta ndryshuar

Belind Këlliçi: TIRANA që duam do fitohet nga zemra dhe shpirti i banorëve të vet!

Hola Albania! Melias Hotels mbërrin në Shqipëri, destinacion pushimesh i pazbuluar

BUXHETI PA EMËR!

Tregti me vdekjen, dosja e varreve “me çmim të kripur” në Tiranë

Artikujt më të lexuar

SONDAZHI/ Si ndahen votat për Tiranën e Shqipërinë

Spiunët e RTSH-së

Vajzat që shoqëruan bosët e krimit, nga stomatologe, tek Modelet

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen