Vit i Ri, stil i ri

Është janar… përsëri ftohtë… Dita është e shkurtër, nata e gjatë dhe temperaturat e ulëta. (Pavarësisht se ne shqiptarëve na ka bekuar Zoti pasi temperaturat në këto ditë të para janari janë mbi 10 gradë celcius)…

Prandaj edhe në garderobën tonë duhet të ndihet një “detox” veshjesh dhe stili, për ta nisur Vitin me energji, e cila duhet të ndihet pse jo edhe në pamjen tonë të jashtme. Personalisht vij nga një mini udhëtim nga Kosova dhe e kam thënë gjithnjë me zë të lartë që vajzat dhe djemtë vishen më bukur se ne shqiptarët e Shqipërisë. Më pëlqeu shumë mënyra e kombinimit të disa detajeve tepër dimërore ( kambale bore) të ndërthurura me veshje mbrëmjeje, që për çudi i vë re edhe tek blogerët apo influencerët e Instagramit. E di që do më thoni se keni shpenzuar shumë për Krishtlindjet dhe Vitin e Ri, e ndoshta tani s’keni shumë buxhet për rinovim garderobe, poooorrr ka dy lajme të mira. E para në janar fillojë uljet drastike dhe e dyta mund të ricikloni apo miksoni veshjet e vjetra dhe të dukeni shumë stil. Në fund të fundit askush s’do ketë nerva të bëjë “scroll” deri në fund të fotove tuaja të vjetra në Instagram.