VIS MARTINAJ në kërkim të “MBRETIT” TË KUMARIT

Prej gushtit Ervis Martinaj është emri që përmendet më shumë në media, që kërkohet më shumë në google, që pëshpëritet më dendur në tavolina, që merr më shumë klikime në botën on-line. Po ashtu, fotoja e tij, e vetmja që qarkullon ku dallohet i plotë portreti i tij, një fytyrë e madhe, me ball të gjërë, poshtë të cilit hetojnë dy sy grabitqarë, hedhur në qafë dorën e një miku, është imazhi më i parë në Shqipëri. Teksa ditët kalojnë, teza se ai është vrarë po fiton terren ndaj asaj që është arratisur vetë. Sipas asaj çfarë dihet deri tani, i fundit që ka folur me të është i ati, Mustafa Martinaj, në darkën e 9 gushtit. Ndërsa personi që e ka parë nga afër dhe ndoshta ka shtrënguar për të fundit herë duart me të, është Jeton Lami, oficer i forcave speciale

5 gusht. Mbrëmje e nxehtë! Durrësi zien nga zhurmat, përplasjet e pjatave në restorante, dhe muzika. Në orën 21.15, më i kërkuari në Shqipëri, Ervis Martinaj hyn në hollin e një hoteli luksoz. Hotel “Adriatiku” në Durrës. E shfrytëzojnë shpesh politikanët për dreka e darka, intelektualët për takime kulturore, apo njerëz të ndryshëm me të ardhura të konsiderueshme, për festa.