“Uno kryqzimo”, kush është lushnjari që bëri “Gol” me banderolën

Ka qenë 11 vjeç kur për herë të parë djali i xhaxhait e mori në stadium për të parë ndeshjen Lushnja-Kukësi që kishte mjaft rëndësi për të dy ekipet pasi njëri do të ngjitej në kategorinë e parë dhe që më 2012 nuk i është ndarë më stadiumeve ndërsa në ndeshjen Shqipëri-Poloni Flori Thomaj, sot 22 vjeç “bëri golin e tretë” me banderolën “uno kryqzimo, due kryqëzimo, Berlin”, banderolë e cila u bë virale tek gjithkush. Po kush është djaloshi që ka pikturuar në atletet e bardha shqiponjën, atlete të cilat i vesh vetëm në ndeshjet e kombëtares shqiptare ndërsa në çdo ndeshje sjell versione epike të situatave apo videove duke rënë në sy të të gjithëve???

Ndeshjen e parë në stadium e cilëson si një ndër më të veçantat në jetën e tij pasi kur pa stadiumin e Lushnjës plot, të cilin deri atëherë nuk e dinte ku binte, dhe dëgjonte brohorimat e tifozëve, u kthye një ndër ndjekësit më të zjarrtë të ekipit të qytetit të tij. Prej atij momenti, ai nisi të shohë dhe ndeshjet e kampionatit dhe padyshim të kombëtares, ndërsa futbolli u kthye në hobin e tij. Ndërsa ishte 16 vjeç dhe jetonte në Lushnje bashkë me prindërit, ai nisi të krijonte video në rrjete sociale e kur pa se historitë e futbollistëve të mëdhenj kishin interest e ndjekësat, nisi të merrej më seriozisht.