Tregti me vdekjen, dosja e varreve “me çmim të kripur” në Tiranë

Vdekja është e sigurtë, çasti i vdekjes është i pasigurtë. Por për 81 vjeçaren Mediha Sula dhe bashkëshortin e saj, gjysma e parë e kësaj thënie është e vërtetë dhe që në 2019, filloi të kërkojë varrin e vet dhe të bashkëshortit. Pleqtë paguan plot 600 mijë lekë të vjetra tek sekserët për të prenotuar banesën e tyre të fundit. Por më pas, nisi një kalvar vuajtjesh për të që do t'ia kthente në varr, ditët që po jetonte në jetë. Si kryhej “tregtia me varret” nga zyrtarët e Tufinës dhe Sharrës? Revista NewsBomb zbardh dosjen e hetimeve të prokurorisë ku u përdorën dhe agjentë të infiltruar për të zbardhur skemën e madhe të mashtrimit me varret. I kishin premtuar një copëz vend ku do të prehej ajo dhe bashkëshorti. I morën paratë për tokën e parapaguar e madje zhvatën edhe të afërmin e saj duke e garantuar se do shkruanin edhe emrat e tyre tek varri. Dhe duke bërë tregëti me vdekjen që nuk kishte ardhur ende, ata mashtruan një çift të moshuarish me pretendimin se “kjo ishte punë ditësh”. Në kërkim të një varri , e moshuara Mediha Sula, duroi deri sa mbushi 81 vjeçe dhe pak përpara se të festonte ditëlindjen, e stresuar dhe e mashtruar, ajo ia bëhu në dyert e policisë. Gruaja pati diskutuar me bashkëshortin gjatë 2019 dhe vendosën bashkërisht që vendin ku do të preheshin përgjithmonë, ta kishin gati përpara se të mbyllnin sytë. Por duhet të rezervonin. Ndaj Medihaja nisi të takojë çdokënd që punonte në varreza, që nga rojet, shoferë agjensish funerale dhe shërbimesh funerale deri sa gjeti ata që vendosnin dhe ishin shefa të prenotimit tw varreve. “ Burri që takova quhet Bujar, ishte shofer në varrezat e Tufinës. Ai më tregoi se njihte përgjegjësin që quhet Adi dhe se do negocionim për të gjetur vendet e varreve ”, – denoncoi në fund të një odiseje të gjatë e moshuara nga Tirana. Përballë pazarit se duhet të paguante 500 mijë lekë të vjetra për dy persona, asaj ju premtua dhe më pas ju tregua vendi se ku çifti do të prehej. “ Me bashkëshortin dhe dy personat e mësipërm u takuam tek varrezat dhe Adi më tregoi dy varre të vjetër ”, kujton e moshuara ditët kur nisi negociatat për siguruar një copë tokë si shtëpinë e tyre të fundit, ku të afërmit do t’u jepnin lamtumirën. Dy punonjësit u treguan të hapur dhe bashkëpunues, duke i informuar edhe mbi procesin që do të kryenin. “ Do ti heq dhe do ti fus në vendet murale dhe do ta rregullojmë me bordurë sipër, do shkruaj edhe emrat sipër. Do ta mbarojmë këtë punë mbasi t’më japësh shumën prej 500 mijë lekë të vjetra ” i tha njëri prej tyre. E moshuara nuk hezitoi. Pagoi jo vetëm ajo, por më pas pagoi edhe nipi 100 mijë lekë të vjetra për emrat e tyre që do të duheshin të shkruheshin. Në krye të gjashtë muajve, gruaja udhëtoi sërisht me autobus nga Tirana drejt Tufinës. Duhej të konfirmonte se çfarë po ndodhte me “banesën” e tyre të fundit. Aty u befasua nga prania e dy varreve të vjetër që ende nuk ishin larguar nga punonjësit. “ Pyeta një person tjetër që ishte aty që kishte ardhur si përgjegjës dhe ai u shpreh se nuk dinte asgjë ”, – kujton në polici, 81 vjeçarja. Pikërisht mes zhgënjimit që hasi dhe mashtrimeve që pasuan ditë pas dite, 81 vjeçarja u habit kur mësoi se edhe i afërmi i saj ishte zhvatur për mirëmbajtjen e varreve në një kohë që “ vendi nuk ishte bërë gati përpara se të mbyllnim sytë ”, shton e moshuara. Por mes bisedave të tensionuara, vajtje-ardhjeve në Tufinë dhe kërkesave që nuk realizoheshin nga ndërmjetësit, nwna e rwnduar nga vitet e jetws, ishte e aftw tw kuptonte tanimw se vërtet ishte mashtruar në njërën prej këtyre ditëve kur po kthehej nga varrezat. “ Takova një grua të moshës sime që më tha se B. i kishte premtuar një vend varri kundrejt pagesës dhe jam e bindur se në rast se paraqitet një person për të qarë hallin tek ai, garantoj se punonjësit e varrezave të Tufinës dhe B. si sekser do përfshihen në veprime korruptive. Edhe për të të varrosur kërkojnë lekë dhe të sjellin vërdallë, ndaj kërkoj nga ju si punonjës të shtetit të godisni këto fenomene ”, – mbylli denoncimin 81 vjeçarja. Alarmi i zonjës Sula solli një hetim penal me shtatë punonjës të vendosur nën hetim nga prokuroria e Tiranës. Për Agjensinë e Shërbimeve Funerale në Tiranë, varrezat publike që menaxhohen nga Bashkia janë varreza egzistuese që para 1990 dhe kanë qenë larg zonave të banuara. “ Ndryshimet demografike, lëvizja e lirë dhe ndërtimet pa kriter të pas viteve 1990 e kanë prishur këtë raport, duke cënuar distancat ligjore midis zonës së banuar dhe varrezave publike ”, përgjigjet për “Newsbomb” ky institucion. Parë me këtë qasje shërbimet funerale të kryeqytetit konsiderojnë si problematike objektet që u ndërtuan përreth varrezave duke ngushtuar hapësirën e duke sjellë vështirësi. “ Problematikë për zgjidhje mbeten prishjet dhe zhvendosjet e familjeve që kanë ndërtuar pranë varrezave publike, apo në hapësira urbane të parashikuara për ndërtim varrezash ”, thuhet më tej për “Newsbomb”. Megjithatë për dy varrezat publike të qytetit dhe konkretisht Sharrën dhe Tufinën egzistojnë vendimmarrje të Këshillit të Ministrave me objekt shpronësimin për interes publik të pronarëve të pasurive të paluajtshme. Bashkia e kryeqytetit konfirmon se Tirana ka dy varreza publike atë të Tufinës dhe të Sharrës si dhe 235 varreza publike në 13 njësitë administrative (ish-komunat) të Bashkisë Tiranë. Në 2017 me vendimin numër 486, sipërfaqja e shpronësuar në Tufinë ishte 20401 m 2 . “ Gjithashtu, varreza publike e Tufinës është zgjeruar me Vendim të Këshillit të Ministrave nr.222, datë 13.04.2022 “Për shpronësimin, për interes publik, të pronarëve të pasurive të paluajtshme, pronë private, që preken nga projekti “Zgjerim i sipërfaqeve të Varrezave Publike Tufinë, Faza 2” dhe sipas vendimit sipërfaqja e shpronësuar është përkatësisht 13 012 m 2 . Varreza publike e Sharrës është zgjeruar me Vendim të Këshillit të Ministrave nr.94, datë 08.02.2017 “Për shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Shtesat e Varrezave Publike Sharrë”, Tiranë dhe sipas vendimit sipërfaqja e shpronësuar është përkatësisht 54 711 m 2 ”, argumentohet në përgjigjen e shërbimeve funerale për “NewsBomb”. Por pavarësisht kësaj, shtetasi V. që u kontaktua nga revista “NewsBomb” tregoi se hasi në probleme të ngjashme si 81 vjeçarja , mbas një fatkeqësie familjare. “ Gruaja ndërroi jetë nga sëmundje e pashërueshme. Dhe në gusht kur ajo ishte në situatë terminale, ne kërkuam paraprakisht një vend varri. Pak a shumë si kur porosit diçka përpara se të jetë jotja. Fatkeqesisht kush ka probleme shëndetësore apo të moshuar në Tiranë, nis e bëhet gati për këtë gjë dhe vihet në kërkim të një varri. Ngjan e tmerrshme por nuk e dija se do na ndodhte .Nuk bëhej fjalë që ta varrosnim aty ku kishim të afërmit e tjerë sepse nuk kishte vend. Na treguan një parcelë toke që i binte pothuajse nën ujë. Nuk pranova. E ndava problemin me dy vajzat dhe vendosëm që gruaja të prehej me prindërit e saj ”, shprehet 63 vjeçari në kushtet e anonimitetit. Megjithëse personalisht nuk ka asnjë shqetësim shëndetësor, ai tregon trishtueshwm se mbas fatkeqësisë edhe ai ka nisur të mendojë për ditën e fundit dhe për banesën ku do prehet. Bashkia e Tiranës shpjegon se 2 varrezat publike kanë qenë egzistuese përpara 1990 dhe të ndërtura në mënyrë të tillë që të ishin larg qendrave të banuara. Një distancë e tillë prej vitesh nuk egziston më, duke sjellë vështirësi për qytetarët që humbasin të dashurit e tyre. Shpesh herë u duhet të bëjnë tregti me vdekjen. Një agjent i inflitruar për të zbuluar korrupsionin Që varri prenotohej nuk ishte e padëgjuar për autoritetet. E megjithatë, denoncimi i 81 vjeçares e shkundi prokurorinë, që u përball me dëshmi kontradiktore të të dyshuarve nga njëra anë dhe prova që i vinin në vështirësi secilin. Duke urdhëruar përgjime për përgjegjësin e Agjensisë të Shërbimeve Funerale dhe një 67 vjeçar të identifikuar nga e moshuara si Bujari, prokuroria përdori një agjent që u infiltrua. Agjenti “undercover” vihet në lëvizje dhe nis misionin në varrezat e Tufinës, ku si fillim vendos të takojë sekserin e denoncuar me emrin Bujar L., i cili nga verifikimet dyshohej se punonte shofer taksie. Më pas rezultoi se burri punonte si roje në varrezat e Tufinës. “ Fillimisht u ula në kafe me këtë person dhe i thashë se na kishte vdekur një kushëri në aksident jashtë vendit dhe se isha i interesuar për të gjetur një vend në mënyrë që ti vinim punët përpara” . Pas kësaj, agjenti largohet së bashku me sekserin, për të takuar një tjetër punëtor të agjensisë së funeraleve. “ Ai më tha se do më prenotonte një vend kundrejt 25 mijë lekë të reja. Gazi më tha se vendi që po prenotonte ia vlente, pasi ishte parcelë e mirë mbasi aty shkonte makina lehtësisht dhe se varri do ishte buzë rrugës. Pasi e pashë si vend, nuk i dhashë të gjitha paratë që m’u kërkuan, por dhashë vetëm 100 mijë lekë të vjetra. Më tha të rrija i qetë pasi vendin e prenotuar nuk e zinte njeri edhe nëse trupi i viktimës do të vonohej ”, rrëfen agjenti i infiltruar në dosjen që iu tregua “Newsbomb”. Në një prej përgjimeve ambientale, agjenti pyetet për rrethanat e aksidentit ku dhe shpjegon se ngjarja kishte ndodhur në Gjermani. Pazari që bëhet midis palëve është transkriptuar më pas për gjykatën penale. Agjenti: Nuk e di tash Gaz. Më kallzo. Më thuaj kaq se nuk më ka rastisur. Unë e kam babën 70 vjeç e nuk kam hy me zan vend. I dyshuari i parë: Shif aty përpara, ku është një varr i ri dhe katër bordura? Agjenti: Po? I dyshuari i parë: Ka paguar burri i huaj 600 mijë lekë. Agjenti: 600 mijë lekë? I dyshuari i parë: 600 mijë lekë. Tani 250 mijë lekë janë si truall. Pa kush do ma hapi gropën. I dyshuari i dytë: S’ke punë ti. I dyshuari i parë: Kur të vini të thotë është varr i ri, 250 mijë lekë varri i ri. Shuma prej 85 mijë lekë të reja e paguar nga agjenti i infiltruar u sekuestrua nga policia gjyqësore. Megjithatë i dyshuari që gjatë marrjes në pyetje tregoi se punonte roja në varreza këmbëngul se i mori paratë mbasi do punonte mbas orarit të punës për të rregulluar bordurat e varreve. Në dosje prokuroria thotë se përpos rojes, nga hetimet u ekspozuan si të dyshimtë edhe drejtori i varrezave të Tufinës, Eljodor Ndini, që u dorëzua i pandehur për korrupsion si edhe Alban Ajazi, Bujar Lica, Endrin Milla, Gazmend Daja dhe Latif Shehu , teknik ndërtimi në Tufinë. Prokuroria e pyet këtë të fundit: “ A është e përcaktuar në rregullore se familjari mund të bëjë rezervimin për një vend varri në lidhje me një person që nuk ka ndërruar jetë. Nëse po cila është procedura?” Tekniku Shehu pranon se prenotimi kryhet vetëm në raste të jashtëzakonshme. “ Kur është ndonjë i moshuar dhe pret që të vdesë dhe nga ana jonë i lihet afat 15- 20 ditë për ta patur të lirë këtë varr, në të kundërt varri zihet dhe i kalohet personave të tjerë dhe për këtë procedurë nuk ka asnjë detyrim financiar. Dua të theksoj se nëse personi i cili ka rezervuar varrin dhe brenda këtij afati vjen dhe e shfrytëzon, atëherë pagesa bëhet pranë Bashkisë së Tiranës ”. Ndërtim pa leje në varreza? I shtati që do të përballet me gjykatën është shtetasi Fatjon Gjonaj , një qytetar që humbi të atin gjatë pandemisë së Covid-19 dhe që u angazhua duke rezervuar varrin familjar. Por akuza e ngritur ndaj tij është ajo e ndërtimit . “Dhe ky ndërtim u konstatua në varreza”, - thotë prokurori Bledar Valikaj. Kallzimi i 81 vjeçares i kishte vendosur të gjithë nën përgjim, midis tyre edhe zyrtarët e lartë të shërbimeve funerale. Bëhet me dije se drejtoreshës i dërgohet një fotografi varri, verën e 2022 dhe ajo menjëherë kërkon shpjegime për punimet që po kryheshin në Tufinë. Në atë vend, po prehej Prend Gjonaj që kishte ndërruar jetë në 1 nëntor 2020. Familja i dha lamtumirën e fundit të shtrenjtit që u nda nga jeta në moshën 62 vjeç, por sakaq perimetri ku prehej i ndjeri po konsiderohej prej tyre si një vend i blerë me rezervim dhe vendi po zgjerohej me kolona betoni dhe çati. “ Im atë u varros në një varr individual dhe jo një varr familjar , i cili është i joni si vend varri. Varri familjar që ju po më thoni është blerë nga ana jonë në kohën kur ndërroi jetë babai me sa mbaj mend në vlerën e 200 mijë lekë të reja ”. Pavarësisht se prokuroria kërkon që të mësojë se kujt i ishin paguar paratë dhe nëse disponoheshin fatura, nga i dyshuari merr një përgjigje mohuese dhe duke shtuar se toka u ble në mirëbesim. “ Dua të deklaroj se në momentin që u ble ishte në një sipërfaqe më të vogël nga sa është aktualisht ku kemi kryer punime duke e bashkuar me mure betoni objektin varr familjar ” shprehet i dyshuari , emri i të cilit është në të njëjtën dosje me ish punonjësit e varrezave të Tufinës.

Tregti me vdekjen, dosja e varreve “me çmim të kripur” në Tiranë

Nga Anila Hoxha

Artikuj të ngjashëm Artikuj

Dan Hutra, vrasësi që urrente gratë

Një bebe merr SIDA në spital, prindërit tentuan vetëvrasjen

Shqipëria, ku vend që s’gjen qetësi nga vetja dhe…”Bota”

“Malli të ruhet si sytë e ballit”, amatorët që sollën 430 kg kokainë në Frakull

Vlora – 110 vite për shtetin, kryebashkiaku 8 vite për Qytetin

Hymni Kombëtar, Mijëra franga ARI me konkurs, 25 vjet debat për ta ndryshuar

Artikujt më të lexuar

Gjergj Luca, kryeoligarku i Shkrimsit, rebeli që grisi diplomën për t’u bërë biznesmen

SONDAZHI/ Si ndahen votat për Tiranën e Shqipërinë

Mimika Luca, Jetoi dhe dashuroi historinë e saj

Milioneri amerikan që zhvati 250 mijë franga ari nga Banka e Shqipërisë

JETA E NATËS NË VITET ’90, NGA DISKO ALBANIA DHE MARIKAJ TE BUZUKËT E PARTYT RAVE

Perëndesha Shqiptare e Spiunazhit botëror, historia e panjohur e Zejnep Vlorës

“GOGOLI” McGonigal dhe vullkani i ndezur i Ballkanit

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?

Tregti me vdekjen, dosja e varreve “me çmim të kripur” në Tiranë

Nga Anila Hoxha

Mbështetni autorët dhe abonohuni në përmbajtje

Shkarko

Zblloko Artikullin

Artikuj të ngjashëm Artikuj

Artikujt më të lexuar

Kontaktet

Kategori

Mirëse u ktheve!

Hapni një llogari të re!

Merrni fjalëkalimin tuaj

Je i sigurt që dëshiron ta zhbllokosh këtë artikull?

Are you sure want to cancel subscription?