Timo Flloko, shkëlqimi që erdhi nga “Anës Lumenjve”

Timo Flloko dhe poezia e Fan Nolit. Muzika dhe poezitë që mblodhën sërish bashkë në teatrin e Vlorës artistët e “Lulëkuqeve mbi mure”

Plastika e jashtëzakonshme dhe veçantia e personazheve të interpretuara e diferencojnë artistin Timo Flloko mes një brezi të tërë aktorësh që sot numëron teatri dhe kinematografia shqiptare. Hyri në kinema shumë i ri, vetëm 19 vjeç. Por dy filmat e tij të parë, “Ngadhnjim mbi vdekjen” (1967) dhe “Përse bie kjo daulle” patën fat të keq. U ndalua nga regjimi i kohës për arsye të mentalitetit. E megjithatë, aktori nuk u dorëzua. Nga një produksion kinematografik në tjetrin, portreti i tij sa vinte e spikaste po aq sa edhe loja e tij autoriale. Niveli i interpretimeve të tij filmike erdhi gjithmonë duke u rritur. Nga Kanani tek “Shtigje lufte” (1976) e deri te profesor Luani te “Lulëkuqet mbi mure”, Timo Flloko numëron tashmë mbi 40 role në karrierën e tij kinematografike . E megjithatë, filmat që aktori diferencon janë  “Vdekja e kalit”, pasi është filmi i parë që trajton në mënyrë realiste gjithçka dhe padiskutim edhe “Lulëkuqet mbi mure” që jo vetë ka fituar çmime për skenarin, regjinë dhe filmin më të mirë, por edhe një vit pas publikimit, me interpretimin brilant të poezisë së Fan Nolit “Anës lumenjve”, aktori Timo Flloko mori medalion në Festivalin e II të Filmit Artistik, të mbajtur në Tiranë nga 16 deri 23 prill 1977. Këtë përvojë, Timo Flloko e rijetëzoi në skenën e teatrit “Petro Marko” në Vlorë, ku u mbajt edhe një mbërmje poetike, muzikore e kinematografike kushtuar krijimtarisë së Dhimitër Anagnostit. Bashkë me të në skenë, mirënjohja dhe duartrokitjet e shumta shkuan edhe për artistët e kinematografisë shqiptare Roza Anagnosti, Rajmonda Bulku, Ndriçim Xhepa, Kristaq Skrami, dhe Artistëve që kanë kompozuar kolonat zanore të filmave shqiptarë nën drejtimin e maestros Oleg Arapi. Ekrani i vendosur në teatrin modest të Vlorës përcillte magjinë e filmave të Anagnostit, që jo pak janë frymëzuar edhe nga rrugicat e jugut ku u rrit e u formësua artisti.